سۋرەتتى تۇسىرگەن – ەرلان ومار, «EQ»
وسىناۋ سۇلۋ ولكەگە ساياحاتشىلار تارتۋدى 2022 جىلدان باستاپ «بايتاق جەر» جوباسى قولعا العان. وسىعان وراي, ەلوردادا ورتالىق ازيانىڭ ەۋرازيا قورى (واەق), «شەۆرون», «Kazakh Tourism» كومپانيالارى بىرلەسكەن دوڭگەلەك ۇستەل وتكىزدى. وعان ەل اۋماعىندا تۋريزم سالاسىن دامىتۋمەن اينالىساتىن كاسىپكەرلەر, مەملەكەتتىك مەكەمە قىزمەتكەرلەرى مەن ساراپشى ماماندار قاتىسىپ, وي ءبولىستى.
«2022 جىلى واەق سەرىكتەس «شەۆرون» كومپانياسىمەن بىرگە «بايتاق جەر» جوباسىن əزىرلەگەن ەدى. ماماندارمەن كەڭەسە كەلە ەكوتۋريزم, ەتنوتۋريزمدى دامىتۋعا قولايلى اۋىلداردى كوپشىلىككە تانىتۋدى جوسپارلاعان ەدىك. ونىڭ ءبىر باعىتى بيزنەس جوباسىن ىسكە اسىرا الماي جۇرگەن اۋىل تۇرعىندارىن قولداۋ ارقىلى ىشكى ءتۋريزمنىڭ كوكجيەگىن كەڭەيتۋگە ورايلاستىرىلىپ وتىر», دەيدى جوبانىڭ ۇيىمداستىرۋشىسى ءاليا ەسپاەۆا.
ونىڭ ايتۋىنشا, جوبا 2022 جىلدىڭ كۇزىندە اقمولا وڭىرىندەگى زەرەندى, ساندىقتاۋ, قورعالجىن اۋداندارىندا جۇمىسىن باستاعان.
– ءبىزدىڭ باستى ماقسات – تۋريزم سالاسىندا جۇمىس ىستەيتىن اقمولا وبلىسىنداعى اۋىلدىق كاسىپكەرلەر مەن ۇكىمەتتىك ەمەس ۇيىمداردى قولداۋ. مۇنىڭ ايماقتاعى تۋريستىك ينفراقۇرىلىمدى دامىتۋعا جانە ەكونوميكالىق جاعدايدى جەتىلدىرۋگە سەپتىگى زور», دەيدى «شەۆرون» كومپانياسىنىڭ الەۋمەتتىك ينۆەستيتسيالار جونىندەگى كەڭەسشىسى لەيلا ايتمۇحانوۆا.
جيىنعا قاتىسقان ساراپشىلار مەن كاسىپكەرلەر اقمولا وبلىسىنداعى اۋىلدىق جەرلەردىڭ ەكونوميكالىق بەلسەندىلىگىن, ماسەلەلەرىن تالقىلادى. سونداي-اق جوبا جەتەكشىلەرىنىڭ ەلەگىنەن ەكشەلگەن 22 كاسىپكەردىڭ 10-ى جەڭىمپاز اتانىپ, ولارعا ارنايى سەرتيفيكات تابىستادى. ياعني 10 كاسىپكەرگە 4-6 ميلليونعا دەيىن مولشەرىندەگى 2 جىلعا ءوسىمسىز نەسيە بەرىلدى.
«ولار بۇل ناتيجەگە ەكى ايعا سوزىلعان قارقىندى وقىتۋ باعدارلاماسى ارقىلى قول جەتكىزدى. سونىمەن قاتار جوبانىڭ ءبىلىم بەرۋدەگى سەرىگى «MOST» بيزنەس-اكسەلەراتورى ءۇشىن ءبىر كۇندىك وقىتۋدا كاسىپكەرلەردىڭ جوسپارلاۋ, ۇيىمداستىرۋ ساپالى قارىم-قاتىناس جاساۋ داعدىلارىن جەتىلدىردى. ينكۋباتسيانىڭ ءىى كەزەڭىنە دەيىن كاسىپكەرلەر وزدەرىنىڭ بىلىگىن تاجىريبەلى تالىمگەرلەرمەن بىرلەسىپ جۇمىس ىستەۋ ارقاسىندا ەداۋىر جاقسارتتى», دەيدى ءا.ەسپاەۆا.
قارجىلاندىراتىن جوبالار اراسىندا سپورتتىق بالىق اۋلاۋ, كيىز ءۇي جاساۋ, دەمالىس ورىندارىن اشۋ جانە سالت اتتى ساياحات, ت.ب. بار. «بايتاق جەر» جوباسىنا بىلتىر اقمولا وبلىسىنان 60-قا جۋىق كاسىپكەر ءوتىنىش بەرىپ, وقىتۋ باعدارلاماسىنان وتكەن 6 قاتىسۋشىسى ءوسىمسىز قارىزبەن ءوز جوبالارىن جۇزەگە اسىرىپتى.
