فوتو: ulysmedia.kz
اتباسار اۋدانى اكىمدىگىنىڭ رەسمي پاراقشاسىندا اكىم امانبەك قالجانوۆتىڭ جەرگىلىكتى تۇرعىندارعا ۇندەۋى جاريالاندى.
«جاباي وزەنىندە سۋ دەڭگەيىنىڭ كۇرت كوتەرىلۋىنە بايلانىستى وسى جىلدىڭ 11 ءساۋىرى كۇنى ساعات 04:43-تە جەر قورعانىنىڭ التى بولىگىندە سۋ تاسقىنى بولىپ, قالانى سۋ باسىپ قالدى. سۋ دەڭگەيى قارقىندى ءوسىپ, 5,95 م سىني دەڭگەيگە جەتتى. سوندىقتان سۋ تاسقىنى قاۋپى بار ايماقتىڭ بارلىق تۇرعىندارى تۇرعىن ۇيلەردەن شىعۋى كەرەك. قازىرگى ۋاقىتتا اۋداندا توتەنشە جاعداي جاريالاندى», دەدى اۋدان باسشىسى تۇرعىندار الدىندا.
وسى تۇستا اكىم تۇرعىنداردى ۇرەيلەنبەۋگە شاقىردى.
اتباسار قالاسىندا №2, 3, 5, 6, 7 مەكتەپتەردە, «وليمپ» فوك, بالالار مۋزىكا مەكتەبىندە ورنالاسقان ەۆاكۋاتسيالىق پۋنكتتەر ۇيىمداستىرىلادى.
«سۋ تاسقىنىنان زارداپ شەككەن تۇرعىندارعا كەلتىرىلگەن شىعىن وتەلەدى, بۇل ءۇشىن كوميسسيا قۇرىلىپ, اپاتتى ۇيلەر تەكسەرىلەدى. مەنىڭ جەتەكشىلىگىممەن اۋدان اكىمدىگى جانىنان سۋ تاسقىنىنا قارسى شتاب ۇيىمداستىرىلدى», دەپ تۇيىندەدى ا.قالجانوۆ.
