قۇجاتتارعا ونلاين قول قويادى

عىلىم جانە ءبىلىم مينيسترلىگى «بولاشاق» ستي­پەندياسىنىڭ شارت­تارىنا ونلاين قول قويۋ مۇمكىندىگى ىسكە قوسىلعانىن حابارلادى. بۇعان دەيىن كەلىسىمشارتتار جاساۋ ۇدەرىسى 90 كۇنگە دەيىن سوزىلاتىن, ويتكەنى ستيپەندياتتار مەن ستيپەندياتتاردىڭ كەپىلگەرلەرى استانا قالاسىنداعى «حالىقارالىق باعدارلامالار ور­تا­لىعى» اق كەڭسەسىنە ءوزى كەلۋگە مىن­دەتتى بولاتىن. ەندىگى جەردە شارتتارعا قول قويۋ ستيپەنديات­تار مەن كەپىلگەرلەردىڭ ەلەكتروندىق تسيفرلىق قولتاڭباسىن پايدالانا وتىرىپ, TrustContract سەرۆيسى ارقىلى جۇزەگە اسىرىلادى. ءاربىر قول قويۋشىعا SMS حابارلاما ارقىلى شارتتىڭ مارتەبەسى تۋرالى حابارلاما جىبەرىلەدى.

عىلىم جانە جوعارى ءبىلىم ءمي­نيسترى س.نۇربەك وسى ماسەلەگە قاتىس­تى: «ۇسىنىلاتىن قىزمەتتەردىڭ ساپاسىن ارتتىرۋ ماقساتىندا «حا­لىقارالىق باعدارلامالار ورتالىعى» بيزنەس-ۇدەرىستەردى وڭتايلاندىرىپ, بيۋروكراتيالىق پروتسەدۋرالاردى ازايتىپ, تسيفرلىق فورماتقا كو­شىپ جاتىر. جۇمىس توبى عىلىمي تاعى­لىم­دامادان وتۋشىلەردىڭ كەلىسىم­شارتقا وتىرۋ ۇدەرىسىن جەدەل تسيفر­لان­دىرۋ مىندەتىن قويعان بولاتىن. «500 عالىم» باعدارلاماسىنىڭ جەڭىم­پازى بولىپ ءتورتىنشى لەكتە 481 عا­لىم اتاندى جانە ولاردىڭ بارلىعى بىر­نە­شە كەپىلگەرلەرمەن بىرگە كەلىسىمشارت­تار جاساسۋ ءۇشىن ءوز ايماقتارىنان استا­نا­عا كەلىپ, جول جۇرۋىنە, تۇرۋىنا جانە كەزەككە تۇرۋىنا جەكە قاراجاتىن جۇمساۋشى ەدى. ەندى بۇكىل ۇدەرىس ءبىر-ەكى كۇنگە سوزىلىپ, ىڭعايلىلىق پەن شىعىندى ۇنەمدەۋگە مۇمكىندىك بەرەدى», دەپ جاۋاپ بەردى.

مينيسترلىكتىڭ حابارلاۋىنشا, تا­عىلىمداما باعىتى بويىنشا «بولا­شاق» ستيپەندياسىنىڭ يەگەرلەرى ءۇشىن دە ونلاين كەلىسىمشارت­تار جاساۋ ۇدەرىسى  قولجەتىمدى. جاقىندا ماگيسترا­تۋرا جانە دوكتورانتۋرا با­عىت­تارى بويىنشا «بولا­شاق» ستيپەندياتتارى ءۇشىن دە كەلىسىمشارتتارعا تسيفرلىق قول قويۋ قولجەتىمدى بولادى. قازىرگى ۋاقىتتا كەپىل مۇلكىن تسيفرلىق تىركەۋ ۇدەرىسى تسيفرلىق دامۋ, يننوۆا­تسيا­لار جانە اەروعارىش ونەركاسىبى مينيسترلىگىمەن پىسىقتالىپ جاتىر.