ءبىرىنشى وقىلىمدا دەپۋتاتتاردىڭ قاراۋىنا مەملەكەت باسشىسىنىڭ 2022 جىلعى 1 قىركۇيەكتەگى تاپسىرماسىمەن ازىرلەنگەن «مەملەكەتتىك ساتىپ الۋ تۋرالى» ۇكىمەتتىك زاڭ جوباسىن قاراۋ ۇسىنىلادى.
جاڭا زاڭ جوباسىندا مەردىگەرلەرگە, اسىرەسە قۇرىلىسقا بايلانىستى جۇمىستارعا قوعامدىق مونيتورينگ ەنگىزۋ كوزدەلگەن. وسىعان وراي مەملەكەتتىك ساتىپ الۋ ۆەب-پورتالىندا ولاردىڭ ورىندالۋى جونىندەگى ەسەپتەردى راستاي وتىرىپ (ونىڭ ىشىندە فوتو-, بەينەتىركەۋدى پايدالانۋ), جۇمىستاردى ورىنداۋ كەستەلەرىن جالپى قولجەتىمدى ەتىپ ورنالاستىرۋ, سونداي-اق قوعامدىق باقىلاۋ سۋبەكتىلەرىنىڭ مەملەكەتتىك ساتىپ الۋ شارتتارىنىڭ ورىندالۋىنا مونيتورينگتى جۇزەگە اسىرۋى ۇسىنىلادى.
وتاندىق وندىرۋشىلەردى قولداۋ ماقساتىندا ساتىپ الۋ شاعىن جانە ورتا كاسىپكەرلىك سۋبەكتىلەرى اراسىندا جۇزەگە اسىرىلاتىن تاۋارلاردىڭ, جۇمىستاردىڭ, كورسەتىلەتىن قىزمەتتەردىڭ تىزبەسىن ەنگىزۋ ۇسىنىلادى. بۇدان باسقا, اقپاراتتىق جۇيەلەردىڭ دەرەكتەرى مەن مالىمەتتەرى نەگىزىندە ۆەب-پورتال قالىپتاستىراتىن الەۋەتتى ءونىم بەرۋشىلەردىڭ رەيتينگى ەنگىزىلەدى. سونداي-اق مەملەكەتتىك ساتىپ الۋدى جۇزەگە اسىرۋ مەرزىمىن 2 ايدان 1 ايعا دەيىن قىسقارتۋ, ءبىر كوزدەن الۋ تاسىلىمەن ساتىپ الۋ ءۇشىن نەگىزدەر سانىن وڭتايلاندىرۋ كوزدەلەدى.
جالپى وتىرىستىڭ كۇن ءتارتىبىنىڭ جوباسىنا ءبىرىنشى وقىلىمدا ۇكىمەت ازىرلەگەن «جىلۋ ەنەرگەتيكاسى تۋرالى» جانە وعان ىلەسپە تۇزەتۋلەرى بار زاڭ جوبالار ەنگىزىلدى. ولار جىلۋ ەنەرگەتيكاسى سالاسىن رەتتەۋ جانە ونىڭ سەنىمدى جانە ۇزدىكسىز جۇمىس ىستەۋىن قامتاماسىز ەتۋ ءۇشىن ەكونوميكالىق جانە قۇقىقتىق نەگىزدەردى بەلگىلەيدى. باعالاردى (تاريفتەردى), جىلۋ ەنەرگياسى مەن جىلۋ تاسىمالداعىشتاردى مىندەتتى ەسەپكە الۋ جونىندەگى نورمالاردى, سونداي-اق ەنەرگيا ۇنەمدەۋگە جانە ەنەرگيا تيىمدىلىگىن ارتتىرۋعا قويىلاتىن تالاپتاردى مەملەكەتتىك رەتتەۋ ەنگىزىلەدى.
