فوتو: baq.kz
قازاقستان ديپلوماتتارى مەن ۆاشينگتونداعى حالىقارالىق فورتەپيانو ونەرى كەڭەسىنىڭ قولداۋىمەن اقش-تاعى قازاقستان ەلشىلىگىندە «كوكتەم شۋاعى» كلاسسيكالىق مۋزىكا كەشى بولىپ ءوتتى.
ءىس-شاراعا اقش مەملەكەتتىك دەپارتامەنتىنىڭ, ۆاشينگتوننىڭ ديپلوماتيالىق كورپۋسى مەن امەريكالىق ساراپشىلار قاۋىمداستىعىنىڭ وكىلدەرى, سونداي-اق مادەنيەت جانە ونەر قايراتكەرلەرى قاتىستى. كلاسسيكالىق شىعارمالاردى ماەسترو, ۆاشينگتون كلاسسيكالىق مۋزىكا قوعامىنىڭ نەگىزىن قالاۋشى, ۆيرتۋوز پيانيست ناتاليا كازاريان ورىندادى.
كونتسەرت بارىسىندا قوناقتارعا بەلگىلى كومپوزيتور ناعىم مەڭدىعاليەۆتىڭ «دالا» كومپوزيتسياسى ورىندالدى. كەلگەن قوناقتاردى ءتانتى ەتكەن ەلىمىزدىڭ جارقىن تۋىندىسىمەن قاتار يوگانن سەباستيان باح, ليلي بۋلانجەر جانە موريس راۆەلدىڭ كلاسسيكالىق مۋزىكاسى ۇسىنىلدى.
كونتسەرتتىك باعدارلاما الدىندا ءسوز العان قازاقستاننىڭ اقش-تاعى توتەنشە جانە وكىلەتتى ەلشىسى ەرجان اشىقباەۆ ونەر مەن مۋزىكانىڭ شەكارا تاڭدامايتىنىن ءارى بەرىك قارىم-قاتىناستاردى نىعايتۋعا كومەكتەسەتىنىن ەرەكشە اتاپ ءوتتى. مۋزىكا ءارتۇرلى مادەنيەت پەن ۇلت وكىلدەرىن بىرىكتىرە الاتىن امبەباپ ءتىل ەكەنىن دە ءسوز ەتتى.
– قازاقستاندى جاقسى كورەمىن. مەنىڭ ويىمشا, قازاق حالقى – ەرەكشە, كەڭپەيىلدى, اقكوڭىل, ادال, شىنشىل, عاجاپ, ەڭبەككە بەيىم حالىق. «قازاق حالقىن ەرەكشە قۇرمەتتەيمىن جانە ءوزىمدى قازاقپىن دەپ ەسەپتەيمىن, – دەدى ۆاشينگتونداعى ديپلوماتيالىق قوعامدىق قارىم-قاتىناستار ۇيىمىنىڭ وكىلى رودا سەپتيليچي.
اتالعان ءىس-شارا تەك مۋزىكا مەرەكەسى عانا ەمەس, سونىمەن قاتار قازاقستان مەن اقش حالىقتارى اراسىنداعى مادەني بايلانىستى نىعايتۋداعى ماڭىزدى قادام ەكەنى ءسوزسىز.
