سونداي جىگەرلى جاستىڭ قاتارىندا باۋىرجان دايىشقاليەۆ تا بار. وعان كەن ورنىنداعى كەشەندى تەحنولوگيالىق جەلى زاۋىتىنىڭ قوندىرعى وپەراتورى مىندەتىن اتقارۋ جۇكتەلگەن. كەن ورنىندا جۇمىس ىستەگەنىنە بەس جىلدان اسىپتى. كەن ورنى ورنالاسقان جىلىوي اۋدانىندا تۋىپ-وسكەن ول باستاپقىدا مەردىگەرلىك كومپانياعا جۇمىسقا ورنالاسقان. كەيىن «تەڭىزشەۆرويل» جشس-نىڭ زاۋىتىندا جۇمىس ىستەۋگە بەت بۇرعان.
«كىندىك قانىم تامعان اۋىلىم بۇرىن ەسكى قاراتون دەپ اتالعان. اۋىلىمىز 2000-جىلدارى «تەڭىزشەۆرويلدىڭ» قارجىلاي قولداۋىمەن جىلىوي اۋدانىنىڭ ورتالىعى – قۇلسارى قالاسىنا تاياۋ ماڭعا كوشىرىلدى. بالا كەزىمنەن «تەڭىز» كەن ورنى, وندا جۇمىس ىستەيتىن مۇنايشىلارىڭ جۇمىسى تۋرالى كوپ ەستىدىم. كەن ورنىندا جۇمىس ىستەسەم عوي دەپ ارمانداۋشى ەدىم. سول ماقساتىم ورىندالىپ, ەلىمىزدەگى ەڭ ءىرى كومپانيادا ەڭبەك ەتىپ ءجۇرمىن», دەيدى باۋىرجان. ونىڭ ايتۋىنشا, كەن ورنىنداعى جۇمىسقا ورنالاسۋ ءۇشىن الدىمەن الماتىدا ءبىلىم جەتىلدىرگەن. سودان سوڭ وزگە ماماندارمەن بىرگە ىرىكتەۋدەن وتكەن.
«جوعارى وقۋ ورنىن بىتىرگەن مامانعا بىردەن جۇمىس تابۋ وڭاي ەمەس. «جۇمىسقا كىرۋ ءۇشىن تانىس كەرەك. اقشا بەرمەسەڭ, جۇمىسقا المايدى», دەگەن قاڭقۋ سوزدەردى ءجيى ەستيمىز. بىراق ءۇمىت ۇزبەگەن, تالپىنعان جانعا مۇنداي بوس ءسوز اسەر ەتپەيدى. راس, جەتىستىككە قول جەتكىزۋ بىردەن مۇمكىن بولا قويمايتىن شىعار. جاس مامانعا الدىمەن تاجىريبە جيناقتاۋ قاجەت. مەن دە سونداي جولدان ءوتۋ ءۇشىن جۇمىسىمدى مەردىگەر كومپانيالاردا باستاۋدى ءجون كوردىم. ويتكەنى كەن ورنىنداعى ءار جۇمىستىڭ جاۋاپكەرشىلىگى بار. قاتەلىككە ۇرىنباۋ ءۇشىن بىلىكتىلىكتى شىڭداۋ كەرەك. قازىر مەنىڭ ومىرىمدە «تشو-عا دەيىن» جانە «تشو-دان كەيىن» دەگەن كەزەڭ بار. جۇمىسىم وزىمە ۇنايدى. كومپانيانىڭ الەۋمەتتىك پاكەتىمەن اتىراۋ قالاسىنان ءۇي ساتىپ الدىم», دەيدى ب.دايىشقاليەۆ.
وردا بۇزاتىن وتىز جاسقا قادام باسقان جىگىتتىڭ جۇمىس كۇنى اۋىسىمدى قابىلداۋدان باستالادى. باسشىلار وتكىزەتىن جيىنعا قاتىسىپ, اتقارىلار جۇمىستى پىسىقتاپ الادى. سودان كەيىن عانا 200-قوندىرعىنىڭ جۇمىس ۇدەرىسىن تەكسەرەدى. بۇل قوندىرعىدا مۇناي قۇرامى سۋ مەن كۇكىرتتەن تازارتىلادى. سول سەبەپتەن, قاۋىپسىزدىك ماسەلەسىنە باسا ءمان بەرىلەدى.
