اۋماقتىق برەندينگ – ايماقتىڭ تاريحي ەرەكشەلىگى مەن زاماناۋي دامۋىن ەسكەرە وتىرىپ, وڭ اسەر قالىپتاستىرۋ ارقىلى ءيميدجدى ماقساتتى تۇردە جاساۋ. ياعني بۇكىل ەلدىڭ ءيميدجى جالپى ايماقتىق برەندينگتىڭ تابىستى بولۋىنا بايلانىستى.
مەملەكەتتىك نىشانداردى جەتىلدىرۋ قاجەتتىلىگى بىرنەشە سەبەپپەن بايلانىستى. بىرىنشىدەن, اۋماقتىق گەرالديكانى قالىپتاستىرۋ ۇدەرىسىندە رەسمي اتريبۋتيكانى ازىرلەۋدىڭ ارتۋى. 20 وبلىس, قالا, ءىرى ەلدى مەكەندەردىڭ ءوز رەسمي بەلگىسى بار. ياعني گەرالديكا ماسەلەسى ماماندار مەن كاسىبي دايىندىعى بار گەرالديستەردى تارتپاي ءوز بەتىنشە شەشىلە باستادى. بۇل گەرالديكا نەگىزدەرى مەن ەرەجەلەرىنەن اۋىتقۋعا اكەلدى. تاڭبالاردىڭ قايتالانۋى نەمەسە تۇسىنۋگە قيىن بولۋى گەرالديكالىق جانە لوگيكالىق قاتەگە سوقتىرادى. ال بۇل ءىس جۇزىندە گەرالديكالىق بەلگىلەردىڭ ءرولى مەن ماقساتىن قابىلداۋدى جانە ءتۇسىنۋدى قيىنداتىپ وتىر. وكىنىشكە قاراي, بيلىك ۇسىنعان ايماقتىق نىشاندارعا حالىقتىڭ نارازى بولعانىن بىلەمىز.
ەكىنشىدەن, كۆازيمەملەكەتتىك جانە كاسىپكەرلىك سەكتوردىڭ ءارتۇرلى سۋبەكتىلەرى دە مەملەكەتتىك نىشاندارعا سىلتەمە جاساي وتىرىپ, ءوز برەندتەرىن قالىپتاستىرادى. ولار وزدەرىنىڭ نىشاندارىن جاساۋدا ەش شەكتەلمەي, يميدج جانە مەملەكەت ءۇشىن بەلگىلى ءبىر تاۋەكەلدەر دە تۋدىرۋى مۇمكىن.
ۇشىنشىدەن, جەرگىلىكتى دەڭگەيدەگى مەملەكەتتىك نىشاندار اۋماقتىڭ (وبلىس, قالا, اۋدان, اۋىل) برەندىنە نەگىزدەلۋى, ءوزارا بايلانىستى بولۋى كەرەك. ياعني وبلىستىڭ نەمەسە قالانىڭ گەرالديكالىق ديزاينىندا ءبىرتۇتاس ۆيزۋالدى قاتار جاسالۋى قاجەت. الەمدىك تاجىريبەدە قالا برەندينگىنىڭ امستەردام, نيۋ-يورك ىسپەتتى ءساتتى ۇلگىلەرى بار.
فرانتسۋز ايماقتارىنىڭ ەلتاڭبالارى
مىسالى, فرانتسۋز ايماقتارىنىڭ ەلتاڭبالارى ءبىرتۇتاس فورمادا جاسالىپ, فرانتسيانىڭ تۋى مەن ەلتاڭباسىنىڭ تۇستەرىمەن ۇيلەسەتىن ءۇش تۇسكە (كوك, سارى, قىزىل) ايقىن باسىمدىق بەرىلگەن.
ۇلتتىق برەندتىڭ قالىپتاسۋى ءبىر ستيلدە جانە ورتاق ستاندارتتا جۇرۋگە ءتيىس. نىشاندار بىرەگەي ۇلتتىق كودىمىزدى ناقتى جانە ايقىن كورسەتۋى كەرەك. سول سياقتى, جەرگىلىكتى دەڭگەيدە برەندتەر مەن رامىزدەردى قالىپتاستىرۋ ماڭىزدى.
قازاقستان ايماقتارىنىڭ ەلتاڭبالارى
بۇگىندە كوپتەگەن وڭىرلىك اتريبۋتتىڭ ەڭ قاراپايىم تالاپتار مەن قاعيدالارعا سايكەس كەلمەيتىنىن كورىپ ءجۇرمىز. ولار ءپىشىنى مەن مازمۇنى جاعىنان قاتتى تۇرلەنىپ, ايماقتىڭ ەرەكشەلىكتەرىن, ونىڭ تاريحى مەن مادەنيەتىن كورسەتپەيدى.
