قازىبەك يسا وسىدان ءۇش جىل بۇرىن پارلامەنتتە ءدىني تەرىس اعىمدارعا زاڭمەن تىيىم سالۋ ماسەلەسى كوتەرىلگەنىن تىلگە تيەك ەتىپ, الايدا سودان بەرى ناقتى ناتيجە بايقالماعانىنا, كەرىسىنشە قوعامدا راديكالدى اعىمداردىڭ ىقپالى كۇشەيىپ بارا جاتقانىنا الاڭداۋشىلىق ءبىلدىردى.
«سوڭعى ۋاقىتتا ەلدى دۇرلىكتىرگەن بىرنەشە كەلەڭسىز جايتتار سونىڭ ايعاعى. ونىڭ ءبىرى – ناۋرىز مەرەكەسىنە قارسى جاسالعان ارانداتۋشىلىق ارەكەت بولسا, ەكىنشىسى – قوعامدا ۇلكەن رەزونانس تۋدىرعان اتىشۋلى يمامنىڭ ءىسى.
اقتوبەدە سوتتالۋشىلاردىڭ ايەلدەرىنىڭ بەتىن بۇركەمەلەپ سوتقا كەلۋى دە قوعامدا قىزۋ تالقىعا ءتۇستى. زاڭدا قوعامدىق ورىندا بەتتى بۇركەۋگە شەكتەۋ بولسا, نەگە بۇل تالاپ سوت عيماراتىندا ساقتالماي وتىر دەگەن زاڭدى سۇراق تۋىندايدى. ەگەر زاڭنىڭ تالاپتارى وسىلاي ەلەنبەسە, باسقا جەردەگى جاعداي قانداي بولماق؟», دەدى دەپۋتات.
دەپۋتاتتىڭ ايتۋىنشا, بەرىك ۇستانىمنىڭ بولماۋى ۇلتتىق تۇتاستىققا سىزات ءتۇسىرىپ, ەلدىڭ ىشكى قاۋىپسىزدىگىنە اسەر ەتىپ وتىر. وتكەن قاسىرەتتەردەن ساباق الۋدىڭ ورنىنا, تەك باقىلاپ وتىرۋ جەتكىلىكتى مە؟ قازىردىڭ وزىندە قاۋىپتىڭ الدىن الۋ قاجەت ەكەنى انىق.
«ۇلتتىق قۇندىلىقتارعا قارسى كەز كەلگەن ارەكەت – مەملەكەتكە قارسى شابۋىل. الەۋمەتتىك جەلىلەردە ۇلتتىق مۇددەگە قارسى, تۇتاستىقتى بۇزۋعا باعىتتالعان پىكىرلەر كوبەيىپ وتىر. بۇل – ۇلتتىق اقپاراتتىق قاۋىپسىزدىككە تونگەن قاتەر. سوندىقتان مۇنداي ارەكەتتەرگە زاڭمەن توسقاۋىل قويۋ قاجەت. قوعامدا ۋاعىز ايتىپ جۇرگەندەردىڭ كەيبىرى ۇلتتى بىرىكتىرۋدىڭ ورنىنا, كەرىسىنشە, ىرىتكى سالۋدا. ولاردىڭ قىزمەتىنە ناقتى باقىلاۋ ورناتىپ, ءدىني باسقارما تاراپىنان ءتيىستى شەشىمدەر قابىلدانۋى ءتيىس», دەدى قازىبەك يسا.
دەپۋتات ايتۋار قوشمامبەتوۆ جالاقىعا تۇسەتىن سالىق جۇكتەمەسىن ازايتۋدى ۇسىندى
دەپۋتات باتىس ەلدەرىندە ءدىني قۇندىلىقتاردى قورلاعاندارعا زاڭمەن جاۋاپكەرشىلىك قاراستىرىلعانىن, ال بىزدە ءدىني جانە ۇلتتىق قۇندىلىقتارعا قۇرمەتسىزدىك تانىتاتىن ارەكەتتەرگە ناقتى توسقاۋىل ءالسىز ەكەنىن اتاپ ءوتتى.
ء«ار وتباسىدا ءتۇرلى ءدىني كوزقاراستاردىڭ قايشىلىققا اكەلۋى – قوعامداعى كۇردەلى ماسەلەنىڭ كورىنىسى. بۇل باعىتتا جۇيەلى ساياسات پەن ناقتى شەشىم قاجەت. ەلىمىزدە راديكالدى جانە ءداستۇرلى ەمەس اعىمداردىڭ تارالۋى – ۇلتتىق قاۋىپسىزدىككە تىكەلەي قاتەر. سوندىقتان مەملەكەت ەڭ الدىمەن وسى قاۋىپتەردىڭ الدىن الۋعا مىندەتتى.
راديكالدى اعىمدارعا زاڭمەن تىيىم سالۋ – بوستاندىقتى شەكتەۋ ەمەس, كەرىسىنشە, قوعامدى قورعاۋ تەتىگى. بۇل – ءدىندى ەمەس, تەرىس باعىتتاعى ۇيىمداردى شەكتەۋگە باعىتتالعان شارا. وسى تۇرعىدان العاندا, ءدىني راديكاليزمگە قارسى كۇرەس – كەز كەلگەن قۇقىقتىق مەملەكەتتىڭ قاۋىپسىزدىك ستراتەگياسىنىڭ اجىراماس بولىگى. بۇل – قوعامعا باعىتتالعان سوڭعى ەسكەرتۋ ىسپەتتى دابىل. قاۋىپتىڭ الدىن الماساق, سالدارى اۋىر بولۋى مۇمكىن», دەدى ول.
