ەلىمىزدى مەكەندەگەن بارلىق ەتنوستىڭ ونەرىن دارىپتەۋگە دەن قويعان تەاتر ۇلتارالىق كەلىسىمدى نەگىزگە الا وتىرىپ, حالىقتى تولعاندىراتىن وزەكتى ماسەلەگە ءمان بەرىپ, ونەر تىلىمەن سۋرەتتەپ كەلەدى. تاريحىن وتكەن عاسىردىڭ 30-جىلدارىنان تارقاتاتىن ۇيعىر مۋزىكالىق كومەديا تەاترى ءتول رۋحانياتىنىڭ كوركەم شەجىرەشىسى عانا ەمەس, ەل ونەرىنىڭ ءبىر بولشەگى رەتىندە مادەنيەتتەردى جاقىنداستىرۋعا ءوز ۇلەسىن قوسىپ كەلەدى. بيىل اتالىپ وتەتىن توقسان جىلدىق تورقالى تويىنا دا تياناقتى دايىندالىپ, جاقىندا تەاتر تاريحىنان سىر شەرتەتىن ءوز مۋزەيىن جاساقتادى.
تەاتر شەجىرەسىن جيناقتاعان مۋزەيدىڭ اشىلۋ سالتاناتىندا العاشقى اقجارما تىلەگىن بىلدىرگەن تەاتردىڭ باسشىسى, قازاقستاننىڭ ەڭبەك سىڭىرگەن قايراتكەرى ديلمۋرات باحاروۆ, بەلگىلى ساحنا مايتالمانى, قازاقستاننىڭ ەڭبەك سىڭىرگەن ءارتىسى ريحانگۋل ماحپيروۆا مەن م.اۋەزوۆ اتىنداعى ۇلتتىق دراما تەاترىنىڭ ديرەكتورى ەركىن جۋاسبەك ونەر تاريحىنداعى ايتۋلى وقيعانىڭ تەاتر ۇجىمدارى اراسىنداعى بايلانىستىڭ نىعايۋىنا سەبەپكەر بولاتىنىن اتاپ ءوتتى. قىزىل لەنتانى قيۋ راسىمىندەگى قۇتتىقتاۋدىڭ كەلەسى لەگىن قازاقستاننىڭ ەڭبەك سىڭىرگەن قايراتكەرى الىمجان ايساەۆ پەن ت.جۇرگەنوۆ اتىنداعى ۇلتتىق ونەر اكادەمياسىنىڭ پروفەسسورى امان بەكەن ۇلى جالعادى. تەاتر تاريحىنداعى ماڭىزى زور شاراعا ارنايى شاقىرىلعان قوناقتار مۋزەيدى تاماشالاپ, ولارعا تەاتردىڭ ادەبيەت ءبولىمىنىڭ مەڭگەرۋشىسى گۋلباحار ناسيروۆا ساحنا ونەرىنىڭ قالىپتاسۋى مەن دامۋىنا ەڭبەك سىڭىرگەن ۇيعىر حالقىنىڭ تالانتتى ۇل-قىزدارى تۋرالى اڭگىمەلەپ بەردى. 1934 جىلى قۇرىلعان تەاتر, عيماراتتىڭ سىرتقى بەينەسى, رەپەرتۋارداعى قويىلىمدار, سول كەزدەگى اكتەرلەردىڭ سۋرەتتەرى مەن ساحنالىق كوستيۋمدەرى, بۋتافوريالىق بۇيىمدار كوپشىلىك نازارىنا ۇسىنىلدى. سونداي-اق تەاتر ەسىمىن يەلەنگەن كسرو حالىق ءارتىسى قۇدىس قوجامياروۆتىڭ ءومىرى مەن شىعارماشىلىعىنا ارنالعان بۇرىش اشىلىپ, ايگىلى كومپوزيتوردىڭ پايدالانعان جەكە بۇيىمدارى مەن جازبالارى قويىلدى. بۇدان ءارى مەيماندار كىشى زال مەن جاس سۋرەتشىلەردىڭ شىعارمالارى قويىلعان «دۇنيە-ارت» گالەرەياسىن تاماشالادى. مەرەكە سوڭى تەاتر ارتىستەرى ازىرلەگەن دۋماندى كەشپەن تۇيىندەلدى.
الماتى
