كۇنىنە 110 مىڭ جۇمىرتقا وندىرىلەدى
كاسىپورىن جىلىنا 72 ملن دانا جۇمىرتقا وندىرۋگە قاۋقارلى. قۇس فابريكاسىنىڭ ىرگەتاسى 2022 جىلى قالاندى. ەكى جىلداي قۇرىلىس جۇمىستارى ءجۇرىپ, ىسكە بيىل كىرىستى. ءوندىرىس ورنىندا 2 تسەح, 4 قوراجاي, ۆەتەرينارلىق زەرتحانا, جۇمىرتقانى سۇرىپتايتىن الاڭ مەن ءونىم ساقتايتىن قويما بار.
جۇمىرتقالايتىن تاۋىقتار – «سۋپەر نيك» دەپ اتالاتىن تۇقىمدى قۇستار. ولاردى وزبەكستاننان ارنايى ساتىپ اكەلگەن. قۇس فابريكاسىندا گورموندىق قوسپالار, ءوسۋ ستيمۋلياتورلارى, گەنەتيكالىق تۇرلەندىرىلگەن زاتتار مۇلدەم قولدانىلمايدى. تاۋىقتار مەن بالاپاندار تەك تابيعي قۇراما جەممەن قورەكتەندىرىلەدى. كاسىپورىن گەرمانيانىڭ «Big Dutchman», پولشانىڭ «Moba» سەكىلدى ەڭ وزىق قوندىرعىلارىمەن جابدىقتالعان.
كومپانيا وكىلى ءومىربي ءسابيت ۇلىنىڭ ايتۋىنشا, بۇگىندە فابريكاداعى قۇس سانى 110 مىڭعا جەتتى. ءساۋىر ايىندا تاعى 110 مىڭ قۇس ساتىپ اكەلىنبەك. جۇمىرتقانىڭ 3 ءتۇرلى سۇرپى وندىرىلەدى. جۇمىرتقا ساناتتارى تاڭداۋلى, سۋپەر تاڭداۋلى جانە س1 دەپ بولىنەدى. كاسىپكەرلىك جوبانى جۇزەگە اسىرۋدىڭ ءبىرىنشى كەزەڭىندە 72 ملن دانا جۇمىرتقا وندىرىلمەك. كومپانيا بيزنەس باستاۋعا قاجەتتى قاراجاتتى «دامۋ» كاسىپكەرلىكتى دامىتۋ» قورى ارقىلى 4%-دىق نەسيەمەن العان. قۇرىلىس پەن ءوندىرىستى ىسكە قوسۋعا كەتكەن جالپى قارجى 4,5 ملرد تەڭگەنى قۇراپتى. قازىر كاسىپورىندا كۇنىنە 110 مىڭ جۇمىرتقا وندىرىلەدى. 72 ملن دانانى قۇرايتىن جىلدىق قۋاتتىلىققا تولىق كوشكەن ۋاقىتتا كۇنىنە 220 مىڭ جۇمىرتقا ءونىمى الىناتىن بولادى.
سىرتقى نارىققا دا ەكسپورتتالادى
«نەگىزگى ماقساتىمىز – حالىققا حالال ءارى ارزان, ساپالى جۇمىرتقا ۇسىنۋ. ءونىمىمىز حالىقارالىق ستاندارتتارعا تولىق سايكەس بولعاندىقتان, شەتەلگە ەكسپورتتاي الامىز. الايدا اۋەلى ىشكى نارىقتى جۇمىرتقامەن تولىق قامتاماسىز ەتۋىمىز كەرەك. بيزنەس جوبامىزدىڭ ەكىنشى كەزەڭىندە تاۋىق سانىن 660 مىڭعا جەتكىزىپ, جىلىنا 220 ملن دانا جۇمىرتقا ءوندىرۋدى كوزدەپ وتىرمىز. مىنە, سول كەزدە تاۋارىمىزدى ەۋرازيالىق ەكونوميكالىق وداق (ەاەو) ەلدەرى مەن شەتەلدەرگە ەكسپورتتايمىز. قىستا ادامنىڭ تابەتى ارتىپ, تاماقتى كوپ جەيدى. جۇمىرتقا جوعارى كالوريالى تاعام ءتۇرى بولعاندىقتان, قىستا ونىڭ تۇتىنۋ كولەمى ارتادى. جازدا تومەندەيدى. سوندىقتان ول سۇرانىسى جوعارى, كوپ تۇتىناتىن, ءارى جاز بەن قىس مەزگىلىنە قاراي قاجەتتىلىگى وزگەرىپ وتىراتىن ءونىم بولىپ سانالادى», دەدى ءومىربي ءسابيت ۇلى.
كاسىپورىن اۋماعىندا 135 مەتر تەرەڭدىكتە ۇڭعىما قازىلعان. ول ءمولدىر تازا سۋدى تۇتىنۋعا مۇمكىندىك بەرەدى. جارىق وشكەن جاعدايدا فابريكانى ۇزدىكسىز ەلەكتر قۋاتىمەن قامتاماسىز ەتەتىن ارنايى گەنەراتور قوندىرعىسى ورناتىلعان. ءوندىرىس ورنىنىڭ ورنالاسقان جەرى قالا ورتالىعىنان ءبىرشاما ۇزاقتا – تۇركىستان وبلىسى تولەبي اۋدانىنا قاراستى زەرتاس اۋىلىنىڭ ءدال ماڭىندا. سوندىقتان مۇندا ەڭبەك ەتەتىن جۇمىسشىلاردىڭ دەنى – جەرگىلىكتى تۇرعىندار. قالادان قاتىناپ ىستەيتىن جۇمىسشىلارعا ارنايى اۆتوبۋس قاراستىرىلعان. جالپى, كاسىپورىندا 75 ادام جۇمىس ىستەيدى.
