استانا قالاسى ارقىلى تاسقىن سۋلاردى وتكىزۋگە, ىقتيمال سۋ تاسقىنىنان قورعاۋعا ارنالعان استانا كونتررەتتەگىشىنىڭ جاي-كۇيى تەكسەرىلدى. سونىمەن قاتار, مايبالىق كولى مەن ۆياچەسلاۆ سۋ قويماسىنىڭ جاعدايىن باقىلادى.
استانالىق كونتررەتتەگىشتە سۋدىڭ اعۋى قازىر سەكۋندىنا 30 تەكشە مەتردى قۇرايتىنى باياندالدى. كونتررەتتەگىشكە كەلىپ جاتقان اعىن سەكۋندىنا 248 تەكشە مەتردى قۇرايدى. بۇگىنگى تاڭدا كونتررەتتەگىشتىڭ سۋ اعىزۋ قابىلەتىن سەكۋندىنا 40 تەكشە مەترگە دەيىن ارتتىرۋ جوسپارلانىپ وتىر.
سۋ رەسۋرستارى جانە يرريگاتسيا مينيسترلىگىنىڭ مالىمەتتەرى بويىنشا احۋال تۇراقتى جانە ۇدايى باقىلاۋدا, استانا قالاسىن سۋ باسۋ قاۋپى جوق.
ولجاس بەكتەنوۆكە استانا سۋ قويماسىنداعى جاعداي تۋرالى باياندالدى. سۋدى اعىزۋ سەكۋندىنا 400 تەكشە مەتر دەڭگەيىندە جۇزەگە اسىرىلادى, سۋ قويماسىنىڭ كولەمى 409 ملن تەكشە مەتردى قۇرايدى. پرەوبراجەنسكي تورابىندا شارىقتاۋ شەگىنە جەتتى, نۇرا وزەنى ارقىلى توراپقا قۇياتىن سۋ اعىنى ازايىپ كەلەدى: قازىرگى ۋاقىتتا سەكۋندىنا 1 400 تەكشە مەتر وتۋدە.
استانا قالاسى مەن اقمولا وبلىسىنىڭ اكىمدىگى جاقىن ماڭداعى ەلدى مەكەندەر مەن قالالاردى سۋ باسۋدىڭ الدىن الۋ بويىنشا بىرلەسكەن جۇمىس جۇرگىزىپ كەلەدى. تايتوبە اۋىلىندا سۋ تاسقىنىنان نەگىزگى قورعانىس قىزمەتىن اتقارعان ۇيىندىلەردى نىعايتۋ جۇمىستارى اياقتالىپ جاتىر. بيىل قولدانىستاعى 2 400 مەترلىك بوگەتكە ۇزىندىعى 1 200 مەتر, بيىكتىگى 2,5 مەتر بولاتىن جاڭا بوگەت تۇرعىزىلدى.
جەدەل شتاب استانا, قوسشى قالالارى مەن تايتوبە اۋىلىنداعى سۋ قويمالارىنان سۋ جىبەرۋ دەرەكتەرى بويىنشا جاسالعان بولجامداردى ەسكەرە وتىرىپ, سۋ تاسقىنى جاعدايىنا مونيتورينگ جۇرگىزەدى.
سونىمەن قاتار ولجاس بەكتەنوۆ سولتۇستىك قازاقستان وبلىسىندا ەسىل وزەنىنىڭ جايىلماسىن تىكۇشاقپەن اينالىپ ءوتىپ, سەرگەەۆ سۋ قويماسىنداعى جاعدايدى تەكسەردى. بۇعان قوسا ەسىل وزەنى ارناسىنان اسقان جاعدايدا سۋ باسۋدىڭ الدىن الۋ جانە زالالدى ازايتۋ ءۇشىن پەتروپاۆل قالاسىنىڭ ماڭىنداعى بوگەتتەردى نىعايتۋ بويىنشا جۇمىستار تەكسەرىلەدى.
