فوتو: lada.kz
يمپورتتىق كولىكتەردىڭ باعاسى ەل ازاماتتارىنىڭ باسىم كوپشىلىگى ءۇشىن تىم قىمبات. وعان كەدەندىك باج سالىعى, كادەگە جاراتۋ جانە باستاپقى تىركەۋگە تولەنەتىن تولەمدەر سەبەپ بولىپ وتىر. بەكبول ورىنباساروۆ دەپۋتاتتىق ساۋالىندا ەلىمىزدىڭ كولىك پاركىن جاڭارتۋداعى تۇيتكىلدەرگە توقتالدى.
سەناتوردىڭ ايتۋىنشا, دەپۋتاتتارعا ازاماتتاردان كەدەندىك باج سالىعى, كادەگە جاراتۋ نورمالارى جانە باسقا ەلدەردەن اكەلىنەتىن كولىكتەردى تىركەۋ ماسەلەلەرىنە قاتىستى وتىنىشتەر ءجيى ءتۇسىپ تۇرادى. سەناتورلار ۇكىمەتكە بىرنەشە رەت دەپۋتاتتىق ساۋال جولداعانىمەن, ەكى تاراپتى دا قاناعاتتاندىراتىن ناقتى ەكونوميكالىق مىندەتتەر مەن عىلىمي تۇجىرىمدارعا نەگىزدەلگەن شەشىم ءالى ۇسىنىلمادى. ناتيجەسىندە قاراپايىم ازاماتتار ءۇشىن كولىك ساتىپ الۋ قولجەتىمسىز بولىپ كەتكەن.
وسى ورايدا سەناتور جەڭىلدەتىلگەن اۆتونەسيە باعدارلاماسى حالىقتى جاڭا كولىكتەرمەن قامتاماسىز ەتۋ ماقساتىنا جەتە الماعانىن ايتىپ, جاڭا ءارى ساپالى كولىكتەردىڭ جوقتىعى اۆتوكولىكتەردى زاڭسىز جولمەن تىركەۋ وقيعالارىنا سەبەپ بولعانىن العا تارتتى.
«قوزعالتقىش كولەمى ەكى مىڭ تەكشە سانتيمەترگە دەيىنگى, شىققانىنا ءۇش جىلدان اسپاعان اۆتوموبيلدەر ءۇشىن كادەگە جاراتۋ الىمىنىڭ مولشەرىن 150 000 تەڭگەدەن اسپايتىنداي ەتىپ قايتا قاراۋدى سۇرايمىن. كەدەندىك باجدى ەسەپتەۋ كەزىندە كەدەندىك توردى ازايتۋ جاعىنا قاراي قايتا قاراۋ كەرەك. اۆتوكولىكتەر قىتايدان قازاقستانعا قىرعىز رەسپۋبليكاسى ارقىلى اكەلىنەتىن فاكتىلەر تىم جيىلەپ كەتتى, ويتكەنى اۆتوكولىك يەلەرى ققس پەن باجدى ءبىزدىڭ مەملەكەتىمىزگە قاراعاندا بىرنەشە ەسە از تولەيدى. شىعارىلعان جىلىن قوسا العاندا, بەس جىلعا دەيىن كولىك قۇرالدارىن مەملەكەتتىك تىركەگەنى ءۇشىن الىم مولشەرلەمەسىن 0,25 اەك كولەمىندە قاراستىرۋدى ۇسىنامىن. اتالعان ۇسىنىستار قازاقستان ازاماتتارىنا ساپالى جانە قولجەتىمدى اۆتوكولىك الۋعا مۇمكىندىك بەرەدى دەپ سەنەمىز», دەپ قورىتىندىلادى بەكبول ورىنباساروۆ.
قىرمىزى جۇماعاليقىزى,
ەۇۋ ستۋدەنتى