قۇس فابريكاسىنىڭ ءوندىرىس ايماقتارىنان, مال شارۋاشىلىعى كەشەندەرىنەن الشاقتا سالىنۋى سانيتارلىق-ۆەتەرينارلىق قاۋىپسىزدىكتى جوعارى دەڭگەيدە ساقتاۋعا كەپىلدىك بەرەدى. كومپانيا الداعى ۋاقىتتا ەتتى باعىتتاعى برويلەر تاۋىقتارىن ءوسىرىپ, قۇراما جەم دايىندايتىن قوسىمشا ءوندىرىستى ىسكە قوسۋدى جوسپارلاپ وتىر. سونداي-اق ءوندىرىستىڭ ەكىنشى كەزەڭىندە شۇجىق سەكىلدى كوپتەگەن تاۋىق ەتى ونىمدەرى ازىرلەنىپ, ولار ارنايى فيرمالىق دۇكەندەردە ساتىلىمعا شىعارىلادى.
مەملەكەت 250 ملن تەڭگە پايىزسىز قارجى بەردى
شىمكەنت قالالىق اۋىل شارۋاشىلىعى جانە ۆەتەريناريا باسقارماسى باسشىسىنىڭ ورىنباسارى قايرات بازاربەكوۆتىڭ مالىمدەۋىنشە, جاڭادان اشىلعان قۇس فابريكاسىنىڭ ىسكە قوسىلۋىمەن مەگاپوليستەگى تاۋىق جۇمىرتقاسىن وندىرەتىن كاسىپورىندار سانى تورتەۋگە جەتتى. قازىرگە دەيىن شاھارداعى ءۇش قۇس فابريكاسى – «تاسساي قۇس», «كازكوم» جانە «شىمكەنت قۇس» جۇمىرتقا ونىمىنە دەگەن سۇرانىستىڭ 50%-ىن قامتاماسىز ەتىپ كەلسە, نارىققا ەندى عانا قادام باسقان «ايمار قۇستىڭ» ونىمىمەن سۇرانىستى قاناعاتتاندىرۋ كورسەتكىشى 70%-عا ۇلعاياتىن بولادى. ارينە, مۇنى مەملەكەتتىڭ باستى ستراتەگياسى سانالاتىن ازىق-ت ۇلىك قاۋىپسىزدىگىن قامتاماسىز ەتۋدەگى ەڭ ۇلكەن جەتىستىكتىڭ ءبىرى دەپ باعالاعان ءجون. باسقارما وكىلىنىڭ ايتۋىنشا, ۇكىمەت وسى باعىتتاعى جۇمىستاردى شيراتا تۇسكەن. سونىڭ ناتيجەسىندە جىل سايىن اگروونەركاسىپ كەشەنىندەگى جوبالار مەن ولارعا جۇمسالاتىن ينۆەستيتسيا كولەمى دە ارتىپ كەلەدى. ماسەلەن, بيىل «ايمار قۇس» قۇس فابريكاسىمەن بىرگە مەگاپوليستە تاعى 6 جوبا ىسكە اسىرىلماق.
«ايمار قۇس» ءبىرىنشى قاجەتتىلىكتەگى الەۋمەتتىك ماڭىزى بار ازىق-ت ۇلىك ونىمدەرىن وندىرەتىن كاسىپورىن بولعاندىقتان, جەرگىلىكتى نارىقتاعى تاۋار باعاسىنىڭ تۇراقتىلىعىنا بەلگىلى ءبىر دەڭگەيدە اسەر ەتە الادى. سول سەبەپتى, قۇس فابريكاسى اكىمدىك تاراپىنان ارنايى تىزىمگە ەنگىزىلىپ, وعان «Shymkent» الەۋمەتتىك-كاسىپكەرلىك كورپوراتسياسى ارقىلى تۇراقتاندىرۋ قورىنان 250 ملن تەڭگە پايىزسىز اينالىم قاراجاتى بەرىلدى. بۇل كەلىسىمشارت نەگىزىندە قۇس فابريكاسى جەرگىلىكتى ءىرى ساۋدا جەلىسى دۇكەندەرىنە 1 جىل بويىنا باعاسى 50 تەڭگەدەن س1 ساناتقا جاتاتىن 5 ملن دانا جۇمىرتقا وتكىزۋگە مىندەتتەمە الدى. سونىمەن بىرگە كاسىپورىن تولىق قۋاتىنا ەنىپ بولعان سوڭ ينۆەستيتسيالىق سۋبسيديا باعدارلاماسىنا سايكەس قۇرال-جابدىقتاردى ساتىپ الۋعا كەتكەن شىعىننىڭ 40%-ى مەملەكەت تاراپىنان وتەلىپ, كومپانياعا كەرى قايتارىلاتىن بولادى.
«مەملەكەت كاسىپكەرلەرگە وتە جاقسى جاعداي جاساپ وتىر. ونىڭ ەڭ باستىسى – قارجىلاي كورسەتىلەتىن قولداۋلار. وسىنداي كومەكتىڭ ناتيجەسىندە قانشاما كومپانيا جوبالارىن ىسكە اسىراتىن يۆەستيتسيالىق قاراجات تاۋىپ, اياققا تۇرىپ كەتىپ جاتىر. ەندىگى ماقسات – نارىقتى قاجەتتى ازىق-ت ۇلىكپەن قامتاماسىز ەتىپ, ەكسپورتتىق الەۋەتتى ۇلعايتۋ. وعان ەلىمىزدىڭ كليماتى مەن جەر جاعدايى تولىق مۇمكىندىك بەرەدى», دەيدى ءومىربي ءسابيت ۇلى.
شىمكەنت