ۇكىمەت باسشىسىنا سەرگەەۆ سۋ تورابى قازىرگى ۋاقىتتا قۋاتىنىڭ شەگىندە جۇمىس ىستەپ جاتقانى تۋرالى باياندالدى. 8 ساۋىردەگى جاعداي بويىنشا 6017 م3/س دەڭگەيىندە سۋ كەلۋى تىركەلدى, ونى جىبەرۋ 4720 م3/س دەڭگەيىندە جۇزەگە اسىرىلىپ جاتىر. سونداي-اق سەرگەەۆ سۋ قويماسى پايدالانۋعا بەرىلگەن 1969 جىلدان باستاپ سۋدىڭ ماكسيمالدى شىعىنى 3600 م3/س دەڭگەيىندە بولعان. وسىلايشا, قازىرگى سۋ قويماسىنىڭ تولۋى كەيىنگى 50 جىلدا العاش رەت ورىن الىپ وتىر جانە الدىڭعى ماكسيمالدى كورسەتكىشتەردەن 2 ەسە دەرلىك اسادى.
سۋ تاسقىنى كەزەڭىندە سۋ قويماسىنىڭ دەڭگەيى (1 ملرد 366 ملن م3/س) قولمەن رەتتەلىپ وتىر, ياعني قالىپتى جاعدايعا (693 ملن م3/س) قاراعاندا, كوبىرەك سۋ ۇستاپ تۇرا الادى. قازىرگى ۋاقىتتا سۋ قويماسىنداعى كولەم – 1 ملرد 247 ملن م3/س. سۋدىڭ كەلۋى مەن ونى جىبەرۋ كولەمى ءبىر دەڭگەيدە – 4 ملرد 720 ملن م3/س. ماسەلەن, قازىرگى ۋاقىتتا سۋ قويماسى 180%-عا تولىپ وتىر. ماكسيمالدى مەجەگە دەيىن 100 ملن م3/س سۋ قابىلداي الادى. سۋ تاسقىنى باستالعاننان بەرى بارلىعى 500 ملن م3/س سۋ جىبەرىلدى.
قازگيدرومەت بولجامىنا سايكەس, بيىلعى 6-12 ءساۋىر ارالىعىندا كۇن كۇرت جىلىنىپ, قار ەرۋىنە بايلانىستى كەلەتىن سۋ كولەمى 2 400-دەن 3600 ملن م3/س-قا دەيىن ۇلعايۋى مۇمكىن. وسىعان بايلانىستى سۋ تاسقىنىنا قارسى ءىس-شارالاردى تولىققاندى جۇرگىزۋ ءارى عيماراتتاردىڭ قيراۋىنا جول بەرمەۋ ءۇشىن ولجاس بەكتەنوۆتىڭ تاپسىرماسىمەن قارۋلى كۇشتەر قۇرلىق اسكەرلەرى بريگادالارىنىڭ 300 اسكەري قىزمەتكەرى استانا قالاسىنان سولتۇستىك قازاقستان وبلىسىنا اتتاندى. ۇلتتىق ۇلان اكادەمياسىنان 400 كۋرسانت جانە ۇلتتىق ۇلاننىڭ «ورتالىق» وڭىرلىك قولباسشىلىعى اسكەري ءبولىمىنىڭ 300-دەن استام قىزمەتكەرى تارتىلدى. بۇل رەتتە وڭىرگە كومەك كورسەتۋ ءۇشىن تارتىلاتىن اسكەريلەر سانىن ودان ءارى ۇلعايتۋ جونىندە كوماندا بەرىلدى.
«پرەزيدەنت سۋ تاسقىنىمەن كۇرەسكە بارلىق كۇشتى جۇمىلدىرۋ مىندەتىن قويدى. ءبىز سولتۇستىك قازاقستان وبلىسىنىڭ وزىنە قورعانىس مينيسترلىگى مەن ۇلتتىق ۇلاننىڭ مىڭعا جۋىق قىزمەتكەرىن جۇمىلدىردىق. مىندەتىمىز – ەسىل وزەنى ارناسىنان اسىپ كەتكەن كەزدە ۇلكەن زارداپتاردىڭ الدىن الۋ. مۇنداي اۋقىمداعى سۋ كولەمى سەرگەەۆ سۋ قويماسىنىڭ بۇكىل تاريحىندا العاش رەت بولىپ وتىر», دەدى و.بەكتەنوۆ.
