سۋرەتتەردى تۇسىرگەن – رۋسلان كادىروۆ
بۇگىندە اتالعان كلۋب پرەزيدەنتى, جازۋشى ەسبولات ايدابوسىن جاستارمەن قاتار ۇلكەندەردىڭ دە شىعارماشىلىق كەشىنىڭ وتۋىنە جاردەمدەسىپ ءجۇر. رەسپۋبليكالىق دەڭگەيدە ادەبي بايقاۋلار وتكىزىپ, ارناسىن كەڭىتىپ, اۋقىمىن ۇلعايتىپ العان «Janr» ادەبي كلۋبىنىڭ بۇل جولعى كەشى بۇرىنعىدان وزگەشە ورنەك تاپتى. كومپوزيتسياعا قۇرىلىپ, ون ەكى اقىننىڭ ولەڭى وقىلىپ, سول شايىرلاردىڭ سوزىنە جازىلعان ون ەكى ءان ورىندالعان كەشتە شىنىمەن دە جۇرەك جىرلاپ, ءان اۋەلەدى.
««Janr» ادەبي كلۋبىنىڭ تاعى ءبىر جاڭاشا باستاماسى ءوز جەمىسىن بەردى. بۇل ءوزى جەتىسۋ رۋحانيات الەمىندە مەرەكەلى كۇن بولدى. «تۋعاندا دۇنيە ەسىگىن اشادى ولەڭ, ولەڭمەن جەر قوينىنا كىرەر دەنەڭ», دەگەن اباي اتامنىڭ ايتقانى راس بولسا, بۇل ولەڭ دەگەن الەمنەن ولگەندە بارىپ ءبىر-اق اجىرايتىنىمىز حاق. ديىرمەننىڭ تاسىنداي شىر اينالعان دۇنيەدە كۇيبەڭ تىرلىكتىڭ يلەۋىنەن ءبىر ءسات الىستاپ, كوڭىلىمىزگە شۋاق توگەتىن, جانىمىزعا قۋات بەرەتىن كەستەلى جىر مەن اۋەزدى انگە بوي الدىرعاننىڭ دا ەش ارتىقتىعى جوق», دەيدى وبلىستىق «جەتىسۋ» گازەتىنىڭ باس رەداكتورى, اقىن جۇماتاي وسپان ۇلى.
قازاق ەستراداسىنىڭ «قارا بالاسى» اتانعان سايات مەدەۋوۆ تالاي انشىلەر شىعارماسىن ساحنا تورىنە الىپ شىققان كومپوزيتور ماقسات جاۋتىكوۆ جانە مەرۋەرت مۇحتارقىزى سىندى ارنايى كەلگەن قوناقتارمەن قاتار تالدىقورعاندىق ونەرپازدار كەشتى ەرەكشە اسەرگە بولەدى. بىردە كوڭىلدى اسەم ءان تەربەسە, بىردە جاۋھار جىر جان باۋرادى.
رەجيسسەر جاسۇلان زامانبەكوۆ كەشتى مودەرن جانرىندا جاڭاشا باعىتقا بۇرىپ, از ۋاقىتتىڭ ىشىندە كوركەم دۇنيەگە اينالدىرعان. يگىلىكتى ىسكە سەپ بولعان وبلىستىق مادەنيەت باسقارماسى, دانەش راقىشەۆ اتىنداعى فيلارمونياسى اقىن-جازۋشىلارعا بارىنشا قولداۋ كورسەتتى. قالامگەرلەرگە دەگەن پەيىلىن العاۋسىز نيەتتەرىمەن ءبىلدىرىپ, تىك تۇرىپ قىزمەت ەتتى.
استىن سىزىپ ايتا كەتەرلىگى, زال تولا كورەرمەن ەشكىمنىڭ كۇشتەۋىنسىز, اقىنداردىڭ شاقىرۋىن قابىل العان جاندار مەن جارنامادان كورىپ, جۇرەگىنىڭ قالاۋىمەن كەلگەندەر بولدى. اگاراكي تاپسىرمامەن كەلگەندەر بولسا, بەكەر كەلمەگەنىنە كەش سوڭىندا كوز جەتكىزدى. ويتكەنى كورەرمەن كەش سوڭىندا شىمىلدىق جابىلعانعا دەيىن قوشەمەت كورسەتىپ تۇردى. كەتۋگە اسىعىپ, ەسىككە قاراي تۇرا جۇگىرگەن جان بالاسى بولمادى.
جەتىسۋ وبلىسى
