بىرنەشە اپتا بۇرىن يلون ماسكتىڭ Neuralink ستارتاپى ءبىرىنشى ادامنىڭ ميىنا نەيرويمپلانت ەنگىزگەن ەدى. قازىر بەلگىلى بولعانداي, وتادان كەيىنگى ساۋىقتىرۋ ءساتتى وتكەن. ناۋقاس يمپلانتاتسيا مۇمكىندىكتەرىن قولدانا باستادى. قۇرىلعى ويلاۋ ارقىلى تەلەفوندى نەمەسە كومپيۋتەردى باسقارۋعا مۇمكىندىك بەرەدى. ونەرتاپقىشتىڭ ايتۋىنشا, العاشقى پايدالانۋشىلار اياق-قولدارى جانسىزدانعان جاندار بولماق. بۇل عىلىمي توڭكەرىس «تەلەپاتيا» دەگەن اتاۋ الدى.
– كەشە ءبىرىنشى ادامعا Neuralink چيپ سالدى. ول قازىر قالپىنا كەلدى. باستاپقى ناتيجەلەر نەيروندىق جۇيەلەردىڭ انىقتالۋىنا بايلانىستى, – دەپ جازدى ماسك.
يلون ۇسىنعان تەحنولوگيانىڭ باستى جەتىستىكتەرىنىڭ ءبىرى – ينتەرفەيستىڭ سىمسىز جانە شاعىن بولىپ شىققانى. يمپلانت نەيروحيرۋرگيالىق روبوت ەنگىزگەن ەلەكترودتار جانە جۇقا پوليمەرلى جىپتەردەن تۇرادى. سونىمەن قاتار چيپتە سيگنال بەرۋگە ارنالعان قۋاتتى شاعىن كۇشەيتكىشتەر بار. ءبىر ەسكەرەر دۇنيە, ماسكتىڭ كومانداسى بۇرىن نەيرويمپلانتاتسيامەن اينالىسقانداردىڭ بارلىعىندا كەزدەسەتىن ەڭ ۇلكەن ماسەلەنى شەشتى. ول – بيوۇيلەسىمدىلىك پەن قاۋىپسىزدىك.
بۇعان دەيىن بۇل ناتيجەگە جەتۋ ءۇشىن جانۋارلارعا بىرقاتار سىناق جاسالعان ەدى. سىناق بارىسىندا مايمىلدار تەك ميدى پايدالانىپ كومپيۋتەرلىك ويىندار وينايتىن دەڭگەيگە جەتكەن. بۇل تاجىريبەلەر جانۋارلار قۇقىعىن قورعاۋ توپتارىن ءدۇر سىلكىندىرىپ, نارازىلىق تا تۋعىزدى. دەگەنمەن اقش-تىڭ ازىق-ت ۇلىك جانە ءدارى-دارمەك باسقارماسى 2023 جىلدىڭ مامىرىندا Neuralink كومپانياسىنا ادامعا كلينيكالىق سىناقتار جۇرگىزۋگە رۇقسات بەردى.
ەسكە سالا كەتەيىك, Neuralink – 2017 جىلى يلون ماسك نەگىزىن قالاعان الىپ كومپانيا. ول سول كەزدەن باستاپ جاراقات العان ادامدارعا تەك ءوز ويلارىن قولدانا وتىرىپ, گادجەتتەردى باسقارۋعا كومەكتەسەتىن ينتەرفەيس قۇرىلعىسى كەلگەن ەدى. ەندى سول ماقساتىنا جەتكەن دە سەكىلدى.
