فوتو: gov.kz
سالا باسشىسىنىڭ ايتۋىنشا, زاڭ جوباسى ەلىمىزدە قاۋىپسىز ونلاين ورتا قۇرۋعا باعىتتالعان. ء«بىز زەرتتەگەن حالىقارالىق تاجىريبە كورسەتكەندەي, جەتەكشى ەلدەر ونلاين-جارنامانىڭ ماڭىزدى رولىنە جانە ونى ونلاين-پلاتفورمالاردا كورسەتۋ تەتىكتەرىنە ەرەكشە نازار اۋدارادى. سونىمەن قاتار ونلاين-جارنامانىڭ اشىقتىعىن ارتتىرۋعا باعىتتالعان تالاپتاردى كوزدەيدى. «ادىلەت» پورتالىندا جەلىدەگى جارنامانى تاڭبالاۋ ەرەجەلەرىن بەلگىلەيتىن بۇيرىق جاريالاندى», دەدى ايدا بالاەۆا.
مينيستر بۇل ەرەجەلەر بيزنەسكە اسەر ەتۋ ءۇشىن وڭ باعالانعانىن جانە تولىعىمەن ەلىمىزدىڭ ونلاين سەگمەنتىندە كەڭ تارالعان قازىرگى تاجىريبەگە نەگىزدەلگەنىن اتاپ وتكەن. وسى ەرەجەلەردى قالىپتاستىرۋ كەزىندە كوممەرتسيالىق نەگىزدە ورنالاستىرىلعان كونتەنتتى ءوز بەتىنشە بەلگىلەيتىن مەديا-سۋبەكتىلەر تاجىريبەسىنە سۇيەنگەنىن تىلگە تيەك ەتكەن ول ءوز كەزەگىندە وسى ترەندتى ەلدىڭ بۇكىل ينتەرنەت كەڭىستىگىنە تاراتۋ ءجون دەپ ەسەپتەيدى.
ايدا بالاەۆا وسى ەرەجەگە سايكەس ينفليۋەنسەرلەر (بلوگەرلەر) كوممەرتسيالىق نەمەسە شارتتىق نەگىزدە ورنالاستىراتىن ونلاين-جارنامانى تاڭبالاۋعا ءتيىس ەكەنىن ايتادى. ولار جاريالانىمنىڭ باسىندا نەمەسە سوڭىندا ونلاين ورتادا بەلسەندى قولدانىلاتىن تومەندەگىدەي تۇجىرىمداردىڭ ءبىرىن كورسەتۋى كەرەك. مينيستر بۇدان ءارى «جارناما»; «جارنامالىق ماتەريال»; «سەرىكتەستىك ماتەريال»; «دەمەۋشىلىك ماتەريال»; «جارناما قۇقىعىندا»; «دەمەۋشىمەن تولەنگەن»; «PR قۇقىعىندا» سەكىلدى تاڭبالار تىزبەسىن ۇسىندى.
«الەۋمەتتىك جارنامانى (قايىرىمدىلىق جانە كوممەرتسيالىق ەمەس سيپاتتاعى باسقا دا قوعامدىق پايدالى ماقساتتارعا قول جەتكىزۋگە باعىتتالعان) جانە جەدەل حابار الماسۋ قىزمەتتەرىندە (مەسسەندجەرلەر) ورنالاستىرىلاتىن جارنامانى بەلگىلەۋدىڭ قاجەتى جوق», دەپ اتاپ ءوتتى مينيستر.
ايتا كەتسەك, اتالعان ەرەجەلەر وسى جىلدىڭ 2 ناۋرىزىنان باستاپ كۇشىنە ەنبەك.
