كەزدەسۋدىڭ ماقساتى – «وتاۋ» باعدارلاماسى ارقىلى قولجەتىمدى باعامەن بانك سالىمشىلارىنا تۇرعىن ءۇيدى ساتۋ بويىنشا قۇرىلىس سالۋشىلارمەن ىنتىماقتاستىق ورناتۋ. ناتيجەلى بولسا, بۇل بولاشاقتا جاڭا تۇرعىن ءۇي باعدارلاماسى اياسىندا باسپانا باعاسىنىڭ ءوسۋىن تەجەۋگە مۇمكىندىك بەرەدى.
«وتباسى بانك» اق باسقارما توراعاسى ءلاززات يبراگيموۆانىڭ سوزىنشە, «وتاۋ» باعدارلاماسى – تۇرعىن ءۇي قۇرىلىس جيناق جۇيەسىنە قاتىسۋشىلار ءۇشىن باسپانا ساتىپ الۋدىڭ ءتيىمدى قۇرالى. بۇل ەل تۇرعىندارى اراسىندا ۇنەمدەۋ مادەنيەتىن نىعايتۋعا ءارى ارتتىرۋعا باعىتتالعان. سەبەبى اقشاسىن تىرنەكتەپ جيناپ, كۇندەلىكتى شىعىندارىن ەسەپتەي بىلگەن ادام عانا تومەن پايىزبەن ءۇي الاتىنى بەلگىلى. الايدا كليەنتتەرىمىز ءۇشىن باسپانا باعاسى شارىقتاپ كەتپەي, بەلگىلى ءبىر مەجەدەن اسپاعانى ءجون. مۇنداي كەلىسىمگە قول جەتكىزۋ ءۇشىن قۇرىلىس كومپانيالارىنىڭ بانكپەن ىنتىماقتاستىق قۇرۋى ماڭىزدى», دەدى ول.
جالپى, 13 ناۋرىزداعى جاعداي بويىنشا بانك كليەنتتەرى اتالعان باعدارلاماعا قاتىسۋعا 8 180 ءوتىنىم بەرگەن. ءالى دە قابىلداۋ ءجۇرىپ جاتىر. سونداي-اق قاربالاس تۋدىرماۋ ءۇشىن ءوتىنىم قابىلداۋ مەرزىمى 30 ساۋىرگە دەيىن جالعاسادى. ەڭ باستىسى, بانك ءوز كليەنتىن تۇرعىن ءۇيدى تەزىرەك تاڭداۋعا جانە ساتىپ الۋعا اسىقتىرمايدى. ول ءۇشىن 6 اي ۋاقىت بەرىلگەن, سوندىقتان باعدارلاماعا قاتىسۋشىلار وزىنە قولايلى باسپانا تاۋىپ ۇلگەرەدى. «وتاۋ» باعدارلاماسىنىڭ تالاپتارى بويىنشا الماتى, استانا, شىمكەنت قالالارىندا جانە وبلىس ورتالىقتارىندا تەك العاشقى نارىقتان تۇرعىن ءۇي ساتىپ الۋعا بولادى. ال باسقا ايماقتاردا كەز كەلگەن تۇرعىن ءۇيدى ساتىپ الۋعا رۇقسات.
«وتباسى بانك» اق ارقىلى بەرىلەتىن مۇنداي يپوتەكالاردىڭ ەكىنشى دەڭگەيلى بانكتەر ونىمىنە قاراعاندا باستاپقى جارناسى دا, پايىزدىق مولشەرلەمەسى دە تومەن. ءبىز ايتىپ وتىرعان «وتاۋ» باعدارلاماسىنىڭ پايىزدىق مولشەرلەمەسى – 9% (جتسم 9,2%-دان باستاپ), زاەم سوماسىنىڭ 50%-ى جيناقتالعاننان كەيىن نەسيە بويىنشا مولشەرلەمە جىلدىق 3,5-تەن 5%-عا دەيىن (جتسم 3,6%-دان باستاپ) تومەندەيدى. باستاپقى جارناسى – 20%. نەسيەنى 19 جىلعا دەيىن راسىمدەۋگە بولادى. وعان 18 بەن 63 جاس ارالىعىنداعى بانك سالىمشىلارى قاتىسا الادى. نەگىزگى شارت – 18 اي مەرزىمىندەگى دەپوزيتىنىڭ ءارى وندا كەمى 1 ملن تەڭگە سالىمىنىڭ بولۋى. سونداي-اق قاتىسۋشىنىڭ جانە ونىڭ وتباسى مۇشەلەرىنىڭ سوڭعى 5 جىل ىشىندە مەنشىگىندە جىلجىمايتىن مۇلكى بولماۋعا ءتيىس. ۇمىتكەرلەردىڭ سوڭعى 6 ايداعى تۇراقتى تابىسى دا قارالادى.
