جيىنعا دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ءبىلال ەردوعان, تۋريزم جانە سپورت ءمينيسترى ەرمەك مارجىقباەۆ, استانا قالاسىنىڭ اكىمى جەڭىس قاسىمبەك, ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ قاتىستى.
سالتاناتتى ءراسىمدى اشقان ءماجىلىس سپيكەرى جينالعان قاۋىمدى ۇلىستىڭ ۇلى كۇنى – ناۋرىز مەرەكەسىمەن قۇتتىقتاپ, دۇنيەجۇزىلىك كوشپەلىلەر ويىنى تۇركىتىلدەس حالىقتاردىڭ عانا ەمەس, الەمنىڭ نازارىن اۋدارعان بايراقتى باسەكە ەكەنىن اتاپ ءوتتى.
سونداي-اق ەرلان قوشانوۆ قازىرگى ۋاقىتتا ەلىمىزدە الەمدىك جارىسقا دايىندىق قارقىندى جۇرگىزىلىپ جاتقانىن ايتتى. «وسى ءدۇبىرلى جارىستى قازاقستاندا ابىرويمەن وتكىزۋ – بارشامىز ءۇشىن ۇلكەن مارتەبە, زور جاۋاپكەرشىلىك. مەملەكەت باسشىسى بۇل دودانى جوعارى دەڭگەيدە ۇيىمداستىرۋدى تاپسىردى. ءبىز كوشپەلىلەر ويىنىن ءسان-سالتاناتىمەن لايىقتى دەڭگەيدە وتكىزەمىز دەپ زور سەنىممەن ايتا الامىن. بۇل سايىس باۋىرلاس تۇركى حالىقتارى اراسىنداعى ءوزارا ىنتىماقتاستىق پەن مادەني قارىم-قاتىناستى ارتتىرۋعا تىڭ سەرپىن بەرەدى. ەلدەرىمىزدىڭ اراسىنداعى رۋحاني بايلانىستى ودان ءارى نىعايتا تۇسەدى دەپ سەنەمىن», دەدى ءماجىلىس سپيكەرى.
قازاقستاندا وتەتىن كوشپەلىلەر ويىنىنا الەمنىڭ 100 ەلىنەن وكىلدەر قاتىسادى دەپ كۇتىلىپ وتىر. قازىردىڭ وزىندە 60 ەلدىڭ كەلىسىمى بار. سپورتتىڭ 20 تۇرىنەن 4 مىڭعا جۋىق قاتىسۋشى سىنعا تۇسەدى. ۇلى دالا ءتوسىن دۇبىرگە بولەيتىن مەرەكە ءبىر اپتاعا سوزىلادى.
سالتاناتتى راسىمنەن سوڭ مەيماندار «ناۋرىز مەيرامى استانا 2024» قولونەرشىلەر جارمەڭكەسىن ارالاپ, ۇلىستىڭ ۇلى كۇنىنە ارنالعان مەرەكەلىك كونتسەرتتى تاماشالادى.
