جىل سايىن مەملەكەتتىڭ, ەل باسشىسىنىڭ قولداۋىمەن اۋعان سوعىسىنىڭ ارداگەرلەرىنە قولداۋ كورسەتىلىپ كەلەدى. ناقتى ايتقاندا, بەس وتانداسىمىزعا كەڭەس وداعىنىڭ باتىرى اتاعى بەرىلدى, 1 ادام حالىق قاھارمانى اتانىپ, ەكى ازامات «ايبىن» وردەنىنىڭ يەگەرى اتاندى, جۇزدەگەن ازامات بۇرىنعى كسرو جانە قازاقستان رەسپۋبليكاسىنىڭ وردەندەرىمەن جانە مەدالدارىمەن ماراپاتتالدى.
دەنساۋلىق ساقتاۋ مينيسترلىگى دە ءوز تاراپىنان اۋعان سوعىسىنىڭ شيەلەنىسىندە شيراعان ارداگەرلەرىمىزگە بارىنشا قىزمەت كورسەتىپ وتىر. ماۋسىم سايىن سوعىس ارداگەرلەرىنە ارنالعان رەسپۋبليكالىق كلينيكالىق گوسپيتالىندە اۋعان ارداگەرلەرى دە تۇراقتى تۇردە ساپالى ەم قابىلدايدى. ەمحانادا ارداگەرلەرىمىزدىڭ جان ساۋلىعى مەن ءتان ساۋلىعىن ساقتاۋعا بارلىق جاعداي جاسالعان.
«Amanat» پارتياسىنىڭ «ارداگەرلەردى ارداقتايىق» جوباسى اياسىندا جاقىندا مينيسترلىك پەن گوسپيتال ۇجىمىنىڭ ۇيىمداستىرۋىمەن اۋعان سوعىسىنا قاتىسقان جاۋىنگەرلەردىڭ قۇرمەتىنە وراي «اۋعاننىڭ اسۋىندا وت كەشكەندەر» اتتى كەش ءوتتى. تاريحي تاعىلىمى مول ءىس-شارادا ەلىمىزدىڭ ءار وڭىرىنەن كەلگەن ارداگەرلەر باس قوسىپ, وتكەن كۇننىڭ ەستەلىكتەرىنە ءۇڭىلدى, تاۋەلسىزدىك تارتۋ ەتكەن بەيبىت كۇننىڭ بەرەكەسىنە بوي جىلىتتى. بار ايماقتان كەلگەن ارداگەردىڭ باسى بىرىككەن سالتاناتتى جيىندى ۇلتتىق قاۋىپسىزدىك كوميتەتىنىڭ شەكارا اكادەمياسى اسكەري وركەسترى رۋحتى اۋەن, اسەم سازبەن كومكەردى. اۋىر امانات ارقالاپ, ءومىر مەن ءولىم قايشىلاسقان قاندى شايقاسقا قاتىسقان مارات ماجيتوۆ, اليك اتىقانوۆ, مۇرات ابدۋشۋكۋروۆ, بايداۋلەت داركەنباەۆ, الماسبەك ايدارباەۆ, بولات سايلان, جۇمات قۇنانباي, دۇيسەن ماعۇلۇموۆ, مارات سايبەكوۆ, باقىت تاقىرباسوۆ, التىنبەك تاناباەۆ, ۆالەري پەرمينوۆ, ناۋرىزباي ايدابوسىن, ماحات سماقوۆ سىندى ارداگەرلەرگە العىسحات جانە باعالى سىيلىقتار تابىستالدى.
گوسپيتال باسشىسى گاۋحار تازابەكقىزى مايدانگەرلەردىڭ بيىك بولمىس, ءمارت تۇلعا, باتىر بەينەسى جايلى ايتا كەلىپ: «اۋعان سوعىسى ارداگەرلەرىنىڭ ءجۇرىپ وتكەن جولى, ەرەن ەڭبەگى, كورسەتكەن ەرلىگى – بۇگىنگى ۇرپاق ءبىلۋى كەرەك تاريح بەتتەرىنىڭ ءبىر پاراعى. بۇل تاريحي كۇننىڭ ءمان-ماڭىزى تىم تەرەڭدە جاتىر. سوندىقتان دا حالىق ءۇشىن اۋعان سوعىسى ارداگەرلەرى – جوعارى رۋحتىڭ كورىنىسى. ارداگەرلەرىن قادىرلەپ, رۋح جاسامپازدىعىن جاڭعىرتايىق», دەگەن ىزگى تىلەگىن ءبىلدىردى.
كەيىننەن جيىلعان قاۋىم مەن ارداگەرلەردىڭ قۇرمەتىنە اق حالاتتىلار ءوز ونەرىن پاش ەتتى. كوپبەيىندى وڭالتۋ ءبولىمىنىڭ مەيىربيكەسى ايدىن سوۆەت «اۋعانستان» ءانىن شىرقاسا, نەۆرولوگيا ءبولىمىنىڭ قىزمەتكەرى مينيرا توروكۋلوۆا «اۋعانستان قاسىرەتى», تەراپيا ءبولىمىنىڭ اعا مەيىربيكەسى ءمولدىر بالتاباي ء«ان سال سارباز», فيزيوتەراپيا بولىمىنەن ايبەك قاسىماحىن ناقىشىنا كەلتىرە ولەڭ وقىپ, كلينيكا-دياگنوستيكالىق ءبولىم مەيىربيكەلەرى «العا, قازاق جىگىتتەرى» ءانىن شىرقادى.
سونداي-اق سازدى كەشتىڭ سارىنى, تاعىلىمدى كەزدەسۋدىڭ تالىمىنە بويلاعان ارداگەرلەر گوسپيتال قىزمەتكەرلەرىنىڭ ساپالى قىزمەتىنە ساي بەرىلگەن ماراپاتىن تابىستادى. جىلى لەبىز ءبىلدىرىپ, گوسپيتال اكىمشىلىگى مەن ۇجىمعا العىسىن جاۋدىردى. اۋقىمدى ءىس-شارا جارقىن جۇزدەسۋگە تولى بولدى. كەشتە گەنەرال مايور مارات ءالىمجان ۇلى ءوزىنىڭ جاساعىنداعى ساربازى ولەگ وزەروۆتى «كۇتپەگەن جەردەن» كەزدەستىرىپ, ەرەكشە سەزىمگە بولەنگەنىن باياندادى. ارداگەرلەرىن ۇلىقتاپ قانا قويماي, قانشا جىلدان كەيىن ءبىر ورتادا تابىستىرعان گوسپيتال ۇجىمىنا العىس ايتتى.
كەش سوڭىندا ەستەلىكتەر ايتىلىپ, ۇزاق ۋاقىتقا دەيىن ارداگەرلەر ءوزارا قاۋقىلداسىپ جاتتى. سول كۇنى كوپشىلىك قۇندى كەشتى عانا قىزىقتاپ قويمادى, ونەرپازداردىڭ ىستىق ىقىلاسى, مەيماناسى تاسىعان ارداگەرلەر مەن ىزەتتى دارىگەرلەر قاۋىمىنىڭ ءاربىر ارەكەتى ەرلىكتىڭ داڭقى ماڭگى وشپەيتىنىن ايعاقتاپ تۇردى.
داستان قاستاي,
جۋرناليست
الماتى