«مىسالى, بىلتىر رەسپۋبليكادا 17,5 ملن شارشى مەتر تۇرعىن ءۇي سالىنعان. بۇل – 157 مىڭ پاتەر. بىزگە وسى پاتەرلەردى ساتۋ بويىنشا كوپ قۇرىلىس كومپانيالارى كەلىپ, قانداي دا ءبىر ءتيىمدى يپوتەكالىق باعدارلامالار بار-جوعىن سۇرايدى. ارينە, ءبىز ەڭ الدىمەن جۇمىس ىستەيتىن جاستاردىڭ, جاس وتباسىلاردىڭ ءۇيلى بولۋىنا جاعداي جاساۋعا تىرىسامىز. ەكىنشىدەن, بۇل – جاڭا پاتەرلەر. ولاردى قاتىسۋشىلار «باسپانا ماركەت» پورتالىنان تاڭداي الادى. باعدارلاماعا قاتىسۋ جونىندەگى ءوز وتىنىشتەرىن دە ەل تۇرعىندارى وسى پورتال ارقىلى جولداي الادى. 1 مامىردان باستاپ ءوتىنىش بەرگەن ازاماتتاردىڭ قۇجاتتارىن ساراپتايتىن بولامىز», دەپ اتاپ ءوتتى ل.يبراگيموۆا.
«باسپانا ماركەت» پورتالىنىڭ (otbasybank.kz) قىزمەتى وتە ىڭعايلى. مۇندا ءسىز بانكتىڭ باعدارلاماسىنا قاتىسۋعا ءوتىنىش بەرە الاسىز, تۇرعىن ءۇيدى تاڭداپ, برونداپ, نەسيە راسىمدەۋ ۇدەرىسىن باستاي الاسىز. بۇل – بانك كليەنتىنە انىقتاما اكەلۋدىڭ, كەزەكتە تۇرۋدىڭ, فيليالدارعا بارىپ ۋاقىتتى ىسىراپ ەتۋدىڭ قاجەتى جوق دەگەن ءسوز.
اتالعان پورتال قۇرىلىس سالۋشى كومپانيالار ءۇشىن دە ءتيىمدى. ولار ءوز جەكە كابينەتى ارقىلى قۇرىلىس نىساندارىن ورنالاستىرىپ, پاتەرلەردى ساتۋ ۇدەرىسىن تسيفرلاندىرا الادى. دەمەك فيليالعا ولار ءۇشىن دە توم-توم قۇجاتپەن كەلۋدىڭ, قاعاز بەتىندەگى كەلىسىمشارتقا قول قويۋدىڭ قاجەتى جوق. مىسالى, بۇل جۇمىس بۇرىن ورتا ەسەپپەن 2 ساعاتقا سوزىلسا, قازىر 20 مينۋت ۋاقىت كەتەدى ەكەن.
«كومپانيالار ءوز پاتەرلەرىن «باسپانا ماركەت» پلاتفورماسىنا ورنالاستىرماس بۇرىن تۇرعىن ءۇيدىڭ اعىمداعى نارىقتىق باعاسىنا كەلىسۋ جۇمىستارىن جۇرگىزەتىن بولادى. ارينە, بۇل جەردە قۇرىلىس ماتەريالدارى باعاسىنىڭ وزگەرىپ تۇرۋى دا باسپانا باعاسىنا اسەرىن تيگىزبەي قويمايدى. ەگەر ول نارىققا سايكەس كەلسە, وندا قۇرىلىس سالۋشىمەن بىرگە پاتەردىڭ 1 شارشى مەتر باعاسى بەلگىلەنىپ, تۇرعىن ءۇيدى ساتۋ تۋرالى كەلىسىم جاسالادى. وسى ارقىلى جاڭا تۇرعىن ءۇي باعدارلاماسىنىڭ باستالۋى اياسىندا تۇرعىن ءۇي باعاسىنىڭ جاساندى وسۋىنە جول بەرمەيمىز», دەپ ءسوزىن تۇيىندەدى «وتباسى بانك» اق باسقارما توراعاسى.
ستاتيستيكا بويىنشا, بانكتە دەپوزيتىنە 1 ميلليون تەڭگە جيناعان, سالىمىنىڭ مەرزىمى 18 ايدان اساتىن 300 مىڭ سالىمشى بار. سونىڭ ىشىندە 51 مىڭ كليەنتتىڭ دەپوزيتىندە ورتا ەسەپپەن پاتەر قۇنىنىڭ 20%-ىنا جەتەتىن جيناقتارى بار ەكەن. «وتاۋ» باعدارلاماسى 7 جىلعا ەسەپتەلگەنىن ەسكەرسەك, «وتباسى بانكتىڭ» كەمى 56 مىڭ سالىمشىسى وسى ۋاقىت ارالىعىندا اتالعان باعدارلاما كومەگىمەن باسپانالى بولا الادى دەگەن ءسوز.
