وتىرىستى اشقان ماۋلەن اشىمباەۆ الدىمەن, بۇگىن كورنەكتى مەملەكەت جانە قوعام قايراتكەرى, پارلامەنت سەناتىنىڭ العاشقى توراعاسى ومىربەك بايگەلدىنىڭ قايتىس بولۋىنا بايلانىستى مارقۇمنىڭ وتباسى مەن جاقىندارىنا كوڭىل ايتتى.
«ومىربەك بايگەلدى ۇلىنىڭ ونەگەلى ءومىرى ەل تاريحىنىڭ تۇتاس ءبىر تاراۋى دەۋگە تولىق نەگىز بار. ول 1995 جىلى سەناتور رەتىندە سايلانىپ, تاۋەلسىز قازاقستان تاريحىندا پارلامەنت سەناتىنىڭ العاشقى توراعاسى بولدى. وسىلايشا, ۇلتتىق پارلامەنتاريزمنىڭ قالىپتاسىپ, دامۋىنا ۇلكەن ۇلەس قوستى. سول كەزەڭدە قابىلدانعان زاڭدار مەملەكەتتىلىگىمىز بەن تاۋەلسىزدىگىمىزدىڭ نىعايۋىنا تىكەلەي ىقپال ەتكەنى انىق. وسى ءىستىڭ بارىندە ومىربەك بايگەلدى ۇلى ناعىز وتانشىلدىقتىڭ, ۇلتقا قىزمەت ەتۋدىڭ وزىق ۇلگىسىن كورسەتتى», دەدى پالاتا توراعاسى.
ايتا كەتەيىك, ومىربەك بايگەلدى سەناتتا 16 جىلدان استام ۋاقىت ەڭبەك ەتتى. ول پارلامەنت سەناتىنىڭ ءبىرىنشى, ەكىنشى, ءۇشىنشى جانە ءتورتىنشى شاقىرىلىمىندا دەپۋتات بولدى.
وتىرىس بارىسىندا سەناتورلار ءابدىراشيد جۇكەنوۆ پەن زاۋرە كەيكىباسوۆانى جوعارعى سوت سۋدياسى قىزمەتىنەن بوساتتى. مەملەكەت باسشىسىنىڭ ۇسىنۋىن قاراعان پالاتا دەپۋتاتتارى وسىنداي شەشىم قابىلدادى. ۇسىنىلعان كانديداتۋرالار الدىن الا كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىندە تالقىلاندى. مەملەكەت باسشىسىنىڭ ۇسىنۋىن جوعارى سوت كەڭەسىنىڭ توراعاسى دەنيس شيپپ جاريالادى.
سونىمەن قاتار پالاتا وتىرىسىندا دەپۋتاتتار «ەۋرازيالىق ەكونوميكالىق وداققا مۇشە مەملەكەتتەردە عىلىمي دارەجەلەر تۋرالى قۇجاتتاردى ءوزارا تانۋ تۋرالى كەلىسىمدى راتيفيكاتسيالاۋ تۋرالى» زاڭدى قاراپ, ماقۇلدادى. كەلىسىمگە سايكەس فيلوسوفيا دوكتورى (PhD), بەيىنى بويىنشا دوكتور, عىلىم كانديداتى جانە عىلىم دوكتورى سياقتى عىلىمي دارەجەلەر تۋرالى قۇجاتتار راستاۋسىز تانىلادى. مۇنداي قۇجاتتاردىڭ يەلەرى عىلىمي دارەجەسى ءۇشىن ۇستەمەاقى تالاپ ەتكەن جاعدايدا ەرەكشەلىك قاراستىرىلعان. سونداي-اق زاڭ نورمالارى عىلىمي كادرلارمەن الماسۋدى ىنتالاندىرۋعا جانە ەاەو-عا مۇشە ەلدەردىڭ ءبىلىم بەرۋ جۇيەلەرىن ينتەگراتسيالاۋعا, ۋنيۆەرسيتەتتەر مەن زەرتتەۋ ينستيتۋتتارى اراسىنداعى عىلىمي بايلانىستاردى نىعايتۋعا ارنالعان.
سونداي-اق سەناتورلار «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ مينيسترلەر كابينەتى اراسىنداعى اۆياتسيالىق ىزدەستىرۋ جانە قۇتقارۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭدى ماقۇلدادى. پالاتا توراعاسى اتاپ وتكەندەي, قازىرگى تاڭدا قازاق-قىرعىز قارىم-قاتىناسى بارلىق سالادا قارقىندى دامىپ كەلەدى. ماقۇلدانعان زاڭ وسىنداي ءتيىمدى بايلانىستىڭ ءبىر ناتيجەسى ەكەنى ءسوزسىز. كەلىسىمدى راتيفيكاتسيالاۋ قازاقستان مەن قىرعىزستان اۋماقتارىندا اۆياتسيالىق ىزدەستىرۋ جانە قۇتقارۋ جۇمىستارىن جەدەل ۇيىمداستىرۋعا, وسى سالاداعى ەكىجاقتى ىنتىماقتاستىقتى ودان ءارى نىعايتۋعا ىقپال ەتپەك.
«كەلىسىم ەكى مەملەكەتتىڭ اۆياتسيالىق ىزدەستىرۋ جانە قۇتقارۋ سالاسىنداعى ىنتىماقتاستىعىن نىعايتۋدى كوزدەيدى. زاڭ اۆياتسيالىق وقيعا تۋىنداعان جاعدايدا تاراپتاردىڭ بىرلەسكەن ءىس-قيمىلىن, سونداي-اق وقۋ-جاتتىعۋلار وتكىزۋ جانە اقپارات الماسۋدىڭ جەكەلەگەن ماسەلەلەرىن رەتتەيدى. الداعى ۋاقىتتا بۇل كەلىسىم ەكى ەل اراسىنداعى قارىم-قاتىناستاردى ودان ءارى دامىتۋعا وڭ سەپتىگىن تيگىزەدى دەپ سەنەمىز», دەدى م.اشىمباەۆ.
