مەملەكەتتىك رامىزدەردى جاپپاي ناسيحاتتاۋ جۇمىستارىن جۇرگىزۋ – جاۋاپتى ءىس. ۇلتتىق رامىزدەردىڭ يدەولوگيالىق ءمانى زور ەكەنىن ەسكەرە وتىرىپ, ولاردى بارلىق دەڭگەيدە دارىپتەپ, تانىمالدىعىن ارتتىرۋ ماقساتىندا ءپاتريوتيزمدى ناسيحاتتاۋ جونىندەگى 2024 جىلعا ارنالعان ءتىزىم دە بەكىتىلدى.
مۇنداعى باستى ماقسات – جاستارعا پاتريوتيزم يدەياسىن ناسيحاتتاۋ, تاريحتى, ەرلىكتى قاستەرلەپ, ەل تۇلعالارىن اسقاقتاتۋ.
حالقىمىزدىڭ ايگىلى پەرزەنتتەرىنە قۇرمەت كورسەتۋ – پارىزىمىز. سولاردىڭ ءبىرى – مەملەكەتتىك تۋدىڭ اۆتورى, سۋرەتشى, ديزاينەر شاكەن نيازبەكوۆ. بيىل تالعات مۇساباەۆتىڭ تۇڭعىش رەت مەملەكەتتىك تۋدى عارىشقا الىپ ۇشقانىنا 30 جىل تولادى. سونداي-اق جازۋشى-پۋبليتسيست, گەرالديكا سالاسىنىڭ زەرتتەۋشىسى ەربول شايمەردەنوۆتىڭ تۋعانىنا – 70 جىل. قازاقتىڭ ايگىلى كەسكىندەمەشىسى, گرافيك-سۋرەتشى, بەينەلەۋ ونەرىنىڭ نەگىزىن سالۋشىلاردىڭ ءبىرى ءابىلحان قاستەەۆتىڭ 100 جىلدىق مەرەيتويى.
وسىعان وراي «تۋىمىز – تورىمىزدە» اتتى جالپىۇلتتىق اكتسيا, جاستاردى پاتريوتتىققا باۋلۋدى كوكسەگەن «وتاندى ءسۇيۋ – جۇرەكتەن» قاناتقاقتى جوباسىن ىسكە اسىرۋدى, «جەتىستىگىم – تاۋەلسىزدىگىمنىڭ جەتىستىگى» اتتى ءتۇرلى ەتنوس وكىلدەرىنىڭ جاستارمەن كەزدەسۋىن ۇيىمداستىرۋدى قولعا الدىق. مەملەكەتتىك رامىزدەر كۇنىنە وراي «كوك تۋدىڭ جەلبىرەگەنى» اتتى پاتريوتتار فورۋمىن, مەملەكەتتىك تۋدى سالتاناتتى كوتەرۋ ءراسىمىن, «پاتريوتيزم داۋىسى» ارقىلى مەملەكەتتىك گيمندى ناسيحاتتاۋدى, ش.نيازبەكوۆتى ەسكە الۋعا ارنالعان سۋرەتشىلەر اراسىندا شىعارماشىلىق بايقاۋ ۇيىمداستىرۋدى جوسپارلاپ وتىرمىز.
ەندى بارلىق ورتا جانە ارناۋلى ءبىلىم بەرۋ مەكەمەلەرىندە ءار دۇيسەنبى ءبىر ۋاقىتتا مەملەكەتتىك گيمن ورىندالادى. ءبىلىم بەرۋ مەكەمەلەرىندە اپتاسىنا ءبىر رەت پاتريوتتىق رۋحتى دارىپتەۋگە ارنالعان ساباق وتكىزىلەدى. ءبىلىم بەرۋ مەكەمەلەرىندەگى «جاس ۇلان» ۇيىمدارى ۇزدىك وقۋشىلارعا مەملەكەتتىك ەلتاڭبا بەينەلەنگەن توسبەلگىلەردى تابىستايدى. «تۋىم – ماقتانىشىم!» اتتى پاتريوتتىق ديكتانت-كونكۋرس ۇيىمداستىرىلماق.
مادەنيەت سالاسىنداعى مۋزەي, كىتاپحانا, تەاتر, كلۋب, فيلارمونيا, حالىق شىعارماشىلىعى ورتالىقتارىندا مەملەكەتتىك رامىزدەرگە ارنالعان جۇيەلى پاتريوتتىق باعىتتا ءىس-شارالار وتكىزىلەدى. سونىمەن قاتار تەلەارنالار مەن راديولاردا «مەملەكەتتىك رامىزدەر كۇنىن مەرەكەلەۋدى قالاي جوسپارلاپ وتىرسىز؟» تاقىرىبىندا بليتس-ساۋالنامالار جۇرگىزىپ, الەۋمەتتىك جەلىلەردە ءبىر ۋاقىتتا مەملەكەتتىك تۋدىڭ فوتوسىن جاريالاپ, «تۋىم – ماقتانىشىم!» جالپىۇلتتىق چەللەندج وتكىزىلەدى.
ۇلتتىق قۇندىلىقتار ۇلتتى قۇرمەتتەۋدەن باستالادى. ۇلتتى قۇرمەتتەۋ – بارشا ۇلتتىق قۇندىلىقتاردى دارىپتەۋ, قۇرمەت كورسەتۋ, ساقتاۋ دەگەن ءسوز. ال ۇلتسىزدانۋ ۇلتتى, مەملەكەتتى السىرەتەدى. قوعام دامۋىن تەجەيدى. بۇل – تاريحي شىندىق. سوندىقتان تاريح, زامانا الدىنداعى ۇلى سىناق كەزىندە ءبىز تاڭداۋىمىزدى جاسادىق. الەمدىك وزىق قۇندىلىقتاردى يگەرە وتىرىپ, ونى ۇلتتىق قۇندىلىقتارىمىزبەن بايىتۋ – جاسامپازدىقتىڭ جولى.
رۋسلان حامزا,
مەملەكەتتىك رامىزدەردى ناسيحاتتاۋ جونىندەگى ۇلتتىق ورتالىقتىڭ اتقارۋشى ديرەكتورى
