فوتو: primeminister.kz
اقتوبە جانە سازدى سۋ قويمالارىندا سۋ اعىزۋدىڭ وڭتايلى ترانزيتتىك رەجىمىن ەنگىزۋ ارقاسىندا سۋ تولىپ كەتۋ قاۋپى جوق. قارعالى سۋ قويماسىنداعى كەلىپ جاتقان سۋ كولەمى جوعارى كۇيىندە قالىپ وتىر. مۇندا ءبىر اپتا ىشىندە سۋ تولۋىنىڭ الدىن الۋ ءۇشىن ونى اعىزۋ قولمەن رەتتەلىپ كەلەدى. جوبالىق سىيىمدىلىعى 280 ملن تەكشە مەتر بولاتىن قارعالى سۋ قويماسىنىڭ تولۋ دەڭگەيى بۇگىندە – 270 ملن م3 نەمەسە 97%. جاساندى رەتتەۋ رەجىمىنىڭ ناتيجەسىندە 350 م3/س جىلدامدىقپەن سۋ كەلۋى كەزىندە 350 م3/س جىلدامدىقپەن سۋ اعىزۋ جۇمىستارى جۇرگىزىلىپ جاتىر. قازگيدرومەتتىڭ بولجامىنشا, كەلىپ تۇسكەن سۋ كولەمى ازايا باستادى.
«6 ساۋىردەن 7-نە قاراعان ءتۇنى قارعالى جاعالاۋىنا جاقىن ورنالاسقان جانە سۋ باسۋ قاۋپى تونگەن قالا شەتىندەگى ۇيلەردىڭ تۇرعىندارىن جاپپاي شۇعىل ەۆاكۋاتسيالاۋ جۇرگىزىلدى, 127 ادام قاۋىپسىز جەرگە كوشىرىلدى», دەدى س.جۇمانعارين.
سۋ تاسقىنى سالدارىنان اقتوبە وبلىسىندا 1 053 تۇرعىن ءۇي (اقتوبە قالاسىندا – 135, اۋدانداردا – 918), 46 عيمارات پەن قۇرىلىس (اقتوبەدە – 9, قوبدادا – 10, ويىلدا – 22, مۇعالجاردا – 4, تەمىردە – 1), 232 اۋلا مەن 689 ساياجاي ءۇيى سۋ استىندا قالدى. 17 ەلدى مەكەنمەن جول قاتىناسى بۇزىلدى.
وڭىردە بارلىعى 15 مىڭ ادامعا ارنالعان 86 ۋاقىتشا قابىلداۋ پۋنكتى دايىندالدى. 10 مىڭعا جۋىق ادام, ونىڭ ىشىندە 4 مىڭنان استام بالا ەۆاكۋاتسيالاندى. 10 663 جانۋار قاۋىپسىز ايماققا كوشىرىلدى.
بۇگىنگى تاڭدا وبلىستىڭ تۇراقتاندىرۋ قورىندا الەۋمەتتىك ماڭىزى بار ازىق-ت ۇلىك (كارتوپ, كوكونىستەر, كۇرىش, قاراقۇمىق جارماسى, قانت, وسىمدىك مايى, ۇن) مولشەرى جەتكىلىكتى. وسى كولەم اقتوبە مەن توتەنشە جاعداي رەجىمى ەنگىزىلگەن اۋدانداردى كەمىندە 1,5 ايعا قامتاماسىز ەتۋگە جەتەدى.
جالپى وبلىستا 94 زارداپ شەككەن تۇرعىنعا 28 ملن تەڭگە كولەمىندە بىرجولعى الەۋمەتتىك تولەمدەر تولەندى. جالپى 7 ساۋىردەگى جاعداي بويىنشا بىرجولعى تولەمدى الۋعا 346 وتباسى نيەت بىلدىرگەن.
تاسقىننان زارداپ شەككەن تۇرعىندار مەن كاسىپكەرلەردىڭ ماتەريالدىق زالالدارىن ەسەپتەۋ ءۇشىن اقتوبە وبلىسىنىڭ ءار اۋدانىندا جەكە كوميسسيالار قۇرىلدى. 7 ساۋىردەگى جاعداي بويىنشا 2 018 ءوتىنىش ءتۇسىپ, كوميسسيا مۇشەلەرى زالالدى باعالاۋ ءۇشىن اقتوبە قالاسى مەن ايتەكە بي, قوبدا, مۇعالجار, تەمىر اۋداندارىندا 1 482 ءۇيدى ارالاعان. ويىل اۋدانىندا سۋ دەڭگەيىنىڭ تومەندەمەۋى سەبەبىنەن م ۇلىكتى باعالاۋ جۇمىستارىن جۇرگىزۋ مۇمكىن بولماي وتىر. كەلتىرىلگەن زالالدىڭ تولەمدەرى تاۋەلسىز باعالاۋ كومپانياسىنىڭ قورىتىندىسىمەن جۇرگىزىلەدى. تىركەلمەگەن م ۇلىكتى, كوبىنە باۋ-باقشا شارۋاشىلىعىن باعالاۋ ءۇشىن بولەك مەحانيزم ازىرلەنەدى.
اقتوبە وبلىسىندا سۋ تاسقىنىنان زارداپ شەككەندەرگە ارنالعان گۋمانيتارلىق كومەك جيناۋ ورتالىعى جۇمىس ىستەيدى. بارلىعى 10 كۇن ىشىندە شامامەن 300 توننا (210 توننا ازىق-ت ۇلىك, 80 توننا ازىق-ت ۇلىككە جاتپايتىن تاۋارلار, 0,2 توننا ءدارى-دارمەك) جينالدى. ونىڭ ىشىندە 215 توننا تاۋار مۇقتاج تۇرعىندارعا تاراتىلدى. گۋمانيتارلىق كومەكتى زارداپ شەككەن اۋداندارعا جەتكىزۋگە 8 524 ەرىكتى كومەكتەسىپ جاتىر.