ء«ار ادام ءبارىن ءبىلىپ تۋمايدى عوي. جۇمىس ۇدەرىسىنە وراي ءبىلىمىن, كاسىبي بىلىكتىلىگىن جەتىلدىرۋى قيىن ەمەس. جاۋاپكەرشىلىكتى سەزىنگەن, ىزدەنىس پەن ادالدىق قاعيداتىن ۇستانعان ادام عانا ماقساتىنا جەتەدى. مەنىڭ ەندىگى ماقساتىم – بۇگىنگى دەڭگەيدە قالماي, اعىلشىن ءتىلىن مەڭگەرۋدى جەتىلدىرىپ, كومپانيانىڭ شەتەلدەگى تاجىريبە الماسۋ باعدارلاماسى ارقىلى بىلىكتىلىگىمدى ودان ءارى شىڭداۋ. بۇل ءۇشىن بارلىق مۇمكىندىك بار. اقش-قا بارىپ, ءبىلىمىن شىڭداپ كەلگەن ارىپتەستەرىم از ەمەس», دەدى ول.
قايرات جاڭاەۆ تا «تەڭىز» كەن ورنىندا وپەراتور بولىپ جۇمىس ىستەيدى. ول دا – جىلىوي اۋدانىنىڭ تۋماسى. مۇناي-گاز سالاسىنداعى كاسىبىن قازىرگى «جىلىويمۇنايگاز» باسقارماسىندا بۇرعىلاۋشىلىقتان باستاعان اكەسى ەرتىلەۋدىڭ جولىن جالعاستىرۋدى كوزدەپتى.
«مۇنايشى بولۋىما تۋعان اۋىلىمنىڭ مۇنايلى دەگەن اتاۋى اسەر ەتتى دەپ ويلايمىن. ونىڭ ۇستىنە اكەم مۇناي-گاز سالاسىندا 30 جىل جۇمىس ىستەدى. اكەمنىڭ مۇنايشىلىق كاسىبىن جالعاستىرۋ ءۇشىن مەكتەپتە ۇزدىك وقۋعا تالپىندىم. ءسويتىپ, 2012 جىلى گيمنازيانى «التىن بەلگىمەن» بىتىرگەن سوڭ ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىنە وقۋعا ءتۇستىم. مۇندا «مۇناي-گاز ءىسى» ماماندىعى بويىنشا جوعارى ءبىلىم الدىم», دەيدى قايرات.
جاس مامان «تەڭىز» كەن ورنىنداعى وندىرىستە بوس جۇمىس ورىندارى اشىلعانىن ينتەرنەت جەلىسىنەن كورگەن. ءسويتىپ, كومپانيانىڭ رەسمي سايتىنا تۇيىندەمەسىن جولداپتى. كومپانيانىڭ «ادام رەسۋرستارىن باسقارۋ» بولىمىندەگى اڭگىمەلەسۋ مەن تەستىلەۋدەن ءوتىپ, جۇمىسقا شاقىرتۋ العان.
«تەحنولوگيالىق قوندىرعى وپەراتورى قىزمەتىن 2020 جىلى باستاعان ەدىم. قازىر دمك قوندىرعىسىندا وپەراتور مىندەتىن اتقارىپ ءجۇرمىن. ارينە, ءۇش جىلدىق ەڭبەك ءوتىلى كوپ ەمەس. بىراق سوعان قاراماستان, مۇندا ءوزىمنىڭ جانە ارىپتەستەرىمنىڭ قاۋىپسىزدىگىنە قامقور بولۋدى ۇيرەندىم. ويتكەنى ەڭبەك قاۋىپسىزدىگىن ساقتاماي, العا ءبىر قادام اتتاۋ مۇمكىن ەمەس», دەيدى ق.جاڭاەۆ.
ول اۋىسىمارالىق دەمالىسىن شەتەلدە ەمەس, قۇلسارى قالاسىندا وتكىزگەندى قالايدى. ويتكەنى بۇل شاعىن قالانىڭ ينفراقۇرىلىمى جاقسارىپ كەلەدى. مۇندا كومپانيانىڭ قولداۋىمەن ورتالىق ستاديون, اۋرۋحانا, بالاباقشا سەكىلدى الەۋمەتتىك نىساندار بوي كوتەرگەن.
«كەن ورنىندا جۇمىس ىستەيتىن بارلىق قىزمەتكەر ءبىر ۇلكەن وتباسىنىڭ مۇشەسى سەكىلدى. باۋىرىنا كومەكتەسكەندەي, ءبىر-بىرىنە قول ۇشىن سوزۋعا ۇمتىلىپ تۇرادى. جۇمىستىڭ قاۋىپسىز اتقارىلعانىن ورتاق يگىلىك دەپ تۇسىنەدى», دەگەن ويىمەن ءبولىستى جاس مامان.
اتىراۋ وبلىسى
