كەشە وسىعان وراي ورتالىق كوممۋنيكاتسيالار قىزمەتى الاڭىندا ءباسپاسوز جيىنى ءوتتى. جيىندا توتەنشە جاعدايلاردىڭ الدىن الۋ باسقارماسىنىڭ وكىلى التاي مىرزاباەۆ, توتەنشە جاعدايلاردى جويۋ دەپارتامەنتى باستىعىنىڭ مىندەتىن اتقارۋشى جومارت اسقاروۆ, «قازگيدرومەت» رمك باس ديرەكتورىنىڭ ءبىرىنشى ورىنباسارى سەرىك سايروۆ, كولىك مينيسترلىگى اۆتوموبيل جولدارى كوميتەتى توراعاسىنىڭ ورىنباسارى عالىمجان وتەنباەۆ قاتارلى قۇزىرلى ورىنداردىڭ باسشىلارى بايانداما جاسادى.
«ەلدەگى سۋ تاسقىنىنىڭ قاۋپى بۇگىندە سالىستىرمالى تۇردە تۇراقتى. ەلدى مەكەندەردە سۋ ايداۋ جانە قار شىعارۋ, سۋ بۇرۋ ارنالارىن تازارتۋ جۇمىستارى قولعا الىنعان. سۋ تاسقىنى جاعدايىنا تاۋلىك بويى تەكسەرىس جۇرگىزىلىپ جاتىر. ناۋرىزدىڭ ءبىرىنشى ونكۇندىگىندە ەلدىڭ شىعىس جانە وڭتۇستىك ايماقتارىندا ءبىر مەزگىلدە قاتتى جاۋىن-شاشىن مەن اۋا تەمپەراتۋراسى كوتەرىلدى», دەيدى التاي مىرزاباەۆ.
دەپارتامەنت باستىعىنىڭ سوزىنە سەنسەك, ازىرگە ءتونىپ تۇرعان توتەنشە قاۋىپ جوق ءتارىزدى.
«جىل باسىنان بەرى 64,8 شاقىرىم ۋاقىتشا بوگەتتەر جانە ەلدى مەكەندەردىڭ اينالاسىندا 52,7 شاقىرىمنان اسا قورعاندار سالىندى. 721 شاقىرىمعا جۋىق كانالدار مەن 2 296 شاقىرىم ارىقتار, اۆتوموبيل جانە تەمىر جول استىنداعى 15 مىڭنان اسا سۋ وتكىزۋ قۇرىلىستارى تازارتىلدى. 384 مىڭ توننادان اسا ينەرتتى ماتەريالدار جانە 1,2 ملن-نان اسا قاپشىق دايىندالدى. سۋ تاسقىنى مۇمكىن بولعان جاعدايدا حالىقتى قابىلدايتىن 3 031 پۋنكت جانە اۋىل شارۋاشىلىعى جانۋارلارىن ورنالاستىرۋ ۋچاسكەلەرى دايىندالدى, مارشرۋتتار ناقتىلاندى, ارنايى كولىكتەر انىقتالدى», دەيدى جومارت اسقاروۆ.
سونىمەن قاتار جيىندا استانا قالاسى, باتىس قازاقستان, اقمولا, قوستاناي, الماتى, قاراعاندى, پاۆلودار, ۇلىتاۋ, شىعىس قازاقستان جانە تۇركىستان وبلىستارى اكىمدىكتەرىنىڭ سۋ تاسقىنىنا دايىن ەمەستىگى تۋرالى 356 ەسكەرتۋ بەرىلگەنى ايتىلدى. سونداي-اق سۋ تاسقىنى جاعدايىنا گيدروتەحنيكالىق قۇرىلىستاردىڭ جاعدايى اسەر ەتۋى مۇمكىن دەيدى ماماندار. سۋ رەسۋرستارى جانە يرريگاتسيا مينيسترلىگىنىڭ سوڭعى جۇرگىزىلگەن زەرتتەۋلەرىنىڭ ناتيجەلەرى بويىنشا قولدا بار 1 502 تىرەۋىش گيدروتەحنيكالىق قۇرىلىستاردىڭ, 537-ءسى جوندەۋدى تالاپ ەتەتىنى ايتىلدى.
«بۇل رەتتە 322 گيدروتەحنيكالىق قۇرىلىستار ىقتيمال اپاتتىق رەجىمى كەزىندە حالىققا قاۋىپ توندىرەدى, ونىڭ 105-ءى جوندەۋ جۇرگىزۋدى تالاپ ەتەدى. ىقتيمال سۋ باسۋ ايماعىندا 481 ەلدى مەكەن بار, وندا 1,5 ميلليوننان اسا ادام تۇرادى», دەيدى توتەنشە جاعدايلار مينيسترلىگىنىڭ وكىلى.
جيىندا سۇراق قويۋدىڭ رەتى كەلگەندە ماسەلەنىڭ ءمانىسىن ءسال ارىدەن قوزعاۋعا تىرىستىق. ماسەلەن, جاپونيا, قىتاي سەكىلدى ەلدەر كەز كەلگەن ماسەلەنىڭ ۇزاقمەرزىمدى جاعىن زەرتتەيتىنى بەلگىلى. ال ءبىزدىڭ باسشىلار ماسەلەنى تەك سول كەزدە عانا شەشىپ, جەدەل ناتيجە كورسەتۋگە تىرىساتىنى بەلگىلى. ارينە, ءۇيىڭدى سۋ الىپ بارا جاتسا, ويلانىپ تۇرا المايتىنىڭ راس. بىراق وعان دەيىن دە ونىڭ كەشەندى تۇردە زەرتتەپ, ول ماسەلەنى تۇبەگەيلى شەشۋدىڭ جولدارىن قاراستىرۋعا بولار ەدى. سول سەبەپتى ء«بىز بۇل قار سۋىن نەگە ءتيىمدى پايدالانا الماي وتىرمىز؟ كەڭەس زامانىندا مۇنداي قار سۋىنىڭ ءبارى ساي-سالاعا قۇيىلىپ, توعانعا جيىلىپ وندىرىسكە, ەگىنگە پايدالانىپتى دەسەدى. بۇل قازىر نەگە جۇزەگە اسپاي قالدى؟ مامان جوق پا, تەحنيكا تاپشى ما؟» دەگەن ساۋال قويدىق.
بۇعان جاۋاپ بەرگەن قۇزىرلى ورىن قىزمەتكەرلەرى تۇك تە قىنجىلعان جوق. كەرىسىنشە, سۇراعىما ايىزى قانعانداي شىرايى كىرگەنى راس. ولاردىڭ ايتۋىنشا, بۇل ماسەلە قولعا الىنا باستاعان. قازىردىڭ وزىندە 20 شاقتى قار سۋىن جينايتىن توعاندار سالىنىپ, تاعى 15 اپاتتى جاعدايعا ارنالعان سۋ جينايتىن ورىن جاساقتالىپ جاتىر.
