پوۆەست 1957 جىلى جازىلىپ, 1963 جىلى ەكراننان كورەرمەنگە جول تارتتى. ال 1967 جىلى فرانتسۋزدىڭ ايگىلى كانن فەستيۆالىندە «بالالارعا ارنالعان ەڭ ۇزدىك شەتەل ءفيلمى» اتالىمىن جەڭىپ الدى. بۇل – قازاق كينو سالاسىنداعى تۇڭعىش جۇلدە. شىعارمانىڭ جارىق كورگەن جىلى تىڭ يگەرۋ جىلدارىمەن تۇسپا-تۇس كەلەدى. قازاق جەرى حانتالاپايعا تۇسكەن ساتتە باستى كەيىپكەردىڭ ەسىمى باسقا ەمەس, قوجا بولۋىندا دا ۇلكەن ءمان-ماعىنا جاتىر. ياعني «ەلدىڭ, جەردىڭ قوجاسى – مەن» دەگەن وي مەنمۇندالاپ تۇر.
تاعى ءبىر قىزىعى, باستى كەيىپكەردى سومداعان نۇرلان سانجاردىڭ فيلمدە ءوز داۋىسى جوق. ونىڭ ايتۋىنشا, سەگىزىنشى سىنىپقا دەيىن «ر» دىبىسىنا ءتىلى كەلمەگەندىكتەن, ورىسشا نۇسقاسىندا ونىڭ ءرولىن مارينا ۆينوگرادوۆا, ال قازاق تىلىندە فاريدا ءشارىپوۆا دىبىستاعان.
«تاقيالى پەرىشتە»
«جوق. جالعىزباستى ەركەكتىڭ كۇنى قۇرىسىن. جاناشىر اناسى بولۋ كەرەك نە بولماسا ايەلى». وسى ءبىر ويدان باستاۋ الاتىن بۇل ءفيلمنىڭ سيۋجەتى جەڭىل بولعانمەن, ايتار ويى تەرەڭ, وقيعاسى ويناقى, كەيىپكەرلەرى حالىق ومىرىنە ەتەنە جاقىن.
شاكەن ايمانوۆ «تاقيالى پەرىشتەسىن» 1965 جىلى بالۋاندار سايىسىنان تاپقان. ول بالۋان وزدەرىڭىز بىلەتىن – الىمعازى رايىمبەكوۆ. سونىمەن قاتار بۇل فيلمدە بيبىگۇل تولەگەنوۆانىڭ «انا» ءانىن ورىندايتىن ەپيزودى بار. بىراق ول داۋىس باقىت ءاشىموۆانىڭ داۋىسى بولاتىن. بۇل – رەجيسسەردىڭ شەشىمى ەدى.
و باستا فيلم كومپوزيتورى الەكساندر زاتسەپين «انا» ءانىن ورىستىڭ بەلگىلى ءانشىسى مايا كريستالينسكاياعا ارناعان. ءفيلمدى قازاقشالاعاندا سول داۋىستى نەگىزگە الا وتىرىپ جانە ءۇنى مەن مانەرى ۇقساس بولعاندىقتان باقىت ءاشىموۆانى تاڭداعان.
«قىز جىبەك»
ستسەناريىن عابيت مۇسىرەپوۆ جازىپ, سۇلتان قوجىقوۆ رەجيسسەرلىك ەتكەن, نۇرعيسا تىلەنديەۆ پەن قادىر مىرزا ءالي, گۇلفايرۋز يسمايىلوۆا سياقتى ءوزى ءىسىنىڭ مايتالماندارى اتسالىسقان «قىز جىبەك» كوركەم ءفيلمى – ۇلتتىق ونەردىڭ تەڭدەسسىز ولجاسى.
1944 جىلى جازىلعان ستسەناري بويىنشا «قىز جىبەك» ءفيلمىنىڭ العاشقى اتاۋى «اققۋ» بولعان. كەيىن اراعا جىلدار سالىپ, شىعارماشىلىق ءۇردىس ناقتى وندىرىسكە ۇلاسقاندا «اققۋ» اتاۋىن «قىز جىبەك» الماستىرعان. ءفيلمىنىڭ تۇساۋى 1970 جىلى الماتى قالاسىنداعى «تسەليننىي» كينوتەاترىندا كەسىلگەن بولاتىن. ال باستى كەيىپكەر جىبەكتىڭ رولىندە ويناۋعا ءتورت جۇزگە جۋىق ۇمىتكەردەن ۇسىنىس حات كەلىپ ءتۇسىپتى. ولاردىڭ ىشىندە ون بەس قىز عانا ىرىكتەۋدەن ءوتىپ, وندا دا تەك جىبەكتىڭ سەرىكتەرى رەتىندە تاڭدالعان.
