قازاقستان مۇسىلماندارى ءدىني باسقارماسى شىمكەنت قالاسى وكىلدىگىندە مۇنداي ىزگى امال – جىل سايىن ءاربىر ورازا ايىندا بولىپ تۇراتىن قايىرىمدى ءىس-شارا. مەگاپوليستىڭ باس يمامى باعداۋلەت ءابدىراحمانوۆتىڭ ايتۋىنشا, ءدىني باسقارما جاعدايى تومەن ازاماتتارعا, كوپبالالى وتباسىلارعا, مۇگەدەكتىگى بار جاندارعا قولدان كەلگەنشە كومەكتەسىپ كەلەدى.
«كومەككە مۇقتاج كىسىلەردەن سۇرانارىمىز, ازىق-ت ۇلىك قورجىنىن قۇر الىپ قويماي, ءپىتىر ساداقاسىن بەرگەن قايىرىمدى جاندارعا دا دۇعا-تىلەكتەرىن ارناپ قويسا ەكەن. يسلامدا ءاردايىم الاعان قولدان بەرەگەن قول جوعارى تۇرادى. بۇل جونىندە ارداقتى پايعامبارىمىز مۇحاممەد عالەيھي سالام دا ءوز حاديسىندە ايتىپ وتكەن. وسى ورايدا ءبىز دە وسى جەرگە الاقان جايىپ كەلگەن ادامداردىڭ ۇرپاعىنان كەلەشەكتە ساداقا الۋشى ەمەس, بەرۋشى جانداردىڭ شىعۋىن ءناسىپ ەتۋىن اللادان شىن جۇرەكتەن سۇرايمىز», دەدى ب.ءابدىراحمانوۆ.
بىزگە بەرگەن سۇحباتىندا يمام زەكەت مالىن شىعارۋعا شاماسى كەلەتىن ءاربىر ادام ءپىتىر ساداقاسىن بەرۋگە مىندەتتى ەكەنىن جەتكىزدى. ال شاماسى كەلمەيتىن جانداردىڭ ءپىتىر ساداقاسى شاريعات تۇرعىسىنان سۇننەت امال بوپ سانالادى. ياعني ءپىتىر ۇلەستىرىپ قايىرىمدىلىق جاساسا, ساۋاپ الادى, بولماسا وعان ەشقانداي كۇنا جازىلمايدى. رامازان ايىندا ەڭ ءبىرىنشى قاجەت بولعان جاقسى امال – وسى ءپىتىر ساداقاسى. مۇمكىن بولعانشا ءار ادام ءوزىنىڭ جاعدايى تومەن تۋىسقانىنا, كورشى-قولاڭ, جاقىن ارالاساتىن جاندارىنا كومەك قولىن سوزىپ, سىيلىق ۇسىنعانى ابزال.
يمامنىڭ ايتۋىنشا, بۇگىنگى تاڭدا ءپىتىر ساداقاسىنىڭ قۇنى ەكى كيلو بيدايدىڭ باعاسىنا تەڭ. دەگەنمەن اسىل شاريعاتىمىزدا ونى ازىق-ت ۇلىك تۇرىندە دە تاراتۋعا بولادى. ول ازىققا ارپا, بيداي, قۇرما, مەيىز كىرەدى. وتباسىداعى ءاربىر ادامنىڭ اتىنان وسى داقىلداردىڭ شامامەن 3 كيلوداي مولشەرىندە جان ساداقاسى, ياعني ءپىتىر ساداقاسى بەرىلۋى ءتيىس. سوندىقتان ساداقانى اقشالاي عانا ەمەس, ازىق-ت ۇلىك ەسەبىندە دە بەرسە, ساۋابى ەش وزگەرمەيدى.
سونىمەن بىرگە زەكەت مالى دا قاسيەتتى ورازا ايىندا تاراتىلسا, ساۋابى مولىراق بولادى. ال جالپى مۇسىلمانشىلىقتاعى بەس پارىزدىڭ بىرىنە كىرەتىن بۇل ساداقا جىل ون ەكى اي ۇلەستىرىلەدى. باليعات جاسىنا جەتكەن, اقىل-ەسى ءبۇتىن, دۇنيە-مۇلكى نيساپ مولشەرىنە ساي, ياعني 85 گرامم التىنعا تەڭ قاراجاتى, اقشالاي ەسەپتەگەندە شامامەن 1,4 ملن تەڭگەسى بولسا, مىنە وسىنداي ازاماتتارعا زەكەت مالىن شىعارۋ پارىز بولادى. ايتقانداي, بۇل مولشەردەگى قاراجات مۇسىلمان جاننىڭ يەلىگىندە, اينالىمىندا ءبىر جىل بويى ءجۇرۋى كەرەك. ويتكەنى يمام مالىمدەگەندەي, بۇگىنگى تاڭدا كوپشىلىك ازاماتتىڭ دەپوزيتىندە ءۇي الۋعا سالىمدارى بار. ەگەر ولاردىڭ باسىندا ەشقانداي باسپانا بولماسا, زەكەت بەرۋ پارىز بولمايدى, كەرىسىنشە قوسىمشا ءۇي الۋعا ارەكەت جاساعان بولسا, زەكەت مالىن ونداي كىسىلەرگە مىندەت بوپ جۇكتەلەدى. سونداي-اق يسلامدا ءتورت ت ۇلىك مالدىڭ دا زەكەتى بار. قىرىق قويدان ءبىر قوي, 27 سيىردان ءبىر تانا زەكەت مالىنا كىرەدى.
شىمكەنت
