فوتو: altyalash.kz
فورۋمنىڭ اشىلۋىندا ءسوز سويلەگەن قاۋىمداستىق باسشىسى يسلامبەك سالجانوۆ مەملەكەت باسشىسى قاسىم-جومارت كەمەل ۇلى توقاەۆ قازاقستاندا ۇلتتىق سپورتتى جۇيەلى دامىتۋعا ەرەكشە نازار اۋداراتىنىن اتاپ ءوتتى. ۇلتتىق سپورتپەن اينالىساتىن وتانداستارىمىزدىڭ سانى جىل ساناپ ارتىپ كەلەدى.
«قازىرگى تاڭدا قاۋىمداستىققا كىرەتىن رەسپۋبليكالىق فەدەراتسيالاردىڭ جارتىسى حالىقارالىق مارتەبە الدى. كەيبىرى بۇرىننان بار حالىقارالىق ۇيىمداردىڭ قۇرامىنا ەندى. ولاردىڭ قاتارىندا اۋدارىسپاق, كوكپار, قۇسبەگىلىك, جامبى اتۋ, توعىزقۇمالاق فەدەراتسيالارى بار. بۇل قازاقستاندا ۇلتتىق سپورت تۇرلەرى دامۋدىڭ جاڭا دەڭگەيىنە قادام باسىپ, كۇن وتكەن سايىن تانىمال بولىپ كەلە جاتقانىن ايعاقتايدى», دەدى يسلامبەك سالجانوۆ.
فورۋم بارىسىندا ۇلتتىق سپورت قاۋىمداستىعى ەتنوسپورتتى دامىتۋعا قاتىستى بارلىق رەگلامەنت پەن راسىمدەردىڭ حالىقارالىق ستاندارتتارعا ساي بولۋى ءۇشىن بىرقاتار ۇسىنىس ايتىلدى. ولاردىڭ قاتارىندا دۇنيەجۇزىلىك كوشپەلىلەر ويىندارىنىڭ نەگىزگى سپورتتىق باعدارلاماسىن بىرىزدەندىرۋ, حالىقارالىق جارىستاردىڭ بىرىڭعاي كۇنتىزبەلىك جوسپارىن جاساۋ, بۇكىلالەمدىك ەتنوسپورت كونفەدەراتسياسىمەن بىرلەسىپ الداعى 5-ءشى دۇنيەجۇزىلىك كوشپەلىلەر ويىندارىندا تورەشىلىك ەتۋ ساپاسىن ارتتىرۋ ءۇشىن ارنايى كۋرستار ۇيىمداستىرۋ جانە ت.ب. بار.
ەتنوسپورت سالاسىنداعى ىنتىماقتاستىقتى نىعايتۋ ماقساتىندا بۇكىلالەمدىك ەتنوسپورت كونفەدەراتسياسىنىڭ پرەزيدەنتى نەدجمەتتين بيلال ەردوعان قازاقستان رەسپۋبليكاسى ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆقا رەسمي مۇشەلىك تۋرالى سەرتيفيكاتتى تابىس ەتىپ, ەتنوسپورتتى ودان ءارى جاھاندىق دەڭگەيدە دامىتۋعا جانە بىرىكتىرۋگە ءسوزسىز سەرپىن بەرەتىن الداعى 5-ءشى دۇنيەجۇزىلىك كوشپەلىلەر ويىندارىن وتكىزۋدە ساتتىلىك تىلەدى.
سونداي-اق فورۋم بارىسىندا بۇكىلالەمدىك ەتنوسپورت كونفەدەراتسياسى مەن ءداستۇرلى سپورت تۇرلەرىنىڭ ۇلتتىق قاۋىمداستىقتارى اراسىندا ءوزارا تۇسىنىستىك تۋرالى مەموراندۋمعا قول قويىلدى. ونىڭ ماقساتى – حالىقارالىق جارىستاردى وتكىزۋ كەزىندە جاھاندىق ەتالون رەتىندە قىزمەت ەتەتىن ءداستۇرلى سپورت تۇرلەرى مەن ويىندارى ءۇشىن كونفەدەراتسيانىڭ بىرىڭعاي ەرەجەلەرىن ازىرلەۋ.
الەمنىڭ 60-تان اسا ەلىنەن كەلگەن حالىقارالىق قاتىسۋشىلار ءۇشىن الداعى 5-ءشى دۇنيەجۇزىلىك كوشپەلىلەر ويىندارىنىڭ باعدارلاماسى تانىستىرىلدى.
فورۋم سوڭىندا ءداستۇرلى سپورت سالاسىنداعى 5-ءشى حالىقارالىق سىيلىق تابىس ەتىلدى. اتالعان سىيلىقتى ەلىمىزدەن اكادەميالىق ساناتتا – ءال-فارابي اتىنداعى قازۇۋ دەنە تاربيەسى جانە سپورت كافەدراسىنىڭ پروفەسسورى ەلەمەس ءالىمحانوۆ السا, سپورت ساناتىندا – قازاق كۇرەسىنەن سپورتشى زارينا ساريپوۆا ماراپاتتالدى.