وعان قوسا, بىرقاتار ورتالىق مەملەكەتتىك ورگاندار مەن جەرگىلىكتى اتقارۋشى ورگاندار لوگوتيپىندە كەڭەستىك ەلەمەنتتەر بار, ولار قازىرگى سەمانتيكالىق كەڭىستىك پەن بۇگىنگى كۇننىڭ ءمانىن كورسەتپەيدى. سونىمەن قاتار مۇنداي لوگولار ساباقتاستىق قاعيداتىن جانە بەلگىلى ءبىر باعىتتاعى باي ۇلتتىق تاريحتى ەلەمەي, تەك كەڭەستىك كەزەڭنىڭ تاريحىمەن بايلانىستى قالىپتاستىرادى.
سوندىقتان بۇل سالادا جان-جاقتى تالداۋ جۇرگىزىپ, ورتاق تاسىلدەر ازىرلەۋ قاجەت. ياعني ايماقتىق نىشانداردى ازىرلەۋ جانە بەكىتۋ جۇيەسىن بارلىق ءوڭىر ءۇشىن بىركەلكى ەتە وتىرىپ, وڭتايلاندىرۋ قاجەت. وسى ورايدا, ءتۇس پەن پىشىنگە قاتىستى ماسەلەلەردى دە پىسىقتاۋ ماڭىزدى. ويتكەنى گەرالديكادا ءتۇس ماڭىزدى ءرول اتقارادى. قازاق تانىمىنداعى بەلگىلەردىڭ نەگىزگى تۇستەرى – كوك جانە التىن (سارى). التىن ءتۇس بايلىقتى, ادىلدىكتى جانە جومارتتىقتى بىلدىرسە, كوك ءتۇس بەيبىتشىلىك پەن وركەندەۋدى بىلدىرەدى.
ايماقتاردىڭ كوپشىلىگىندە وبلىستاردىڭ تاڭبالارى قازاقتىڭ شەڭبەر ءپىشىندى – قالقان ءتارىزدى بولىپ كەلەدى. سول سەبەپتى, بارلىق وبلىستىڭ تاڭبالارىنىڭ ءپىشىنىن ءبىر جۇيەگە كەلتىرۋدىڭ ءمانى بار. بۇل رەتتە تاڭبادا ولكەنىڭ, ەلدىڭ تاريحى جايلى مالىمەتتەر قامتىلۋى كەرەك. ايماقتىق اتريبۋتتاردا كورسەتىلگەن بەلگىلەردىڭ مەملەكەتتىك نىشاندارعا جانە بۇكىل ەلدىڭ تاريحىنا قاتىستى سىلتەمەسى بولۋعا ءتيىس. سونىمەن بىرگە وڭىرلىك ەلتاڭبا ءوز ايماعىنىڭ بىرەگەيلىگى مەن دامۋ بولاشاعىن كورسەتۋى قاجەت. ويتكەنى ەلتاڭبا – وڭىرلىك بىرەگەيلىكتەن ۇلتتىق بىرەگەيلىكتى قالىپتاستىرۋعا ىقپال ەتەتىن رامىزدىك نىسان.
بۇرىن ايتىلعانداي, ايماقتىڭ سيمۆوليكاسى ءوڭىردىڭ برەندينگىمەن بايلانىستى بولۋى قاجەت. بۇعان وڭ ءيميدجدى قالىپتاستىراتىن, مەملەكەتتىك جانە بيزنەس سەكتور پايدالاناتىن اۋماقتىڭ سيمۆولىن تاڭداۋ كىرەدى.
بيزنەس قاۋىمداستىق, كاسىپورىندار, ونەركاسىپتىك ءوندىرىس جانە باسقا دا ءىرى تاۋار وندىرۋشىلەر مەن كرەاتيۆتى يندۋستريا ۇيىمدارى وزدەرىنىڭ اتريبۋتتارىندا ايماقتىق جانە مەملەكەتتىك نىشاندارمەن ۇيلەسىمدىلىك قاعيداتىن ساقتاۋعا ءتيىس. الداعى ۋاقىتتا ول ءۇشىن مادەنيەت ماماندارى, سۋرەتشىلەر, تاريحشىلار مەن جەرگىلىكتى قاۋىمداستىقتى تالقىلاۋعا تارتۋ ماڭىزدى بولماق.
تاسىم ريززات,
ققدي قوعامدىق ۇردىستەردى زەرتتەۋ ورتالىعىنىڭ باسشىسى
