فوتو: aikyn.kz
ءىس-شاراعا كولىك, سىرتقى ىستەر, قارجى مينيسترلىكتەرىنىڭ, «Kazakh Invest» ۇك اق-نىڭ جانە بيزنەس-قاۋىمداستىق وكىلدەرى قاتىستى. كەزدەسۋ brainstorm فورماتىندا ءوتتى. ءسوز كەزەگىندە كولىك ۆيتسە-ءمينيسترى تالعات لاستاەۆ الداعى بىرنەشە جىلدا كولىك ينفراقۇرىلىمىنا قاتىستى قويىلعان بارلىق مىندەتتى ىسكە اسىرۋ ءۇشىن, ونىڭ ىشىندە ترانزيتتىك قۋاتتاردى ۇلعايتۋعا شامامەن 40 ملرد دوللار قاجەت بولاتىنىن اتاپ ايتتى.
«مينيسترلىك كولىك جانە لوگيستيكا سالاسىنداعى ينۆەستيتسيالىق جوبالار پۋلىن ۇلعايتۋ بويىنشا وزەكتەندىرۋ جانە شارالار قابىلداۋ بويىنشا جۇمىس جۇرگىزدى. اتاپ ايتقاندا, ينۆەستيتسيالاردى تارتۋ جانە ينۆەستيتسيالىق جوبالاردى بىرنەشە ەسە ۇلعايتۋ ماسەلەلەرى بويىنشا جاڭا تاسىلدەردى ازىرلەۋ ماقساتىندا جەرگىلىكتى اتقارۋشى ورگانداردىڭ, كولىك جانە لوگيستيكا سالاسىنداعى مەملەكەتتىك جانە جەكە سەكتور كومپانيالارىنىڭ قاتىسۋىمەن ۆەدومستۆونىڭ ينۆەستيتسيالىق جوبالارىن سۇيەمەلدەۋ جونىندەگى جۇمىس توبىنىڭ ءبىرىنشى وتىرىسى وتكىزىلدى», دەدى ت.لاستاەۆ.
قازىرگى ۋاقىتتا مينيسترلىك وتكىزگەن ءىس-شارالاردىڭ قورىتىندىسى بويىنشا تەمىرجول مەن تەڭىز كولىگى, اۆياتسيا جانە اۆتوجول سالالارىندا جالپى سوماسى 31 ملرد دوللاردان استام ينۆەستيتسيالىق جوبالار پۋلىن قالىپتاستىردى.
سونداي-اق ۇلتتىق ستاتيستيكا بيۋروسىنىڭ رەسمي دەرەكتەرىنە سايكەس, 2023 جىلدىڭ قورىتىندىسىندا مينيسترلىكتىڭ جەتەكشىلىك ەتەتىن سالالارى بويىنشا نەگىزگى كاپيتالعا ينۆەستيتسيالار جوسپارى 107,7 پايىزعا ورىندالىپ, 2 233,6 ملرد تەڭگەنى قۇراعانىن اتاپ وتكەن ءجون. سونىمەن بىرگە ەۋروپالىق ينۆەستورلاردى تارتۋ ءۇشىن وتاندىق كولىك سالاسى دەلەگاتسياسىنىڭ بەلگياعا, نيدەرلاندقا جانە رۋمىنياعا جۇمىس ساپارى ۇيىمداستىرىلدى. ساپار بارىسىندا مينيسترلىك وكىلدەرىمەن, حالىقارالىق قارجى ۇيىمدارىمەن جانە نەگىزگى ەۋروپالىق ينۆەستورلارمەن كەزدەسۋلەر وتكىزىلىپ, كولىك سالاسىنداعى ىنتىماقتاستىق جونىندەگى بىرقاتار قۇجاتقا قول قويىلدى.
