رەسپۋبليكالىق «زورلىق-زومبىلىعى جوق قوعام» باستاماسى اياسىندا بيىلعى قاڭتار مەن ماۋسىم ايلارىندا بىرنەشە ءىس-شارا وتكىزۋ جوسپارلانعان. جوبانىڭ العاشقى كەزەڭىندە 14-18 جاستاعى بالالار اراسىندا «بالالار زورلىق-زومبىلىققا قارسى» رەسپۋبليكالىق سۋرەت بايقاۋى ءوتىپ وتىر. ونەر سايىسىنىڭ ماقساتى – وسكەلەڭ ۇرپاق بويىندا بەلسەندى ازامات ۇستانىمىن قالىپتاستىرۋ.
قازىرگى كەزدە بايقاۋ قورجىنىنا ەلىمىزدىڭ بارلىق ايماعىنان 400-دەن استام جۇمىس كەلىپ تۇسكەن. سۋرەتتەردىڭ 17 پايىزى جانۋارلارعا, 36-سى وتباسىنداعى, 23-ءى پسيحولوگيالىق زورلىق-زومبىلىققا قاتىستى بولسا, 24-ءى مەكتەپتەگى بۋللينگ تاقىرىبىن قوزعايدى.
جيىندا الماتى قالاسى اكىمدىگى الەۋمەتتىك دامۋ ءبولىمىنىڭ باس ينسپەكتورى, ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ حاتشىسى گۇلنار ءامىروۆا, پرەزيدەنت جانىنداعى ايەل ءىسى جانە وتباسى-دەموگرافيالىق ساياساتىنىڭ ۇلتتىق كوميسسياسىنىڭ مۇشەسى گۇلنار وماروۆا ءسوز سويلەپ, ءىس-شارانىڭ ماڭىزىنا توقتالدى.
«زورلىق-زومبىلىعى جوق قوعام» جوباسىنىڭ باستاماشىسى ءارى ۇيىمداستىرۋشىسى «EDU Stream» حالىقارالىق كومپانيالار توبىنىڭ باس ديرەكتورى ناتاليا مۇحامەدجانوۆا بايقاۋ شارتى بويىنشا بالالار مەكتەپتەگى بۋللينگ, وتباسىنداعى زورلىق, جانۋارلارعا كۇش كورسەتۋ سياقتى تاقىرىپتاردى تاڭداعانىن اتاپ ءوتتى. «كەلىپ تۇسكەن سۋرەتتەردى سارالاي وتىرىپ, ماسەلەنىڭ ءتۇپ-تامىرى الدەقايدا تەرەڭدە جاتقانىن كورەمىز. جوبانى ىسكە اسىرۋ ارقىلى باستاماشى توپ ەلىمىزدىڭ ءاربىر ازاماتىن بۇل جاعدايدان بەيتاراپ قالماۋعا, اسىرەسە بالالاردى قورعاۋعا شاقىردى», دەيدى ول.
الماتى قالاسى پوليتسيا دەپارتامەنتى جەرگىلىكتى پوليتسيا قىزمەتى باسشىسىنىڭ ورىنباسارى, پوليتسيا مايورى ايدىن ەلەۋسىزوۆ وتباسىلىق جانجالدا بالالار دەنە جاراقاتىمەن قاتار پسيحولوگيالىق تۇرعىدان زارداپ شەگەتىنىن ايتادى. ونىڭ دالەلىن بالالار سالعان سۋرەتتەردەن دە كورۋگە بولادى. قازىرگى كەزدە مەملەكەتتىك ورگاندار قيىن جاعدايداعى وتباسىلاردىڭ الەۋمەتتىك جاعدايىنا قارايلاسۋ, بالالاردىڭ ءبىلىم الۋىنا تۇراقتى قولداۋ كورسەتىپ كەلەدى. «بۇل ىستە شەتەلدىك تاجىريبەگە دە نازار اۋدارعان ابزال. مىسالى, زورلىق-زومبىلىق كورسەتكىشى تومەن ەلدەر قاتارىندا تۇرعان نورۆەگيادا الەۋمەتتىك جاعدايلار تولىق شەشىلگەن. مۇندا جاستار وتباسىن قۇرۋدى الدىن الا جوسپارلايدى. سالىستىرمالى تۇردە الساق, الماتى قالاسىندا ايەلدەرگە قارسى قىلمىس بىلتىر 35 پايىزعا تومەندەدى. سونداي-اق وتكەن جىلى مىڭنان استام ايەلگە قولداۋ كورسەتىلسە, بيىل دا بۇل جۇمىس ءبىلىم, دەنساۋلىق, پوليتسيا مەكەمەلەرى تاراپىنان تۇراقتى ىسكە اسىپ كەلەدى», دەيدى پوليتسيا مايورى.
«زورلىق-زومبىلىعى جوق قوعام» جوباسى بالالار بايقاۋىمەن عانا شەكتەلمەيدى. جۇمىس توبى ەقىۇ, بۇۇ, اۋستريا مەن قازاقستاننىڭ زورلىق-زومبىلىقپەن كۇرەسكە قارسى قۇزىرلى ورگاندارى وكىلدەرى, ساراپشىلارمەن كەزدەسىپ, وزىق تاجىريبەلەردى سارالاماق.
«زورلىق-زومبىلىعى جوق قوعام» جوباسى اياسىندا الەۋمەتتىك جەلىدە #مەنزورلىققاقارسىمىن حەشتەگىمەن فلەشموب وتەدى. جوبا بيىل ماۋسىم ايىندا استانادا وتەتىن فورۋمدا قورىتىندىلانادى.
الماتى
