24.kz-ءتىڭ مالىمەتىنشە, جەزقازعاندىق 13 جاستاعى كوركەمدى دوستارى «شاباندوز قىز» دەپ اتايدى. نەبارى 5 جاسىندا اتقا مىنگەن ول بۇگىندە اكەسىنە جاردەم بەرىپ, 2 ءۇيىر جىلقى باعىپ وتىر. اساۋ تىزگىندەپ, تالاي بايگەگە تۇسكەن وقۋشى بولاشاقتا اتادان جالعاسقان كاسىپتى دامىتۋ ارمانىم دەيدى.
جىلقى نازىكتىكتى, كۇتىمدى جانى سۇيەتىن جانۋار. قارشاداي قىز ونى جاقسى بىلەدى. «اتقا وتىرعاندا ءوزىڭدى عانا ويلاماي, استىڭداعى جانۋارمەن دە ساناسقان ءجون» دەيدى. سوندىقتان تۋعاننان «تاليسمان» دەپ اتىن قويىپ, ءوزى ۇيرەتكەن كۇرەڭ قۇناندى ەرەكشە باپتايدى. قازىر جىلقىنىڭ ءبارى دالادا, تەبىنگە جىبەرىلگەن. كوركەمنىڭ مىندەتى - قولعا ۇستاپ قالعان جاباعىلاردىڭ بابىن تابۋ.
«كىشكەنتاي جاسىمنان مىنەمىن. اكەم ۇيرەتتى. ءوزىنىڭ الدىنا الىپ. قاتتى قورقىنىش جوق. بۇرىن قورىققانمىن بىراق. ارمانىم - اكەمنىڭ شارۋاشىلىعىن جالعاستىرۋ. ءيا, جازعى كانيكۋل كەزىندە وسى جاقتا بولامىز بىرىڭعاي», دەيدى جەزقازعان تۇرعىنى كوركەم سەرعازى.
كوركەم قازىر 8 سىنىپتا وقيدى. ساباقتان بوس ۋاقىتتا شارۋاشىلىق باسىنان تابىلادى. اساۋ ۇيرەتىپ, بايگەگە تۇسكەن شاباندوز قىز ەرگەن باۋىرلارىن دا بۇل ىسكە باۋلىپ ءجۇر. بۇل رەتتە سانالى عۇمىرىن جىلقى شارۋاشىلىعىنا ارناعان اتاسى اقىلىن ايتىپ, كەڭەس بەرىپ وتىرادى.
«اكەگە جاقىن عوي قىز بالا دەگەن. وسى بالا ءوزى قۇمارتتى سودان كەيىن بەتىن قاقپايمىز. اقىلدى, ساباقتى جاقسى وقيدى. كەيىننەن قويىپ كەتەتىن شىعار, ەر جەتكەننەن كەيىن, ينستيتۋت بىتىرگەننەن كەيىن. قازىر قۇمار. اتقا دا, شارۋاشىلىققا دا جاقىن. قازىر قىس قوي, كوپ كەلە بەرمەيدى. جازدىگۇنى كانيكۋلعا شىققاننان كەيىن وسى مالدىڭ ىشىندە. تاقىمى بەرىك قىز بولاشاقتا وسى شارۋاشىلىقتى ودان ءارى دامىتسام دەيدى. ات باپتاپ, مال باسىن اسىلداندىرۋ ءىسىن قولعا الۋدى جوسپارلاپ قويعان», دەدى قىزدىڭ اتاسى سەرعازى امزە ۇلى.
