اۋدان اكىمى ءباسپاسوز قىزمەتىنىڭ مالىمەتىنشە, جاڭادان اشىلعان ەكى قاباتتى سپورت كەشەنىنىڭ اۋماعى 4 595,45 شارشى مەتر وندا دزيۋدو, قازاق كۇرەسى, ەركىن جانە گرەك-ريم كۇرەس زالدارى, بوكس, شاعىن فۋتبول, ۆولەيبول, باسكەتبول ويناۋعا بولاتىن امبەباپ جانە باسقا دا جاتتىعۋ زالدارى بار. زاماناۋي قۇرال-جابدىقتارمەن جابدىقتالعان كەشەندە اۋىل جاسوسپىرىمدەرى اتالعان سپورتتىڭ بارلىق تۇرىمەن اينالىسادى.
«بۇگىندە اۋدان تۇرعىندارىنا 134 سپورتتىق نىسان قىزمەت كورسەتىپ جاتىر. ونىڭ ىشىندە 2 ستاديون, 5 سپورت كەشەنى, 53 سپورت زال, 74 جازعى دەنەشىنىقتىرۋعا ارنالعان ورىن بار. مىنە, بۇگىن دوستىق اۋىلىندا 80 ورىندى جاڭا سپورت كەشەنى بوي كوتەرىپ, پايدالانۋعا بەرىلدى», دەدى اۋدان اكىمى الماس ابدينوۆ.
دوستىق اۋىلى اۋدان ورتالىعى ءۇشارال قالاسىنان 180 شاقىرىم قاشىقتىقتا ورنالاسقان. حالىق سانى 6 735 ادامدى قۇرايدى. جالپى, الىستاعى اۋىلداردا سپورتقا قىزىعاتىن جاستار قاراسى كوپ. ونى سارقان اۋدانىنا قاراستى ەكىاشا اۋىلىندا شاڭعى سپورتىنان وتكەن وبلىستىق چەمپيوناتتا بايقادىق. ادام اعزاسىنا پايدالى سپورت تۇرلەرى اۋداندا جىلدا وتكىزىلىپ كەلەدى. قارى مول تۇسەتىن تاۋلى ايماقتىڭ قىرات-قىرلارى شاڭعىشىلار مۇمكىندىگىن جان-جاقتى كورسەتۋىنە قولايلى.
راسىندا, ايەلدەر جانە ەرلەر اراسىنداعى جارىس تارتىستى ءوتتى. ەرلەر 1 500, 3 000 مەتر قاشىقتىققا سىنعا ءتۇستى. ولاردىڭ اراسىندا تالاي سىنعا ءتۇسىپ, شىڭدالعان, وزا شاپقان تاجىريبەلەرى مول جاس سپورتشىلار مەن ساقا سپورتشىلار دا بار. دەگەنمەن جاستار قاراپ قالعان جوق.
جان الىسىپ, اششى تەرى شىققان ەكى كۇندىك جارىستىڭ ناتيجەسىندە جالپى كوماندالىق ءبىرىنشى ورىندى كەربۇلاق اۋدانىنىڭ كومانداسى جەڭىپ الدى. جەڭىمپاز كومانداعا دەنەشىنىقتىرۋ جانە سپورت باسقارماسىنىڭ كۋبوگى مەن اقشالاي سىيلىق تابىستالدى. ال ەكىنشى, ءۇشىنشى ورىنداردى تالدىقورعان قالاسى مەن الاكول اۋدانىنىڭ كوماندالارى ءبولىسىپ, مەرەيى ۇستەم بولدى.
جوعارىدا ايتىلعان تاقىرىپ شەڭبەرىندە وبلىستىق ءماسليحاتتىڭ دەنساۋلىق ساقتاۋ, ءبىلىم بەرۋ, حالىقتى الەۋمەتتىك قورعاۋ, مادەنيەت, ىشكى ساياسات جانە سپورت ماسەلەلەرى جونىندەگى تۇراقتى كوميسسيا وتىرىسى وتكەن ەدى. سوندا وبلىستىق دەنەشىنىقتىرۋ جانە سپورت باسقارماسىنىڭ باسشىسى ۇلان رىسقۇل وڭىردە سپورتپەن ۇنەمى اينالىساتىن ەرەكشە قاجەتتىلىكتەرى بار جانداردىڭ سانى ارتقانىن ايتتى. ماسەلەن, سپورتپەن شۇعىلدانۋشىلار 2022 جىلى نەبارى 8 پايىز بولسا, قازىرگى ۋاقىتتا 13 پايىزدان اسقان. سالا جەتەكشىسى كۇن تارتىبىندە كوتەرىلگەن ماسەلەلەرگە ايرىقشا توقتالىپ, جاۋاپ بەردى.
