2024 جىلدىڭ ءبىرىنشى ايىندا تازا ينۆەستيتسيالىق تابىس 109,6 ملرد تەڭگە بولدى. اتالعان سوما وتكەن جىلدىڭ ۇقساس كەزەڭىنىڭ كورسەتكىشىنەن 45,7 ملرد تەڭگەگە نەمەسە 72%-عا جوعارى. كىرىستىلىك ءمانى ينفلياتسيادان دا اسىپ تۇسەدى: 9,5%-عا قارسى 10,3%.
«كەيىنگى جىلدارى بجزق زەينەتاقى اكتيۆتەرىنىڭ ينۆەستيتسيالىق كىرىسى بارلىق گەوساياسي دۇربەلەڭدەر مەن الەمدىك كۇيزەلىستەرگە قاراماستان وڭ سەرپىندى كورسەتىپ وتىر. جالپى, 2023 جىلى بجزق سالىمشىلارىنىڭ شوتتارىنا شامامەن 1,6 ترلن تەڭگە مولشەرىندە تازا ينۆەستيتسيالىق تابىس ءتۇستى, بۇل وتكەن جىلعى كورسەتكىشتەن 685,4 ملرد تەڭگەگە نەمەسە 77,7%-عا ارتىق. ۇب باسقارۋىنداعى بجزق زەينەتاقى اكتيۆتەرى بويىنشا كىرىستىلىك 2023 جىلى 10,1% قۇرادى, بۇل كەزدە ينفلياتسيا 9,8%دى قۇراعان بولاتىن», دەپ مالىمدەيدى Ranking ساراپشىلارى.
ساراپشىلاردىڭ ايتۋىنشا, تابىستىلىقتىڭ وڭ كورسەتكىشتەرى ۇب تاراپىنان بجزق زەينەتاقى اكتيۆتەرىن باسقارۋدىڭ ينۆەستيتسيالىق ستراتەگياسىمەن بايلانىستى. ينۆەستيتسيالىق پورتفەل ۇنەمى ءارتاراپتاندىرىلىپ وتىرادى, قاراجات ءارتۇرلى قارجى قۇرالدارىنا نارىقتىق جاعدايدا عانا سالىنادى. بەلگىلى ءبىر قۇرالدارعا قاراجات سالۋ كەزىندە جاھاندىق جانە ىشكى فاكتورلار ەسكەرىلەدى.
ماسەلەن, قارجى مينيسترلىگىنىڭ مەملەكەتتىك باعالى قاعازدارىنىڭ (مبق) ۇلەسى ءبىر جىل ىشىندە 48%-دان 46,8%-عا دەيىن قىسقاردى. شەت مەملەكەتتەردىڭ مبق ۇلەسى 5,5%-دان 0,14%-عا دەيىن تومەندەدى. سونداي-اق ميكروقارجى ۇيىمدارى, كۆازيمەملەكەتتىك ۇيىمدار وبليگاتسيالارى, بانك وبليگاتسيالارى جانە باسقا دا قارجى قۇرالدارىنىڭ ۇلەسىنىڭ قىسقارۋى بايقالادى.
ال دامىعان ەلدەر اكتيۆىنىڭ ۇلەسى 7,25%-دان 8,94%-عا دەيىن, دامۋشى ەلدەر اكتيۆتەرىنىڭ ۇلەسى 3,75%-دان 5,97%-عا دەيىن, سىرتقى باسقارۋداعى اكتيۆتەر ۇلەسى 9,22%-دان 13,52%-عا دەيىن ءوستى. مۇنداي ءارتاراپتاندىرۋ جانە ۋاقتىلى وزەكتەندىرۋ زەينەتاقى جيناقتارىنىڭ ساقتالۋىن جانە ورنىقتى تابىستىلىعىن قامتاماسىز ەتەدى.
