وسىنداي جاۋاپتى قىزمەتتە جۇرگەن كريميناليستەردىڭ ءبىرى, بىرەگەيى - وسكەمەن قالاسى پوليتسيا باسقارماسىنىڭ جەدەل كريميناليستيكالىق ءبولىمىنىڭ كريميناليست مامانى, پوليتسيا كاپيتانى اينۇر احمەتوۆا.
«مىندەتىم, قىلمىسكەردىڭ قالدىرعان ىزدەرىن, زاتتاي دالەلدەمەلەرىن تاۋىپ, قىلمىس جاسادى دەگەن كۇدىكتى ادامدى تابۋ», دەيدى اينۇر ورالبەكقىزى.
قۇقىق قورعاۋ سالاسىندا ازدى-كوپتى قىزمەت ەتكەن كاپيتان ا.احمەتوۆانىڭ قىراعىلىعى مەن تاجىريبەسىنىڭ ارقاسىندا از قىلمىس اشىلعان جوق. ۇرلىقتى دا, توناۋدى دا, قاندى قول قىلمىسكەرلەردى دە اشكەرەلەدى.
كريميناليست ارۋدىڭ ايتۋىنشا, قىلمىسكەر كوبىنەسە ەسىكتەن نەمەسە تەرەزەدەن كىرەدى. ونداي جاعدايدا ۇنتاق ارقىلى قولى ءتيدى-اۋ دەگەن زاتتاردان ساۋساق ءىزىن الادى. ەگەر قولعاپپەن كىرسە, ودورولوگيالىق ساراپتاما جاساپ, ءيىسىن سالىستىرادى. بۇدان باسقا دا ساراپتاما جۇمىستارىنىڭ تۇرلەرى كوپ سەكىلدى.
«جۇمىستىڭ ەڭ اۋىرى – كىسى ولىمىنە بارۋ. بۇل جەردە دە كۇدىكتىنى جەدەل تابۋدى ماقسات ەتەمىز. سونىمەن قاتار, قانداي جاعدايدا, نەدەن ولگەنىن انىقتاۋ. ماسەلەن, پىشاق جاتۋى مۇمكىن, ونى زەرتتەيمىز. قانىنا دەيىن الىپ, بيولوگيالىق ساراپتاما جۇرگىزەمىز», دەيدى اينۇر احمەتوۆا.
جەر بەتىنە ادام جاراتىلعالى قىلمىستىڭ قاتار كەلە جاتقانىن جوققا شىعارا الماسپىز. بىلايعى جۇرتقا قالا ءىشى تىپ-تىنىش بولىپ كورىنگەنىمەن, قۇقىق قورعاۋ سالاسىنىڭ قىزمەتكەرلەرى وقىس وقيعا ورتاسىندا جۇرەدى. جۋىقتا ءدامحانالاردىڭ بىرىندە قالا تۇرعىنىنىڭ قالتا تەلەفونى جوعالىپ, وقيعا ورنىنا جەتكەن پوليتسەيلەر ادامداردىڭ ءبارىن تىسقا شىعارعان. عيمارات ىشىندە تەكسەرۋ جۇرگىزىلىپ جاتقان ساتتە اينۇر احمەتوۆا ادەتتەگىدەي جان-جاعىن فوتوعا تۇسىرەدى. تۇسىرە ءجۇرىپ, اجەتحاناعا كىرەدى. كىرسە, قالتا تەلەفونىن ۇرلاعان كۇدىكتى قارسى الدىندا تۇرعان ەكەن. ءيا, كەيدە قىلمىس سول ساتتە-اق اشىلىپ جاتسا, ەندى بىردە جىلدار بويى دالەلدىڭ ۇشىن تابۋ قيىنعا سوعىپ جاتادى. قانداي قيىندىق بولسا دا قىزمەتىنە ادال اينۇرداي ارۋلار كوپ بولسىن دەيمىز.
