فوتو: ن.بايبۋلين.
سەنات توراعاسى اتاپ وتكەندەي, بۇل زاڭدار مەملەكەت باسشىسىنىڭ تاپسىرمالارى اياسىندا ازىرلەنگەن. جاڭا نورمالار ايەلدەر مەن بالالارعا قاتىستى قىلمىستاردىڭ الدىن الۋدى جانە جولىن كەسۋدى كوزدەيدى. سەنات سپيكەرى ارىپتەستەرىن زاڭداردىڭ نەگىزگى ماقساتتارىن دۇرىس تۇسىندىرۋگە جانە ەنگىزىلگەن ەرەجەلەردىڭ ماڭىزىن جۇرتشىلىققا جەتكىزۋگە شاقىردى.
«قازىردىڭ وزىندە قولدانىستاعى زاڭنامادا, نەكە جانە وتباسى تۋرالى زاڭدا اتا-انالار قانداي دا ءبىر قىلمىستىق قۇقىق بۇزۋشىلىق جاساعان جاعدايدا اتا-انا قۇقىعىنان ايىرىلاتىن نورمالار بار. الايدا, ول نورمالار جاپپاي اتا-انا قۇقىعىنان ايىرۋعا اكەلمەگەنى بەلگىلى. تاريحىمىزدا ونداي جاعداي بولعان جوق. سوندىقتان مەملەكەت باسشىسى زاڭعا قول قويىپ, كۇشىنە ەنگەن جاعدايدا قۇجات جاپپاي اتا-انا قۇقىعىنان ايىرۋعا اكەلەدى دەگەنگە سەنۋدىڭ ەشقانداي نەگىزى جوق. بۇل مەنىڭ جەكە پىكىرىم. بۇل قاتە جانە تەرىس ءتۇسىنۋ. زاڭدا مۇنداي نورمالار جوق. سول سەبەپتى وسى زاڭ اتا-انالاردى اتا-انا قۇقىعىنان ايىرۋعا ارنالماعانىن ناقتى ءارى انىق ءتۇسىندىرىپ, جەتكىزۋىمىز كەرەك. ول ايەلدەردى قورعاۋ جانە بالالاردىڭ قاۋىپسىزدىگىن قامتاماسىز ەتۋ ءۇشىن جۇمىس ىستەيدى», دەدى ماۋلەن اشىمباەۆ.
ەسكە سالايىق, بۇگىن سەناتورلار پالاتا وتىرىسىندا «قر-نىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى جانە وعان ىلەسپە «قر-نىڭ اكىمشىلىك قۇقىق بۇزۋشىلىق تۋرالى كودەكسىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ەكى وقىلىمدا ماقۇلدادى.
