قازاقستان ماگيسترانتتارى قىتايدا وقيدى

بىلتىر مەملەكەت باسشىسى قاسىم-جومارت توقاەۆتىڭ قىتاي حالىق رەسپۋبليكاسىنا رەسمي ساپارى بارىسىندا C.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى مەن كورشى ەلدەگى سولتۇستىك-باتىس اۋىل جانە ورمان شارۋاشىلىعى ۋنيۆەرسيتەتى (Northwest A&F University) اراسىندا قوس ديپلوم الا وتىرىپ, تاماق جانە قايتا وڭدەۋ ءوندىرىسىنىڭ تەحنولوگياسى سالاسىنداعى ماگيسترلىك باعدارلامانى بىرلەسىپ ازىرلەپ, ونىڭ ىسكە اسىرىلۋى تۋرالى كەلىسىمگە قول قويىلدى.

سوعان بايلانىستى ارداقتى اقىن, قوعام قايراتكەرى س.سەيفۋلليننىڭ ەسىمىن يەلەنگەن جوعارى وقۋ ورىندا ءبىزدىڭ ماگيسترانتتاردى قىتاي سولتۇستىك-باتىس اۋىل جانە ورمان شارۋاشىلىعى ۋنيۆەرسيتەتىنە وقۋعا قابىلداۋدىڭ سالتاناتتى ءىس-شاراسى ءوتتى.

ء«بىزدىڭ ماگيسترانتتار الەمدىك دەڭگەيگە سايكەس ءبىلىم الادى دەپ سەنىممەن ايتا الامىن. ءبىز بىرلەسكەن كۇش-جىگەر جۇمساپ, قوس ديپلومدى ءبىلىم الۋدى ىسكە اسىرعانىمىزعا قۋانىشتىمىز. بۇل – ءبىزدىڭ جاستارىمىزدىڭ يگىلىگى ءۇشىن جالعاساتىن بىرلەسكەن قىزمەتىمىزدىڭ باستاماسى عانا», دەدى قازاق اگروتەحنيكالىق زەرتتەۋ ۋنيۆەرسيتەتىنىڭ رەكتورى, اكادەميك قانات تىرەۋوۆ.

سونداي-اق قىتايداعى حاربين عىلىمي-زەرتتەۋ ۆەتەريناريالىق ينستيتۋتىمەن بىرلەسىپ قازاق اگروتەحنيكالىق زەرتتەۋ ۋنيۆەرسيتەتىندە قازاقستان-قىتاي بيولوگيالىق قاۋىپسىزدىك زەرتحاناسى قۇرىلدى. سونىمەن قاتار سولتۇستىك-باتىس, پەكين, شىڭجاڭ, حەنان ۋنيۆەرسيتەتتەرىمەن, قىتاي اۋىل شارۋاشىلىعى عىلىمدارى اكادەمياسىمەن, «Huawei» كومپانياسىمەن جانە سونداعى باسقا سەرىكتەستەرمەن قازاقستان-قىتاي عىلىمي-ءبىلىم بەرۋ جانە تەحنولوگيالىق كونسورتسيۋمى قۇرىلىپ جاتىر.

ايتا كەتەيىك, س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى شەتەلدىك ارىپتەستەر قاتارىن كەڭەيتىپ, ءبىلىم جانە عىلىم سالاسىنداعى حالىقارالىق باعدارلامالار مەن جوبالارعا قاتىسۋ ارقىلى حالىقارالىق ىنتىماقتاستىقتى بيىك دەڭگەيدە دامىتىپ وتىر. قازىر  جوعارى وقۋ ورنى الەمنىڭ 40-تان استام ەلىمەن جۇمىس ىستەيدى.