اكە مۇراسىن ناسيحاتتاعان

97 جاسىنا دەيىن جۇرتشى­لىق­قا ەل اناسى دەڭگەيىندە اق باتاسىن بەرىپ, اكەسى ءدىن عۇلاما­سى سادۋاقاس قاجى عىلمانيدىڭ كوپ ەڭبەگىن جادىندا جاڭعىرتىپ, ناسيحاتتاعان ۇكىجان ء(مۇمينا) سادۋاقاسقىزىنىڭ «فوليانت» باسپاسىنان (استانا) شىققان «ومىرىمنەن ەسكەرتكىش» اتتى مۇراسىنىڭ تۇساۋكەسەرى ءوتتى. 40 باسپا تاباق ەڭبەك ايگىلى قازي پەرزەنتىنىڭ 11 داپتەرى نەگىزىن­دە دايىندالعان. قۇراستىرىپ, العىسوزىن جازعان – فيلولوگيا عىلىمدارىنىڭ كانديداتى, وسى ۋنيۆەرسيتەتتىڭ دوتسەنتى گۇلبايرا وتەلباي. اپامىز قايتارىنان ءبىر جىل بۇرىن قولجازبالا­رىن وسى كىسىگە اماناتتاپ كەتكەن ەكەن. كىتاپتىڭ دەمەۋشىسى – ىسكەر ازامات, قايراتكەر ەرلان بارلىباەۆ.

سادۋاقاس عىلماني – ەلىمىز­دىڭ ايتۋلى ءدىن عۇلاماسى, وت­كەن عاسىردىڭ 20–30-جىلدارى كوز­­قاراسى مەن سەنىمى ءۇشىن قۋدا­لانعان تۇلعا, 1952–1972 جىلدارى قازاقستان قازياتىن باسقارعان قايراتكەر, اۋدارماشى. سوڭىندا قالعان كوپ مۇراسى ءالى تولىق كىتاپ بولىپ شىقپاعان. ءبىر عانا 108 مىڭ سوزدەن تۇراتىن اراب­شا-قازاقشا سوزدىگى سول كۇيىندە قوزعالماي تۇر.

«ومىرىمنەن ەسكەرتكىش» قاي­سار قازاق قىزىنىڭ اتەيزم داۋى­رىندە اكە وسيەتىنە ادالدىعىن, ەڭبەكقورلىعى مەن پاراساتىن, ەڭ باستىسى ءۇزىلىسسىز رۋحاني مۇ­رانى قۇنتتاۋىن, ۇنەمى ءدىن مەن ءداستۇر ۇيلەسىمىن ناسيحاتتاعا­نىن دالەلدەيدى. كىتاپ مۇراتانۋ, ءدىنتانۋ, ولكەتانۋ ماماندارىنا, رۋحانيات تاريحىنا قىزىققان قاۋىمعا ارنالعان.

كىتاپتىڭ تانىستىرىلىمىن كىتاپحانا ديرەكتورى, دوتسەنت باقىتجان ورازاليەۆ اشىپ, پروفەسسور سەرىك نەگيموۆ, كىتاپتى ازىرلەگەن دوتسەنت گۇلبايرا وتەلباي, قوعام قايراتكەرلەرى, ولكەتانۋشىلار ومىرسەرىك ەر­جانوۆ, ماناپ ابدىرەشوۆ, ەل انالارى بالاپان ايتباەۆا, ءموربان جيەنبەكوۆا, ۇكىجان اپانىڭ ۇلى سامات كارىموۆ پىكىرىن ورتاعا سالدى. جيىندى قازاق ادەبيەتى كافەدراسىنىڭ مەڭگەرۋشىسى, الاش ۇرپاعى, عالىم قايىربەك كەمەڭگەر جۇرگىزدى.

وسى ءىس-شارامەن قاتار ءدىن­­تا­نۋ­شى, تاريحشى, فيلولوگ, ما­دە­نيەتتانۋشى ستۋ­دەنت-ما­گيست­رانتتارعا ارنالعان «اكە مۇ­را­سىن ناسيحاتتاۋعا ارنال­عان عۇمىر» اتتى شەبەرلىك سى­نىبى ءوتتى. مۇندا ۇكىجان سا­دۋا­قاسقىزى جيناعان ەڭبەك­تەر­­دىڭ ءمان-ماعىناسى مەن ماتىن­دىك ەرەكشەلىكتەرى تالداندى. مۇنى ءدىنتانۋ كافەدراسىنىڭ دوتسەنتى كەڭشىلىك تيىشحان مەن جاستار دەپارتامەنتىنىڭ ديرەكتورى, مادەنيەتتانۋشى جامبىل تىلەپوۆ جۇرگىزدى. شەبەرلىك سىنىبى قورى­تىندىسىنا سايكەس ءبىلىم الۋشى­لار «ومى­رىمنەن ەسكەرت­كىش» مۇرا-كىتابى تۋرالى ەسسە جازباق.

جالپى, تاعىلىمدى ءىس-شارا­نىڭ مازمۇنى اعا بۋىنعا دا, جاس­تارعا دا ۇنادى.

مۇراتبەك ءدارىباي,

ءدىنتانۋشى