سۋرەتتى تۇسىرگەن ەرلان ومار, «ەQ»
ءمينيستردىڭ ايتۋىنشا, اگروونەركاسىپ سالاسىنا جۇرگىزىلگەن تالداۋعا سالالىق بيزنەس-قوعامداستىق وكىلدەرى دە قاتىسقان. سونىڭ ناتيجەسىندە بىرقاتار جۇيەلى ماسەلە مەن كەدەرگى بولىپ تۇرعان فاكتورلار انىقتالىپتى. سونىڭ ءبىرىنشىسى – ستاتيستيكانىڭ بۇرمالانۋى. بۇنىڭ سالدارىنان سالا بويىنشا دۇرىس ەسەپتەلمەگەن دەرەكتەرگە سۇيەنە وتىرىپ, شەشىم قابىلدانىپ كەلگەن.
– ءبىز ەندى سەنىمدى دەرەكتەرگە سۇيەنىپ, زامان تالابىنا ساي ەسەپتەۋدىڭ جاڭا تاسىلدەرىن قولدانۋىمىز قاجەت. وسى باعىتتا جۇمىستى باستاپ تا كەتتىك. ارنايى كوميسسيا قۇرىلدى. كوميسسيا مۇشەلەرىنە اۋىل شارۋاشىلىعىنداعى دەرەكتەردى رەتكە كەلتىرۋ مىندەتى جۇكتەلدى. ەكىنشى ماسەلە – وسىمدىك شارۋاشىلىعىنداعى ءارتاراپتاندىرۋ نەگىزىنەن قاعاز جۇزىندە جۇرەدى. ءۇشىنشى ماسەلە – قولدانىلاتىن اگروتەحنولوگيالاردىڭ دەڭگەيى مەن اۋىل شارۋاشىلىعى تەحنيكاسىن جاڭارتۋ قارقىنىنىڭ تومەندىگى. وسىلاردىڭ ناتيجەسىندە بىزدەگى ونىمدىلىك تومەن جانە وندىرىلگەن ءونىمنىڭ قۇنى جوعارى, – دەپ مالىمدەدى مينيستر.
ا.ساپاروۆ سونداي-اق سۋارمالى ەگىنشىلىكتىڭ الەۋەتى تولىق پايدالانىلمايتىنىن, مال شارۋاشىلىعى ونىمدىلىگىنىڭ تومەندىگىن دە باسا ايتىپ ءوتتى. اتالعان ماسەلەلەر وڭ شەشىمىن تابۋى ءۇشىن الداعى جوسپارلى جۇمىستاردى ايتىپ بەردى.
– مەملەكەت باسشىسى اتاپ وتكەندەي, اۋىل شارۋاشىلىعى ءۇشىن ەڭ وزەكتى ماسەلە – سالانىڭ تولىققاندى قارجىلاندىرىلماۋى. بۇل جوعارىدا اتالعان كوپتەگەن ماسەلەنىڭ نەگىزگى تامىرى. قارىزعا بەرىلەتىن قارجىنىڭ تاپشىلىعىنا بايلانىستى فەرمەرلەر تىڭايتقىشتاردى, وسىمدىكتەردى قورعاۋ قۇرالدارىن ءتيىستى مولشەردە پايدالانبايدى, ەسكىرگەن تەحنيكامەن جۇمىس ىستەيدى. بۇل سالاداعى تيىمدىلىك پەن ونىمدىلىكتىڭ تومەندىگىنە بىردەن-ءبىر سەبەپ. ماسەلەنى تولىعىمەن شەشۋ ءۇشىن فەرمەرلەردى ءوز ۋاقىتىندا قولجەتىمدى نەسيە قاراجاتتارىمەن قامتاماسىز ەتۋ ماڭىزدى. پرەزيدەنت تاپسىرماسى بويىنشا بيىل اۋىل شارۋاشىلىعىنا قاراجات تارتۋ بويىنشا ۇلكەن جۇمىس جۇرگىزىلەتىن بولادى. بۇعان بيۋدجەت قارجىسى عانا ەمەس, باسقا دا كوزدەردەن, ونىڭ ىشىندە ەكىنشى دەڭگەيلى بانكتەردىڭ كاپيتالى دا قاراستىرىلادى, – دەدى ول.
ءمينيستردىڭ سوزىنشە, جىل سايىن كوكتەمگى ەگىس جانە كۇزگى جيىن-تەرىم جۇمىستارىنا جەڭىلدەتىلگەن 1,5 ترلن تەڭگە نەسيە ءبولىنىپ, بۇل قارجى قاجەتتىلىكتى تولىق قامتاماسىز ەتۋگە باعىتتالۋعا ءتيىس. سونداي-اق 450 ملرد تەڭگە قاراجات اۋىل شارۋاشىلىعى تەحنيكاسىن جاڭارتۋ جونىندەگى تاپسىرمانى ورىنداۋ ءۇشىن 8-10 پايىزبەن جەڭىلدەتىلگەن ليزينگكە باعىتتالادى. ال ينۆەستيتسيالىق جوبالاردى قارجىلاندىرۋعا 800 ملرد تەڭگە قاجەت. قازىر قارجىلاندىرۋ كوزدەرى قايتا پىسىقتالىپ جاتقان كورىنەدى.
– بۇل قاراجاتتىڭ بارلىعى قايتارىمدى. دۇرىسى, فەرمەرلەر قولجەتىمدى نەسيە الۋى ءۇشىن جۇمىس ىستەپ جاتىرمىز. جالپى وتاندىق اۋىل شارۋاشىلىعىن كوتەرۋ – ورتاق مىندەتىمىز. بۇل باعىتتا جالعىز مينيسترلىك قانا ەمەس, وبلىس اكىمدىكتەرى دە پرەزيدەنت تاپسىرماسىن ورىنداۋ ءۇشىن اگروونەركاسىپ كەشەنىن دامىتۋعا بارىنشا قولداۋ كورسەتۋلەرگە ءتيىس. ال جەڭىلدىكپەن نەسيە, جالپى مەملەكەتتىك قولداۋ العان فەرمەرلەر ناقتى ناتيجە كورسەتۋى كەرەك. ءوندىرىس كولەمىن ۇلعايتىپ, ءونىمنىڭ قۇنىن كوتەرمەۋگە ءتيىس. بۇل – ەلدەگى شارۋاشىلىقتاردىڭ باسەكەگە قابىلەتتىلىگىن دە ارتتىرادى, – دەدى مينيستر.
