وڭىردە قىزىل سۋدان زارداپ شەككەندەرگە كومەك جيناۋ قىزۋ ءجۇرىپ جاتىر.
ايتالىق, «AMANAT» پارتياسى الماتى وبلىستىق فيليالى «وجەت» بازارى كاسىپكەرلەرىنىڭ قولداۋىمەن سۋ تاسقىنىنان زارداپ شەككەن وڭىرلەرگە 6 توننا گۋمانيتارلىق كومەك جينالدى.
«پارتيانىڭ «كۇشىمىز بىرلىكتە!» اكتسياسى اياسىندا بازار ۇجىمى سۋ تاسقىنىنان زارداپ شەككەن اقتوبەلىكتەرگە ءوز ۇلەستەرىن قوسىپ, 3 توننا اياق كيىم جانە 3 توننا كيىم-كەشەك جينادى. گۋمانيتارلىق كومەك ەرتەڭ دە جينالادى», دەيدى «وجەت» بازارى ديرەكتورىنىڭ ورىنباسارى باۋىرجان سالىمباەۆ.
بۇعان دەيىن اماناتتىقتار تاسقىننان زارداپ شەككەن ايماقتارعا 1 مىڭنان اسا اياق كيىم جولداعان بولاتىن.
«جۇمىلا كوتەرگەن جۇك جەڭىل» دەگەن. توپان سۋ تىرشىلىگىن تۇرالاتقان ايماقتاعى اعايىندارعا قولدان كەلگەنشە جاردەم جاساۋ – ازاماتتىق پارىزىمىز. قارعىن سۋدان قينالعاندارعا قولۇشىن بەرۋگە وڭىردەگى اماناتتىقتارمەن قاتار, كاسىپكەرلەر, جومارت جاندار دا ايانىپ قالمادى. بۇل ءىستىڭ باسىن قۇراۋدا ەرىكتىلەر مەن جاستاردىڭ بەلسەندىلىگىن ەرەكشە اتاۋ ورىندى», دەيدى «AMANAT» پارتياسى الماتى وبلىستىق فيليالى توراعاسىنىڭ ورىنباسارى اسلان كوبەنتاەۆ.
ايتا كەتۋ كەرەك, تابيعي اپات ايماعىنداعى تۇرعىندارعا كومەك قولىن سوزامىن دەگەن ۆولونتەرلەر مەن وبلىس تۇرعىندارى ءۇشىن «الاتاۋ جاستارى» كمم وبلىستىق ۆولونتەرلىك شتابى ساعات 09:00-دەن 18:30-عا دەيىن جۇمىس ىستەيدى.