«جالپى, وبلىس بويىنشا مۇگەدەكتەرگە ارنالعان سپورت تۇرلەرىمەن اينالىساتىن ادامداردىڭ سانى – 1 386. وبلىستىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى I توپقا, II توپقا جاتاتىن مۇگەدەكتەرگە, بالا كەزىنەن مۇگەدەكتىگى بار جاندارعا كومەكشىلەر تاعايىندادى. مۇمكىندىگى شەكتەۋلى سپورتشىلاردىڭ كومەكشىلەرى جارىستارعا جانە كۇندەلىكتى جاتتىعۋ جۇمىستارىنا قاتىسادى. 2023 جىلدىڭ قورىتىندىسى بويىنشا الەم, ازيا چەمپيوناتتارىندا جانە حالىقارالىق جارىستاردا جەتىسۋ ءوڭىرىنىڭ پاراسپورتشىلارى 14 التىن, 7 كۇمىس, 10 قولا جۇلدە يەلەندى. ەل چەمپيوناتتارى مەن رەسپۋبليكالىق جارىستاردا ولار 107 التىن, 80 كۇمىس, 64 قولا مەدال جەڭىپ الدى. سونىمەن قاتار حانچجوۋ قالاسىندا (قىتاي) تىرەك-قيمىل اپپاراتى بۇزىلعان سپورتشىلار اراسىندا وتكەن IV پاراليمپيادالىق ازيا ويىندارىندا وبلىستىق سپورتشىلار ءبىر كۇمىس جانە ءبىر قولا مەدالعا يە بولدى», دەدى ۇ.رىسقۇل.
ايتا كەتەيىك, بۇگىندە ۇزدىك ناتيجە كورسەتكەن 49 سپورتشى وبلىس اكىمىنىڭ قاۋلىسىنا سايكەس اي سايىنعى اقشالاي سىياقى الىپ وتىر.
ءماسليحات وتىرىسىندا پاريج وليمپياداسىنا قاتىساتىن سپورتشىلاردىڭ دايىندىق جۇمىستارىنا قاتىستى ماسەلەلەر دە قوزعالدى. وتكەن جىلعى الەم, ازيا چەمپيوناتتارىندا وبلىس سپورتشىلارى ابدۋلين يلفات, ەرەمەنكو الەكساندر, جاڭبىرباي داۋلەتكەلدى 2024 جىلعى پاريجدە وتەتىن ءXXXىىى جازعى وليمپيادا ويىندارىنا قاتىسۋ ءۇشىن 4 ليتسەنزيا جەڭىپ العانىن سالا باسشىسى العا تارتتى. سونىمەن قاتار سپورتتىڭ 6 ءتۇرى بويىنشا ليتسەنزيا الۋدى جوسپارلاپ وتىرعانىن ءسوز ەتتى. قازىرگى تاڭدا وبلىس سپورتشىلارىنا جان-جاقتى قولداۋ كورسەتىلىپ جاتقانىنان اقپار بەردى.
جەتىسۋ وبلىسىندا حالىقتىڭ سپورتپەن اينالىسۋىنا بارىنشا جاعداي جاسالىپ كەلەدى. بۇقارالىق سپورتتى دامىتۋ جانە ونى جولعا قويۋ باعدارلاماسى دا تياناقتى جۇزەگە اسىپ جاتىر. وبلىسىمىزداعى ءار ەلدى مەكەندە سپورتتىق كەشەن بوي كوتەرىپ, حالىق يگىلىگىنە بەرىلىپ جاتىر.
جەتىسۋ وبلىسى
