فوتو: اقوردا ءباسپاسوز قىزمەتى
پرەزيدەنت اتاپ وتكەندەي, بۇگىندە جەكە مۇددەسىن ەمەس, ەل مۇددەسىن ويلايتىن ازاماتتار كوپ بولۋى قاجەت.
«شىن مانىندە, جەكە مۇددەسىن ەمەس, ەل مۇددەسىن بارىنەن بيىك قوياتىن ازاماتتار ۇرپاققا ۇلگى بولۋى قاجەت. اسىرەسە, قازىرگى گەوساياسي جاعدايدا بۇل مىندەت اسا ماڭىزدى ەكەنىن ۇمىتپاعان ءجون», دەدى مەملەكەت باسشىسى.
وسى ورايدا قاسىم-جومارت توقاەۆ ايگىلى قالامگەر, كورنەكتى مەملەكەت قايراتكەرى ءابىش كەكىلباەۆتى ايرىقشا اتاپ ءوتتى.
ء«ابىش كەكىلباەۆ – رۋحانيات سالاسىندا, مەملەكەتتىك قىزمەتتە ەرەكشە قولتاڭباسىن قالدىرعان ءبىرتۋار تۇلعا, كلاسسيك جازۋشى. مەن ابەكەڭمەن قىزمەتتەس بولدىم, جاقىن ارالاستىم. ءابىش كەكىلباي ۇلى ناعىز تاۋ تۇلعالى ازامات ەدى. ول ىشكى مادەنيەتى وتە جوعارى جان بولاتىن. ەشقاشان بىرەۋدى بىرەۋگە قارسى قويمايتىن, بارىنە سۇيىسپەنشىلىكپەن قارايتىن. ءار ايماقتان وزىنە سالەم بەرۋگە كەلگەن ازاماتتارعا ەسىگى قاشاندا ايقارا اشىق ەدى. ونىمەن تىلدەسكەن ادامدار رۋحتانىپ, قاناتتانىپ شىعاتىن. ابەكەڭ ۇساق-تۇيەك اڭگىمەگە بەرىلمەيتىن, جالپى ادامزاتقا ورتاق ماسەلەلەر تۋرالى ويلانىپ, تولعاناتىن. ءبىر سوزبەن ايتساق, ءابىش كەكىلباەۆ ناعىز زيالى ادام, كەمەڭگەر تۇلعا بولدى», دەدى ەل پرەزيدەنتى.
ايتا كەتسەك, بۇگىنگى جيىنعا قۇرىلتاي مۇشەسى, اسا كورنەكتى مادەنيەت قايراتكەرى, قازاقستاننىڭ ەڭبەك ەرى ءىليا جاقانوۆ قاتىسىپ وتىر.
«ىلەكەڭ دە – ناعىز مەملەكەتشىل تۇلعا, زيالى قاۋىم ىشىندەگى اسا بەدەلدى اعامىز. ءاردايىم سالماقتى وي, ساليقالى پىكىرىمەن ەلگە سىيلى بولىپ جۇرگەن ارداقتى ازامات. ءبىز حالقىمىزدىڭ وسىنداي پەرزەنتتەرىن, ولاردىڭ ءومىر جولىن جان-جاقتى دارىپتەۋىمىز كەرەك, لايىقتى قۇرمەت كورسەتۋىمىز قاجەت», دەپ تۇيىندەدى مەملەكەت باسشىسى.
