ماسەلەن, پارتيانىڭ اقتوبە وبلىستىق فيليالىنىڭ توراعاسى ەربول داناعۇلوۆ, وبلىستىق ماسليحاتتاعى «Amanat» فراكتسياسىنىڭ مۇشەلەرى سۋ باسقان اۋماقتارعا بارىپ, جاعدايدى باقىلاۋعا الدى. پارتيالىقتار توتەنشە جاعدايلار دەپارتامەنتىنىڭ قىزمەتكەرلەرى, اسكەري قۇرىلىمدار جانە پوليتسەيلەرمەن بىرگە كۇندىز-ءتۇنى جۇمىلا جۇمىس ىستەپ جاتىر. اماناتتىقتار كوشەلەرى مەن اۋلالارىن سۋ باسقان تۇرعىندارعا كومەك كورسەتىپ, سۋ بۇرۋ, قۇم توگۋ, جولداردى سۋدان تازارتۋ جۇمىسىنا اتسالىسىپ كەلەدى.
وبلىس ورتالىعىنداعى جاعدايمەن تانىسقاننان كەيىن قوبدا اۋدانىنا بارعان ەربول داناعۇلوۆ: «قار مەن مۇزدىڭ كۇرت ەرۋى جانە جاڭبىر ەلدى مەكەندەردەگى جاعدايدى قيىنداتىپ جىبەردى. قازىر اعىس باعىتىن بۇرۋ, بوگەۋ جۇمىسى جۇرگىزىلۋدە», دەيدى.
ايتا كەتەيىك, وڭىردەگى جاستار قاناتىنىڭ ەرىكتىلەرى بۇعان دەيىن تەمىر اۋدانىنىڭ ورتالىعى شۇبارقۇدىق كەنتىندە, مۇعالجار اۋدانىنىڭ ورتالىعى قاندىاعاش قالاسىندا بولىپ, جەرگىلىكتى تۇرعىندارعا كومەك كورسەتتى. جاستاردىڭ ءبىر لەگى بۇگىندە ءۇيىن سۋ باسقان اقتوبەلىكتەرگە قول ۇشىن سوزىپ ءجۇر.
ال قوستاناي وبلىسىندا «جاستار رۋحى» جاستار قاناتىنىڭ بەلسەندىلەرى ارقالىق قالاسىنىڭ اۋماعىندا سۋ تاسقىنىنان زارداپ شەككەن ەلدى مەكەندەرگە بارىپ, بىرنەشە كۇن قاتارىنان كومەك كورسەتىپ ءجۇر. ولار جەرگىلىكتى اتقارۋشى ورگاندارمەن جانە توتەنشە جاعدايلار قىزمەتىمەن بىرلەسىپ, تۇرعىنداردى قاۋىپسىز اۋماققا جەتكىزۋ, ەۆاكۋاتسيالانعان ادامدارعا ۋاقىتشا باسپانا تاۋىپ بەرۋ, قاجەتتى تۇرمىستىق زاتتارمەن قامتاماسىز ەتۋگە جاردەمدەسىپ كەلەدى. بۇعان قوسا, «جاستار رۋحىنىڭ» ۆولونتەرلەرى گۋمانيتارلىق كومەك جەتكىزۋگە دە كۇش سالىپ جاتىر. ەرىكتىلەر ازىق-ت ۇلىك, سۋ, ءدارى-دارمەك جانە باسقا دا قاجەتتى زاتتاردى جيناپ, كەيىن زارداپ شەككەندەرگە تاراتادى.
باتىس قازاقستان وبلىسىندا «اmanat»-تىڭ باستاۋىش پارتيا ۇيىمدارىنىڭ توراعالارى مەن مۇشەلەرى, پارتيا بەلسەندىلەرى ورال قالاسىندا, بايتەرەك, تاسقالا, تەرەكتى, قاراتوبە اۋداندارىندا سۋ تاسقىنىنان جاپا شەككەن تۇرعىندارعا كومەك كورسەتۋدە. «جاستار رۋحىنىڭ» بەلسەندىلەرى تاۋلىك بويى كەزەكشىلىكتە جۇرگەن توتەنشە جاعداي دەپارتامەنتى قىزمەتكەرلەرىنە ىستىق تاماق ۇلەستىردى. سونىمەن قاتار زارداپ شەككەن تۇرعىندارعا كومەك كورسەتۋ ماقساتىندا پارتيالاستار گۋمانيتارلىق كومەك جيناۋدا. بۇعان قوسا وبلىستىق, قالالىق ءماسليحات دەپۋتاتتارى پارتيانىڭ وڭىرلىك فيليالى جانىنان اشىلعان ەسەپشوتقا ماتەريالدىق كومەك رەتىندە قاراجات اۋدارىپ جاتىر. پارتيا فيليالدارىنىڭ قىزمەتكەرلەرى دە بىركۇندىك جالاقىلارىن اۋداردى. گۋمانيتارلىق كومەكتىڭ العاشقى لەگى قاراتوبە اۋدانىنا جول تارتتى. بۇل كومەك توتەنشە جاعداي رەجىمى جاريالانعان بارلىق اۋدانعا جەتكىزىلەدى.
اباي وبلىسىندا پارتيانىڭ وڭىرلىك فيليالىنىڭ, اۋماقتاق فيليالدارىنىڭ توراعالارى مەن اتقارۋشى حاتشىلارى, پارتيالىق باقىلاۋ كوميسسياسىنىڭ مۇشەلەرى, وبلىستىق, اۋداندىق ماسليحاتتاعى دەپۋتاتتىق فراكتسيا مۇشەلەرى, «جاستار رۋحىنىڭ» ەرىكتىلەرى سۋ باسقان اۋماقتاردا اتقارىلىپ جاتقان جۇمىستارعا بەلسەندى ارالاسىپ كەلەدى.
ايتا كەتەيىك, ايماقتاعى بىرنەشە اۋدان مەن سەمەي قالاسى ماڭىندا ايدىندارداعى سۋ دەڭگەيى كوتەرىلىپ, سالدارىنان كوپىرلەر مەن جولداردى, اۋلالاردى سۋ باستى. پارتيالىقتار تجد مەن ءىىد قىزمەتكەرلەرى, اسكەري قۇرىلىمدار, جەرگىلىكتى اتقارۋشى ورگان وكىلدەرىمەن بىرگە تاۋلىك بويى كەزەكشىلىك اتقارىپ ءجۇر. ولار قاپتاردى ينەرتتى ماتەريالدارمەن تولتىرىپ, بوگەت قويىپ ءجۇر. سۋ باسقان جول مەن كوشە, تۇرعىن ءۇي تۇسىنان ارىق قازۋ, سۋ بۇرۋ, سۋ سورعىزۋ, قۇم توسەۋ, بوگەت قويۋ جۇمىسى ءجۇرىپ جاتىر.
