«بۇگىن كورنەكتى مەملەكەت جانە قوعام قايراتكەرى, پارلامەنت سەناتىنىڭ العاشقى توراعاسى ومىربەك بايگەلدى ومىردەن ءوتتى. وسىعان وراي اعامىزدىڭ وتباسىنا ارنايى بارىپ, جارى ءمانسيا اپايعا جانە جاقىندارىنا كوڭىل ايتىپ شىقتىق.
ومىربەك بايگەلدى ۇلى – ەگەمەن ەلىمىزدىڭ ەڭسە تىكتەپ, ىرگە بەكىتۋىنە زور ەڭبەك سىڭىرگەن تۇلعا. ازاتتىق العان كەزەڭدە ءوزى تۋعان جامبىل وبلىسىنىڭ العاشقى اكىمى بولىپ, ءوڭىردىڭ دامۋى جولىندا ايقىن قولتاڭباسىن قالدىردى.
1995 جىلى سەنات دەپۋتاتى رەتىندە سايلانىپ, تاۋەلسىز قازاقستان تاريحىندا پارلامەنت سەناتىنىڭ العاشقى توراعاسى بولدى. وسىلايشا, ۇلتتىق پارلامەنتاريزمنىڭ قالىپتاسۋىنا ۇلكەن ۇلەس قوستى.
ومىربەك بايگەلدى ۇلى بۇدان بولەك تاعى ءۇش شاقىرىلىمدا سەناتور بولىپ, ۇلتقا قىزمەت ەتۋدىڭ وزىق ۇلگىسىن كورسەتتى. قىزمەتتەن كەيىن دە سەناتورلار كەڭەسىنىڭ مۇشەسى رەتىندە پالاتا جۇمىسىنا, جالپى ەل ومىرىنە بەلسەندى ارالاسىپ كەلدى. اعامىزدىڭ عيبراتتى عۇمىرى قاشاندا كوپكە ۇلگى, ۇرپاققا ونەگە بولىپ قالا بەرەدى. ونىڭ جارقىن بەينەسى ءاردايىم ءبىزدىڭ جادىمىزدا ساقتالادى», دەلىنگەن جازبادا.
ەسكە سالايىق, بۇعان دەيىن ءبىز سەناتتىڭ العاشقى توراعاسى ومىردەن وتكەنىن حابارلاعان ەدىك. پرەزيدەنت اسا كورنەكتى مەملەكەت جانە قوعام قايراتكەرى, پارلامەنت سەناتىنىڭ تۇڭعىش توراعاسى, «وتان» وردەنىنىڭ يەگەرى, اكادەميك ومىربەك بايگەلدى ۇلىنىڭ دۇنيەدەن وتۋىنە بايلانىستى ونىڭ وتباسى مەن جاقىن تۋىستارىنا كوڭىل ايتتى.