سونداي-اق جيىندا كاسىپكەرلەر ساياحات سالاسىن دامىتۋعا قاتىستى ءوز ويلارىن ورتاعا سالدى. ماسەلەن, كاسىپكەر ءلاززات باتىرقوجانىڭ ايتۋىنشا, بۇل جوبا اۋىلدىق جەرلەردىڭ ەكونوميكالىق الەۋەتىن ارتتىرادى, بىراق وعان دا ءبىراز ەكونوميكالىق ساۋاتتىلىق قاجەت.
«بايتاق جەر» جوباسى ءبىراز نارسەگە كوزىمدى اشقانى راس. ماسەلەن, بيزنەستى ينتۋيتسيامەن جۇرگىزىپ تە كوردىك. الايدا ونىمىزدان كوپ شيكىلىك شىقتى. وقۋ بارىسىندا ءبىز بيزنەس جۇرگىزۋگە ارنالعان قۇرالدار تۋرالى مول ماعلۇمات الدىق. بۇل جوبا ارقىلى اۋىلدىق جەرلەرگە تۋريستەر بارىپ, ولاردىڭ دا, ءوزىمىزدىڭ دە ەكونوميكالىق جاعدايمىزدى ەسەلەسەك دەيمىز», دەيدى كاسىپكەر ەلدوس وسپانوۆ.
ال كاسىپكەر جۇما نۇرعاليەۆا كەيبىر شالعاي اۋىلدارعا قاتىنايتىن جول ماسەلەسى ساياحات سالاسىن دامىتۋعا ءبىرشاما كەدەرگى كەلتىرىپ وتىرعانىن جەتكىزدى. سونداي-اق كاسىپكەر قانات توكەسباي, ەلۆيرا مۇقاشەۆا جوبا اياسىندا بيزنەستەرىنىڭ اۋقىمىن كەڭەيتىپ جاتقانىن ايتتى.
«مەن جوبانىڭ قاتىسۋشى رەتىندە قىسقا تىزىمگە كىردىم. بۇل ءبىز ءۇشىن «Michelin» جۇلدىزدى ساپا بەلگىسىن العانمەن بىردەي بولدى. اقمولا ءوڭىرى ەجەلدەن ارگارلىق ايماق. ماسەلەن, جىلقى جانۋارى العاش قولعا ۇيرەتىلگەن جەر دە وسى اقمولا ەكەنى بەلگىلى. ياعني بوتاي مادەنيەتىنىڭ مۇرالارىن دا الەمگە تانىتۋعا مۇمكىندىك مول. مەنىڭشە, جالپى اقمولا وڭىرىندەگى ەڭ عاجاپ جەرلەردى تانىستىراتىن بىرەگەي جول كارتاسىن جاساپ, ءارتۇرلى ساياحات ۇيىمداستىرۋ ارقىلى دا وڭىرگە تۋريستەردى تارتۋعا بولادى دەپ ەسەپتەيمىن», دەيدى فاريدا ەلەۋسىزوۆا.
قازىرگى سۇرانىستا تۇرعان ساياحاتتىڭ ءبىر ءتۇرى – ەتنوتۋريزم. ول حالىقتىڭ تۇرمىس-تىرشىلىگىن, سالت-ءداستۇرى مەن مادەنيەتىنەن سىر شەرتەتىن سالا. ءتۋريزمنىڭ بۇل تۇرىنە قىزىعۋشىلىق تانىتاتىن ساياحاتشىلار ءۇشىن دە اقمولا تاپتىرماس ولكە.
«بۇل وڭىردە ۇلتتىق قايماعى بۇزىلماعان اۋىلداردىڭ ءداستۇرىن, تۇرمىس-سالتىن كورسەتەتىن ەتنوتۋريزمدى دە دامىتۋعا مۇمكىندىك بار. ونىڭ تاعى ءبىر باعىتى رەتىندە قازىر قولونەر شەبەرلەرىنىڭ تۋىندىلارىن تانىتۋعا دا كوڭىل ءبولىنىپ كەلەدى. ەلىمىزدىڭ ءار ايماعىندا مەملەكەتتىڭ قولداۋىمەن قولونەرشىلەردىڭ كورمەسىن ۇيىمداستىرۋ دا داستۇرگە اينالدى. سەبەبى قولونەر كرەاتيۆتى يندۋستريانىڭ اجىراماس بولىگى سانالادى», دەيدى التىناي تاڭىربەرگەنوۆا.
اقمولا دەسە ءبىرىنشى اۋىزعا تۇسەتىنى دە, ويعا ورالاتىنى دا – بۋراباي. بىراق بۇل ولكەنىڭ عاجابى ونىمەن بىتپەيدى. اۋاسىندا ارشا ءيسى بار اقسەلەۋلى ايماقتىڭ ءار اۋىلى تۇنعان سىر. ال ونى كورسەم دەگەن ساياحاتشىلارعا اۋىلدىق كاسىپكەر ازاماتتار ساپالى سەرۆيس جاساپ, ناپاقاسىن ايىرىپ جاتسا قۇبا-قۇپ.
