جەرگىلىكتى اتقارۋشى ورگان وكىلدەرى شىعىس قازاقستاننىڭ اۋداندارىندا الدىن الۋ ءىس-شارالارى جۇمىستارىن كۇشەيتتى. جالپى ۇزىندىعى 365,8 كم 427 ارىق, 133,4 كم 71 سۋ كانالى, اۆتوموبيل جولدارىندا 3 552 جانە تەمىرجول جولدارىندا 90 سۋ وتكىزۋ قۇرىلىسى, سونداي-اق 447 كوپىردىڭ استى قاردان تازارتىلدى. كولەمى 365 مىڭ تەكشە مەتردەن اسا قار شىعارىلدى.
دەسە دە, تارباعاتاي اۋدانىندا ەرىگەن قار سۋى جول ۇستىنە شىعىپ كەتىپ, كولىكتەردىڭ قاتىناۋىنا قيىندىق تۋعىزىپ جاتىر. دالىرەك ايتساق, قالباتاۋ – مايقاپشاعاي رەسپۋبليكالىق تاسجولىنىڭ 1 113-شاقىرىمىندا قارعىن سۋ جولعا جايىلعان. ەنى 300 م-ءدى باسسا, تەرەڭدىگى 5-10 سم. «قازاۆتوجول» قىزمەتكەرلەرىنىڭ ايتۋىنشا, بۇل ۋچاسكەدە ءبىر عانا سۋ وتكىزگىش قۇبىر بار. قازىرگى ۋاقىتتا جولدى جاۋىپ, سۋدى بوگەۋ جۇمىستارى جۇرگىزىلىپ جاتىر. بۇل ءۇشىن 10 شاقتى جۇمىسشى, 8 بىرلىك ارنايى تەحنيكا قاۋىپتىڭ بەتىن قايتارىپ ءجۇر.
كوبىنەسە وزەن ارنالارىندا مۇز كەپتەلىپ, سۋ كوتەرىلىپ كەتىپ, ماڭايىنداعى اۋىلدارعا جايىلادى. سول ءۇشىن دە وڭىردەگى وزەندەردە 201 796 شارشى مەتر اۋماقتا مۇز جارۋ جۇمىستارى جۇرگىزىلدى. مۇزى تالقاندالىپ, ارناسى اشىلعان وزەندەردىڭ سۋى كوكتەمدە كوتەرىلگەنىمەن, كەڭىردەگىنەن شىعىپ, تاسىماۋعا ءتيىس. ال كۇرشىم اۋدانىنىڭ توپتەرەك اۋلىنا جەتە بەرىستەگى كوپىردى توسىننان كەلگەن تاسقىن سۋ بۇزىپ كەتىپ, اۋىل تۇرعىندارىمەن جول بايلانىسى ءۇزىلىپ قالعان. جەرگىلىكتى تۇرعىنداردىڭ ايتۋىنشا, بۇل كوپىردى ەكى جىلدا ءبىر سۋ شايىپ كەتەتىن كورىنەدى. اۋدان باسشىلىعى بۇل ماسەلەنى شەشۋ ءۇشىن جاڭا ءارى بەرىك كوپىر سالۋ كەرەكتىگىن ايتتى.
«مۇنداي ءۇش كوپىر بار. كۇن كۇرت جىلىپ, قارعىن سۋ ءبىر كوپىردى ءبۇلدىرىپ كەتتى. سۋ اعىزىپ كەتكەن كوپىر 2020 جىلى جوندەلگەن. ەندى اۋىل ادامدارىن قايىقپەن تاسىمالدايمىز. كەيىن سۋ ازايعان سوڭ, اينالما جول جاسايمىز. قالاي دەگەنمەن كوپىرلەردى جاڭارتۋىمىز كەرەك», دەيدى كۇرشىم اۋدانىنىڭ اكىمى المات اقىشەۆ.
شقو تجد قىزمەتكەرلەرى حالىقتى سۋ تاسقىنى كەزەڭىنە دايىنداۋ ماقساتىندا 149 ەلدى مەكەندە 270-تەن اسا رەيد جۇرگىزدى. ناتيجەسىندە, 20 مىڭنان اسا حالىققا ءتۇسىندىرۋ جۇمىسى جۇرگىزىلدى. الدا-جالدا قارعىن سۋ ءۇي-جايلارعا جايىلىپ كەتسە, تۇرعىنداردى ەۆاكۋاتسيالاۋ جوسپارى دا پىسىقتالعان. مامانداردىڭ ايتۋىنشا, جالپى سىيىمدىلىعى 17 مىڭ ادامنان اساتىن 153 ازاماتتى ۋاقىتشا ورنالاستىرۋ پۋنكتتەرى بەلگىلەنىپ قويدى.
قاۋىپ بار-اۋ دەگەن اۋداندارعا قوسىمشا كۇشتەر دە جۇمىلدىرىلدى. ماسەلەن, سۋ تاسقىنىنا قارسى جۇمىستارعا سەمەي قالاسىنان ارنايى كەلگەن تجم №68303 اسكەري ءبولىمىنىڭ قىزمەتكەرلەرى قارعىن سۋدىڭ الدىن الۋ ءۇشىن التاي اۋدانىندا جۇمىستار جۇرگىزىپ ءجۇر. ۇساق وزەندەردى ايتپاعاندا, التاي اۋدانىن ءتىلىپ اعىپ جاتقان بۇقتىرما, تۇرعىسىن وزەندەرى بار. ونىڭ ۇستىنە قار قالىڭ تۇسكەن ءوڭىر. سول ءۇشىن دە قوسىمشا كۇش سالىنىپ وتىر. التاي اۋدانى عانا ەمەس, وزەن-كولدەر بويىنداعى اۋدانداردىڭ بارلىعىندا جۇمىس كۇشەيتىلگەن.
شىعىس قازاقستان وبلىسى
