فوتو: KZgovernment
ۇكىمەت وتىرىسىندا استانا اگلومەراتسياسىن دامىتۋدىڭ 2024-2028 جىلدارعا ارنالعان كەشەندى جوسپارى قارالدى. پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ سوڭعى 10 جىلدا ەلوردا تۇرعىندارىنىڭ سانى 46%-عا ارتقانىن ايتتى. بولجام بويىنشا, 2035 جىلعا قاراي استانادا تۇرعىندارىنىڭ سانى 2,3 ملن ادامعا جەتپەك. اگلومەراتسيانى اۋماقتىق دامىتۋ شەڭبەرىندە بىرىڭعاي قالا قۇرىلىسى ساياساتىن ازىرلەۋ جانە ەلدى مەكەندەردىڭ اكىمشىلىك شەكارالارىن بەلگىلەۋ جوسپارلانىپ وتىر.
«قوسشى قالاسىندا 1 200 ورىندىق مەكتەپ, 280 ورىندىق بالاباقشا جانە 350 توسەك-ورىندىق كوپبەيىندى اۋرۋحانا سالىنادى. ەلوردادا ينۆەستورلاردىڭ ءوز قاراجاتى ەسەبىنەن 900 ستۋدەنتكە ارنالعان تاۋ-كەن تەحنيكالىق كوللەدجىن جانە بالالاردى وڭالتۋ ورتالىعىن سالۋ جوسپاردا بار», دەدى ن.بايبازاروۆ.
اۋىلدىق جەرلەردە بىرقاتار الەۋمەتتىك نىسان, سونىڭ ىشىندە 9 مادەنيەت ءۇيى مەن مەديتسينالىق-سانيتاريالىق العاشقى كومەك ورتالىعى بوي كوتەرەدى. اگلومەراتسيا اياسىندا ەكوقالاشىقتار قۇرۋ كوزدەلىپ وتىر. 940 گەكتاردان اساتىن اۋماقتا شاعىن بيزنەستى جۇرگىزۋگە ارنالعان ءۇي-جايلارى بار تۇرعىن ۇيلەر سالىنادى.
