اقپان ايىندا كەنەدەن كەلەتىن كەسەلدىڭ الدىن الىپ, سانيتارلىق-پروفيلاكتيكالىق ءىس-شارالاردى ۇيىمداستىرۋدى جۇيەلەيتىن وبلىس اكىمىنىڭ قاۋلىسى قابىلداندى. سوعان سايكەس كەنەگە قارسى جۇمىستاردىڭ ساپاسى مەن تيىمدىلىگىن باقىلايتىن ارنايى جۇمىس توپتارى قۇرىلىپ, ايماقتاعى 115 قولايسىز ەلدى مەكەندەر تىزبەسى بەكىتىلدى. ولاردىڭ اراسىندا جاڭاقورعان مەن شيەلى اۋدانىندا وسىنداي اۋىلدار كوپ بولىپ تۇر.
«جىل سايىن بارلىق قولايسىز ەلدى مەكەندە كەنەگە قارسى وڭدەۋ شارالارى ەكى كەزەڭ اياسىندا جۇزەگە اسىرىلىپ كەلەدى. بيىل بۇل جۇمىس ءساۋىر ايىنىڭ العاشقى ونكۇندىگىندە شيەلى, جاڭاقورعان اۋداندارىنان باستالادى دەپ جوسپارلانىپ وتىر», دەيدى وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى دينارا جاڭابەرگەنوۆا.
ماماندار بىلتىر وبلىس بويىنشا ەپيدەميولوگيالىق احۋال قولايسىز بولعانىن ايتادى. وبلىستىڭ 13 تۇرعىنى كونگو-قىرىم دەرتىنە شالدىعىپ, ونىڭ ۇشەۋى كوز جۇمعان. ال بيىل جىل باسىنان بەرى 7 ادامدى كەنە شاعىپ, دارىگەرلەرگە جۇگىنىپتى.
وبلىستا اسا قاۋىپتى اۋرۋعا قارسى كۇرەس جۇمىستارىنا قورعانىس قۇرال جابدىقتار قورى جەتكىلىكتى. ەمدەۋ شارالارىنا قاجەتتى پرەپاراتتار مەن قان قورى دا بار. بىراق ەڭ دۇرىسى – ماماندار ايتقان ساقتىق شارالارىن ۇستانىپ ءجۇرۋ.
ۇلتتىق ساراپتاما ورتالىعىنىڭ وبلىستىق فيليالى دا كەنەدەن كەلەر كەسەلدىڭ جولىن كەسۋگە ۇلەس قوسادى. ولاردىڭ دەرەگىنشە بيىل ايماق بويىنشا 4 928 گەكتار جەرگە زالالسىزداندىرۋ جۇرگىزىلەدى.
«بۇگىندە كقگق-نىڭ تابيعي وشاقتارىندا ەنتومولوگيالىق زەرتتەۋ بارىسىندا 3 مىڭنان استام كەنە جينالىپ, 372 سىناما الىندى. ناتيجەسىندە, 4 سىنامادان وڭ ناتيجە انىقتالىپ, جۇقپالىعى 1,1 پايىز ەكەندىگى انىقتالدى», دەيدى ۇلتتىق ساراپتاما ورتالىعى وبلىستىق فيليالىنىڭ باسشىسى فاريدا قاليەۆا.
قىزىلوردا
