بۇرىن وسى مارافون 1 مىڭ شاقىرىمنان ارتىق قاشىقتىقتى ەڭسەرگەن. بيىلعى مارافون سولتۇستىكتەگى كوكشەتاۋ ءوڭىرى مەن اقمولا توڭىرەگىندەگى تاريحي جەرلەردى باسىپ وتەدى. سونىڭ ىشىندە ابىلايدىڭ, كەنەسارىنىڭ سولتۇستىكتەن وڭتۇستىككە جۇرگەن جولدارىن, وزەن-كولدەر مەن جازىق دالانى كەشەدى. بۋراباي كۋرورتىنىڭ كورىكتى ايماقتارىن ارالاپ, ادامنىڭ العاش رەت جىلقىنى قولعا ۇيرەتكەن مەكەنى – بوتايعا سوعادى, استانا تۇبىندەگى ەجەلگى قالا بوزوقتى باسىپ وتەدى. ءسويتىپ, كەڭ دالامىزدىڭ تەرەڭ تاريحىن بۇگىنگى ۇرپاققا تانىستىرا تۇسپەك.
جارىسقا ەلىمىزدىڭ بارلىق 17 وبلىسى مەن 3 رەسپۋبليكالىق دارەجەدەگى قالالارىنان ءتورت ادامدىق كوماندا قاتىسادى. مارافون پەتروپاۆل ورتالىعىنداعى «ابىلايدىڭ اق ءۇيى» – حاننىڭ رەزيدەنتسياسىنان 12 مامىردا باستاۋ الىپ, بەس كۇندە استانا قالاسىنا جەتەدى دەپ جوسپارلانعان.
بيىلعى مارافوننىڭ ەرەكشەلىگى, V دۇنيەجۇزىلىك كوشپەلىلەر ويىندارى قارساڭىندا وتۋىندە. جەڭىمپازدار قاتارىنا ەنگەن ءۇش كوماندا قىركۇيەك ايىنا جوسپارلانعان « ۇلى دالا جورىعى» حالىقارالىق تۋرىنا بەرىلەتىن ليتسەنزيانى الادى.
ءبىر قىزىعى بۇل جورىققا اۋىسىپ مىنەتىن ەرۋلى اتتار بىرگە جۇرەدى. سونىمەن قاتار اتتاردىڭ جاسى التى جاستان, ياعني بەستى اتتان كەم بولماۋى كەرەك. ۇيىمداستىرۋشىلاردىڭ ايتۋىنا قاراعاندا, بۇل – اتتاردىڭ شەكتەن تىس قاجىماۋى, زورىقپاۋى ءۇشىن قولدانىلاتىن تالاپ. سونداي-اق بۇل شارا قازاقتىڭ قانداي جىلقى تۇقىمى ءتوزىمدى ءارى مىقتى ەكەنىن انىقتايتىن دالالىق زەرتحانا ىسپەتتەس. وسىنداي بىرنەشە ماقساتتى ورىنداۋدى الدىنا قويعان مارافون مامىر ايىندا سورەدەن وتەدى.
