فوتو: اۋىل شارۋاشىلىعى مينيسترلىگىنىڭ ءباسپاسوز قىزمەتى
دەلەگاتسيا جاڭاارقا اۋدانىنا بارىپ, ءمان-جايدى انىقتادى: 2023 جىلدىڭ جەلتوقسانى مەن 2024 جىلدىڭ اقپان ايىندا قاردىڭ قالىڭ تۇسۋىنەن ءارى تەمپەراتۋرانىڭ تومەندەۋىنەن جانە جايىلىمدارعا مۇز قاتۋىنا بايلانىستى جىلقىلاردىڭ تەبىندەۋى قيىنعا سوققان. سوعان بايلانىستى تايلار مەن كارى جىلقىلار قىرىلىپ قالعان. اۋىل شارۋاشىلىعى جانۋارلارىن سايكەستەندىرۋ بازاسىنىڭ دەرەگىنشە قازىرگى ۋاقىتتا اۋداندا 84,3 مىڭ باس جىلقى تىركەلگەن.
مينيسترلىكتىڭ حابارلاماسى بويىنشا جاڭاارقا كەنتى مەن قاراجال قالاسى اراسىنداعى اۆتوجول بويىنان ولەكسەسى تابىلعان 23 باس جىلقىنىڭ سايكەستەندىرۋ ءنومىرى بولماي شىققان. ولەكسەلەر مال قورىمىنا جەتكىزىلدى. سونىمەن قاتار اتالعان اۋداندا سايكەستەندىرۋ ءنومىرى جوق تاعى 44 باس جىلقى تابىلعان. وسىلايشا, جايىلىمدا ولگەن 67 باس جىلقىنىڭ يەلەرىن انىقتاۋ مۇمكىن بولماعان. اۋداندىق ۆەتەرينارلىق ستانتسيالارعا جىلقىلاردىڭ ولىمىنە قاتىستى يەلەرىنەن ءالى رەسمي تۇردە ءوتىنىش تۇسپەگەن.
« ۇلىتاۋ وبلىسىندا 2000 باس جانە جاڭاارقا اۋدانىندا قولدا بار مال باسىنىڭ جارتىسى قىرىلىپ قالدى دەگەن اقپارات شىندىققا جاناسپايدى», دەلىنگەن حابارلامادا.
قازىرگى ۋاقىتتا اۋىلدىق ۆەتەرينارلىق دارىگەرلەردىڭ, جەرگىلىكتى اتقارۋشى ورگان وكىلدەرىنىڭ, مەملەكەتتىك ۆەتەرينارلىق-سانيتارلىق ينسپەكتورلاردىڭ قاتىسۋىمەن ولگەن جىلقىلاردى جيناۋ جانە ولاردىڭ ولەكسەلەرىن جويۋ جۇمىستارى جۇرگىزىلىپ جاتىر. بۇل جاعداي اشم ۆەتەرينارلىق باقىلاۋ جانە قاداعالاۋ كوميتەتىنىڭ ۇلىتاۋ وبلىسىنداعى اۋداندىق اۋماقتىق ينسپەكتسيالارىنىڭ قاداعالاۋىندا بولادى.
