فوتو: اسەل سابىرجانقىزىنىڭ جەكە ارحيۆىنەن
«اسسول» لاقاپ اتىمەن تانىمال سۋرەتشى كىلەمدەگى العاشقى سۋرەتىن كارانتين كەزىندە سالعانىن ايتتى.
«كىلەم بەتىنە سالىنعان ايەل بەينەسىن بۇرىن-سوڭدى ەشكىم كورمەگەن, سوندىقتان بۇل ونەر سۇيەر قاۋىمنىڭ كوڭىلىنەن شىعىپ, الەۋمەتتىك جەلى قولدانۋشىلارىنىڭ وڭ پىكىرىن جينادى», دەيدى كەيىپكەرىمىز.
سۋرەتشى اسەل داناگوي انالارىمىز بەن باتىر اپالارىمىزدىڭ بەينەسىن سالۋ ءۇشىن تۇركى حالىقتارىنىڭ ميفولوگياسىن, تاريحىن, حالىق ەرتەگىلەرى مەن داستۇرلەرىن زەرتتەگەنىن جاسىرمادى. سوندىقتان كىلەم بەتىنە تۇسكەن ءار بوياۋ, ءار سىزىق, ءار كەسكىن تاريحقا نەگىزدەلگەن دەپ ايتۋعا بولادى.
وتاندىق سۋرەتشىنىڭ 15 كىلەمنەن تۇراتىن توپتاماسى بار. ولاردا كوك ءبورى, ۇماي, ايبيكە باتىر, ساق پاتشايىمى, ءرابيا سۇلتان, بوپاي, ايعانىم, سۇيىمبيكە, گاۋھار باتىر, قۇرمانجان داتقا, ايتولقىن باتىر جانە باسقا دا ۇلى دالانىڭ كورنەكتى ايەلدەرىنىڭ وبرازدارى بەينەلەنگەن.
اسەل سابىرجانقىزى جاس بۋىن تاريحتا ءوز ءىزىن قالدىرعان ۇلى ايەلدەردى ەستە ساقتاپ, ءبىلۋى كەرەك دەپ سانايدى.
«قازاق ايەلدەرى مەملەكەتتى باسقاردى, ساياساتپەن اينالىستى, اعالارىمەن, كۇيەۋلەرىمەن جانە اكەلەرىمەن تەڭ دارەجەدە شايقاستى. كىلەمگە تۇسكەن كەز كەلگەن كەيىپكەر تۋرالى تىڭ دەرەك بار. سول دەرەكتەردى بارىنشا ساقتاۋىمىز كەرەك. قازاق ايەلدەرىنىڭ ەرەندىگى مەن ۇلەسى ەلەنىپ, ۇمىت بولماۋى قاجەت», دەيدى تىڭ تۋىندىلاردىڭ اۆتورى.
