«ساپالى اۋديتوريانى قامتيتىن باسپاسوزدە, سونىڭ ىشىندە وڭىرلىك باسىلىمداردى دامىتۋ – كوكەيكەستى ماسەلە. مەملەكەت تاراپىنان باق سالاسىن دامىتۋدى قولداۋ باعىتىندا بىرقاتار ءىس-شارالار اتقارىلىپ جاتىر. بۇگىنگى فورۋم دا مادەنيەت جانە اقپارات مينيسترلىگى قولعا العان كەشەندى شارالاردىڭ ۇلكەن ءبىر بولىگى. بىلتىر ەلوردادا وتكەن العاشقى فورۋم بۇگىن الماتىدا جالعاسىن تاۋىپ وتىر. فورۋمدا مەرزىمدى باسىلىمداردى تانىمال ەتۋ, وقىرمان اۋديتورياسىن كەڭەيتۋ, ءباسپاسوزدى نىعايتۋدا الەۋمەتتىك جەلىنىڭ مۇمكىندىكتەرىن پايدالانۋ, سونىمەن قاتار, بالالار باسىلىمدارى, باسىلىمداردا ساپالى كونتەنتتى ارتتىرۋ ماسەلەلەرى تالقىلانادى», دەدى قامبار جۇماعالي ۇلى.
فورۋمنىڭ پلەنارلىق وتىرىسىنا مادەنيەت جانە اقپارات مينيسترلىگى اقپارات كوميتەتىنىڭ توراعاسى مەيىرلان راحانوۆ, «جاس الاش» گازەتىنىڭ باس رەداكتورى الماس ءنۇسىپ, «مىسل» جۋرنالىنىڭ باس رەداكتورى اسىل ساعىمباەۆ, فيلولوگيا عىلىمدارىنىڭ دوكتورى ورىناي جۇباەۆا, «دات» گازەتىنىڭ باس رەداكتورى قۇتماعانبەت قونىسباەۆ, «كۋرسيۆ» گازەتىنىڭ شەف رەداكتورى تاتيانا نيكولاەۆا, «كازاحستانسكايا پراۆدا» گازەتىنىڭ ءفوتوتىلشىسى يۋري بەككەر قاتىسىپ, تىلشىلەر كاسىبىنىڭ ماڭىزدى قىرلارى تۋرالى اڭگىمەلەدى.
«باق – قوعام مەن بيلىك اراسىنداعى التىن كوپىر, قۇلاعى كوزى. سوندىقتان مەملەكەت اقپارات قۇرالدارىنىڭ ەركىن ءارى ساپالى جۇمىس ىستەۋى ءۇشىن ارقاشان قولداۋىن كورسەتەدى. وڭىردەگى حالىقتىڭ كوڭىل كۇيى تىلشىلەر جەتكىزەتىن اقپاراتتىڭ ساپاسى مەن سىنىنا بايلانىستى ەكەنى بەلگىلى. ەكى كۇندىك فورۋم الىس ايماقتاردان كەلگەن اقپارات وكىلدەرى ءۇشىن جەمىستى ءارى ءتيىمدى بولادى دەپ سەنەمىن», دەدى اقپارات كوميتەتىنىڭ توراعاسى م.راحانوۆ.
ينتەرنەت رۋسۋرستارى مەن الەۋمەتتىك جەلىدەگى اقپاراتتار اعىنى اراسىندا باسىلىمداردى باسەكەگە قابىلەتتى ەتىپ, ءوز اۋديتورياسىن ساۋاتتى ساراپتاما, زەردەلى زەرتتەۋلەرمەن سۋسىنداتىپ, پايدالى اقپاراتپەن قامتاماسىز ەتۋ – ايماقتىق مەديانىڭ كۇن سايىن قاۋزايتىن ماسەلەسى. فورۋمنىڭ الداعى وتىرىستارىندا سپيكەرلەر باسپا باسىلىمدارىن تانىمال ەتۋ مەن تاراتۋدىڭ ايماقتىق قىرلارىن, سالالىق جۋرناليستيكانى دامىتۋدى, باسپا باسىلىمدارىن جەتىلدىرۋدىڭ جاڭا تاسىلدەرىن تالقىلايدى. اشىق پىكىرتالاستا مەرزىمدى باسىلىمداردىڭ تىنىس-تىرشىلىگى تۋرالى ويلار ساراپقا سالىنادى.
الماتى
