اتالعان دودانىڭ شيرەك فينالىندا ول رۋمىنيالىق گابي ادريانو بويتانودان باسىم ءتۇستى – 7:5, 7:6. جارتىلاي فينالدا دومينيكان رەسپۋبليكاسىنىڭ وكىلى روبەرتو سيد سۋۆەريگە سان سوقتىردى – 6:3, 4:6, 6:2. فينالدا ەكۆادورلىق اندرەس اندرادەمەن ابدەن تىرەستى. ءبىرىنشى سەت وڭتۇستىك امەريكا ويىنشىسىنىڭ پايداسىنا شەشىلدى. ەكىنشىسىندە, دميتري 1:5 ەسەبىمەن ۇتىلىپ جاتىپ, كەرەمەت كامبەك جاسادى. سول ەكپىنىمەن ءۇشىنشى سەتتى دە تابىستى اياقتادى. ناتيجەسىندە, 3:6, 7:6 جانە 6:4 ەسەبىمەن جەڭىسكە جەتكەن پوپكو اقش-تاعى تۋرنيرلەردە قاتارىنان ءۇشىنشى مارتە باس جۇلدەنى ولجالادى.
وكىنىشكە قاراي, ەلىمىزدىڭ ۇزدىك تەننيسشىلەرى وتكەن اپتانى ءساتسىز اياقتادى. ءباا-ءنىڭ دۋباي قالاسىندا ۇيىمداستىرىلعان جۇلدە قورى 3 211 715 دوللاردى قۇرايتىن ءتۋرنيردى ەلەنا رىباكينا جاپ-جاقسى باستادى. العاشقى اينالىمدا بوس بولعان وتانداسىمىز ەكىنشى كەزەڭدە الەمنىڭ بۇرىنعى ءبىرىنشى راكەتكاسى, بەلارۋستىك ۆيكتوريا ازارەنكونى جولىنان ىعىستىردى. ىلە-شالا WTA رەيتينگىندە 53-ورىندا تۇرعان پولشالىق ماگدالەنا فرەنحكە قارسى ويىندا 7:6, 3:6, 6:4 ەسەبىمەن باسىم ءتۇستى. شيرەك فينالدا رىباكينا الەمنىڭ 26 راكەتكاسى يتاليالىق ياسمين پاولينمەن كۇش سىناسۋعا ءتيىس ەدى. الايدا سىن ساعاتتا دەنساۋلىعى سىر بەرىپ, سونىڭ سالدارىنان ەلەنا جارىستى اياقتاۋعا ءماجبۇر بولدى.
دوحاداعى اتر ءتۋرنيرىنىڭ باستاپقى باسەكەلەرىندە قارسىلاستارىن قاپى قالدىرعان الەكساندر بۋبليك شيرەك فينالدا ءسۇرىندى. ول ويدا-جوقتا اۋستراليانىڭ وكىلى الەكسەي پوپىرينگە 4:6, 4:6 ەسەبىمەن ەسە جىبەردى. وسى كەزدەسۋدە جەڭىسكە جەتكەندە وتانداسىمىز توپ-20 تەننيسشىنىڭ قاتارىنا ەنەتىن ەدى. بىراق بۋبليككە ونداي باق بۇيىرمادى. تايلاندتا ونەر كورسەتىپ جاتقان جىبەك قۇلامباەۆا دا ءدال سول مەجەدە جەڭىلىستىڭ كەرمەك ءدامىن تاتتى. قازاق قىزى بەلگيالىق كلارا ۆلاسسەلاردان جەڭىلدى – 6:2, 4:6, 4:6.
دۋبايدا ATP-500 دوداسىنىڭ تۇساۋى كەسىلدى. بۇل جارىستا قازاقستاننىڭ قوس تەننيسشىسى باق سىناپ جاتىر. الەكساندر شەۆچەنكو العاشقى اينالىمدا الەمنىڭ ءتورتىنشى راكەتكاسى رەسەيلىك دانيل مەدۆەدەۆپەن كۇش سىناستى. ال الەكساندر بۋبليك چەحيالىق توماش ماحاچپەن شەبەرلىك بايقاستى. ءباا-دەگى ءتۋرنيردىڭ جۇلدە قورى 113 270 دوللاردى قۇرايدى.
