تالاس اعايىن تويعا شاقىرعان. كەنجە ۇلىن ۇيلەندىرمەكشى. كوپتەن كۇتكەن, جۇرەكجاردى, اق تۇيەنىڭ قارنى جارىلعان قۋانىش. تىلەكتەس, نيەتتەس قىرۋار اعايىن بارىمىزدى كيىپ, بايلاۋىمىزدى تاعىپ, مەيرامحاناعا جينالدىق. بارلىعى توي يەلەرىنە قۇتتى بولسىن ايتىپ, تىلدەرى جەتكەنشە اق تىلەكتەرىن جاۋدىرىپ جاتىر. ايتپاقشى, بەلگىلەنگەن ۋاقىتتان ءبىر ساعات كەش كەلگەنبىز. جالعىز ءبىز ەمەس, ەلدىڭ ءبارى سولاي. ەرتە بارعاننان نە پايدا, حالىق ءبارىبىر كەش جينالادى. سۇيەككە ءسىڭىپ كەتكەن ادەت. ءتىپتى داۋاسى جوق دەرت دەرسىز. بۇل جولى دا سولاي بولدى. تىم ەرتە كەلگەندەر شارۋامىز بار ەدى, ءبىر اينالىپ سوعايىق دەسىپ كەتىپ تە جاتتى. سارىلىپ توسىپ, ساعىمىز سىنار بولعان سوڭ قاۋىمداسىپ تۇرعان جۇرت توي يەسىنىڭ تامىرىن باسىپ, ءمان-جايدى ءبىلىپ كەلسىن دەپ ەلشى جىبەرگەنبىز. الگى اعايىن وبلىس ورتالىعىنداعى ابىرويلى ءبىر مەكەمەدە جۇمىس ىستەيتىن ەدى, باسشىسى كەلمەي جاتىر ەكەن. ونسىز توي باستاۋ – ابەستىك. كۇتكەن دۇرىس.
سول توسقاننان ءۇش ساعات توستىق. دۇنيەدە كۇتكەننەن جامان نە بار؟! اسىرەسە داستارقاننىڭ ءۇستى ادال دامگە سىڭسىپ تۇرعاندا. «تويعا بارساڭ تويىپ باردى» ۇمىتىپ, تۇسكى اسىن ىشپەي شىققان ءبىز سياقتىلاردىڭ ىشتەرى ء«ان» سالا باستادى. ساعىزداي سوزىلىپ, جۇقارعان جۇيكە ءبىرجولا ۇزىلۋگە تاقاعاندا توي باستالدى-اۋ. ءسوزۋار شەشەندەر جوسىلتتى دەيسىڭ. جاتتاندى ءسوز, تاپ-تاۋرىن بولعان تىلەك. قۇستىڭ جۇمىرتقاسىنداي ءبىر-بىرىنەن اۋمايدى. دەمالىپ قايتامىز دەگەن قاراقان باسىمىز قالجىراپ, قاجىپ شىقتىق.
ءىڭىر قاراڭعىسىن جامىلىپ كەلە جاتىپ ويىما الەۋمەتتىك جەلىدەن كورگەن ءبىر بەينە ورالعانى. الدە قىتاي, الدە جاپون ازاماتى ەتىك تىگىپ وتىر. ابدەن ماشىقتانىپ العان بولۋى كەرەك, قولى قولىنا جۇقپايدى. جۇپ-جۇمساق بىلعارىنى قالىپقا كيگىزىپ, قىلپىلداپ تۇرعان كەزدىگىمەن ارتىعىن كەسىپ الا قويادى دا, سارت ەتكىزىپ ۇلتاندى جاپسىرادى. شەبەردىڭ شەگەلەگەنىنە قىزىقتىم. كوز ىلەسپەيدى. بايانداپ تۇرعان ادامنىڭ ايتۋىنا قاراعاندا, ءبىر ساعاتتىڭ ىشىندە ءبىر جۇپ ەتىك تىگەدى ەكەن. نەتكەن جىلدامدىق, قارقىنى قاتتى-اق. بەل جازباي جۇمىس ىستەسە, كۇنىنە ون جۇپ ەتىكتى وپ-وڭاي تىگىپ تاستايتىن ءتۇرى بار. ەندى ەسەپتەۋگە كىرىستىم. قايران ۋاقىت قور بولعان جاڭاعى تويعا 250 ادام شاقىرىلعانبىز. ءۇش ساعات توستىق. كوبەيتسەڭ 750 ساعات ادام عۇمىرى بولىپ شىعادى. دەمالىس كۇنى دە ەمەس, جۇمىس كۇنى. قازىر ءبىزدىڭ كوكشەتاۋدا مەيرامحانالاردىڭ دەمالىس كۇندەرى بوس بولماۋى سەبەپتى ەل تويىن جۇمىس كۇندەرى جاساي بەرەتىن بولعان. الگى ەتىكشى ءتارىزدى ەرىنبەي ەڭبەك ەتسەك, 750 ساعاتتا 750 ەتىك تىگۋگە بولادى ەكەن. باسقا شارۋا دا سولاي.
ۋاقىتتىڭ قادىرىنە جەتىپ كورمەگەن بىزگە بوس ءسوز, بەرەكەسىز تىرلىك قىزىقتاۋ. الگى ويىمدى تويدان شىققان ساپارلاسىما ايتىپ ەدىم, وسىنىڭ ەسى دۇرىس پا دەگەندەي, بەتىمە ۇڭىلە قاراعانى.
– سوندا نە, ەلدىڭ ءبارى ەتىك تىگىپ كەتۋى كەرەك پە؟
– جوق, – دەدىم مەن, – سىراعىسىن ايتامىن دا.
بۇيىرىمە قادالعان ءبىرتۇرلى ويدى ءبىر ادامعا تۇسىندىرە الماعان جازعان باسىم جالپاق جۇرتقا قالاي ۇقتىرارمىن.
