فوتو: ۇكىمەتتىڭ ءباسپاسوز قىزمەتى
ۇكىمەت باسشىسى سەمەي قالاسىنداعى اكىمشىلىك ىسكەرلىك ورتالىقتى دامىتۋ جوبالارىمەن جانە الاكول جاعالاۋىن دامىتۋدىڭ كەشەندى جوسپارىمەن تانىستى. ۇسىنىلعان باستامالار مەملەكەت باسشىسىنىڭ تاپسىرماسىنا سايكەس, اباي قۇنانباي ۇلىنىڭ 180 جىلدىعىنا ارنالعان «ابايعا قۇرمەت» رەسپۋبليكالىق اكتسياسى اياسىندا ىسكە اسىرىلىپ جاتىر.
الاكول جاعالاۋىن دامىتۋ جوباسى اياسىندا زاماناۋي تۋريستىك-رەكرەاتسيالىق ايماق قالىپتاستىرۋ كوزدەلگەن. وبلىس اكىمى بەرىك ءۋاليدىڭ ايتۋىنشا, وڭىردە ءتۋريزمدى دامىتۋ ءۇشىن 2029 جىلعا دەيىن 49 جوبا جۇزەگە اسىرۋ جوسپارلانعان. سونداي-اق 2025 جىلى الاكول جاعالاۋىنىڭ ينفراقۇرىلىمىن دامىتۋعا 1 ملرد تەڭگە بولىنگەنىن, بۇل قاراجات جاعالاۋدى نىعايتۋ جۇمىستارىن جۇرگىزۋگە, اباتتاندىرۋ مەن كوشەلەردى جوندەۋگە باعىتتالعانىن ايتتى.
«2026 جىلى بۇل ماقساتتارعا 10 ملرد تەڭگە بولىنگەن. بۇل قاراجات ينجەنەرلىك جانە كولىك ينفراقۇرىلىمىن جاڭعىرتۋعا, سونداي-اق تسيفرلىق شەشىمدەردى ەنگىزۋگە, ونىڭ ىشىندە بەينەباقىلاۋ جۇيەلەرىن جانە ورنىقتى ءموبيلدى ينتەرنەت-قامتۋدى ەنگىزۋگە باعىتتالادى», دەلىنگەن حابارلامادا.
جوسپارعا سايكەس, الاكول اۋماعىن 300 گەكتاردان 3 مىڭ گەكتارعا دەيىن ۇلعايتۋ, سونداي-اق تاۋلىگىنە 75 مىڭ تۋريست قابىلداۋ مۇمكىندىگىنە جەتكىزۋ كوزدەلىپ وتىر. كەشەندى جوسپارعا ەنگىزىلەتىن تۇزەتۋلەر بيىلعى قىركۇيەك ايىنا دەيىن اياقتالادى. سونىمەن قاتار ەلەكتر جەلىلەرى, سۋمەن جابدىقتاۋ جانە سۋ بۇرۋ جۇيەلەرى, كولىك جانە كوممۋنالدىق ينفراقۇرىلىم نىساندارىن سالۋ جوبالارى قامتىلعان.
وڭىردە ءتۋريزمدى دامىتۋ باعىتىندا ناقتى ناتيجەلەر دە بار. 2025 جىلى جالپى قۇنى 8,9 ملرد تەڭگە بولاتىن 4 جوبا جۇزەگە استى.
پرەمەر-مينيستر الماتى جەو-لارىنا قاتىستى وبەكتيۆتى اقپارات بەرۋدى تاپسىردى
جالپى رەسپۋبليكا بويىنشا دا سالا قارقىندى دامىپ كەلەدى. قابىلدانعان شارالاردىڭ ناتيجەسىندە ىشكى تۋريستەر سانى 9,1 ملن-نان 10,1 ملن-عا دەيىن, ال شەتەلدىك تۋريستەر سانى 1,3 ملن-نان 1,4 ملن-عا دەيىن ارتقان. كەلۋشىلەردى ورنالاستىرۋ نىساندارىنىڭ كىرىستەرى 350,6 ملرد تەڭگەنى قۇراسا, سالاعا تارتىلعان ينۆەستيتسيالار كولەمى 32,6% ءوسىپ, 1,26 ترلن تەڭگەگە جەتكەن.
ولجاس بەكتەنوۆ «سەمەي ورمانىندا» جي نەگىزىندەگى ءورتتى ەرتە انىقتاۋ جۇيەسىن تەكسەردى
سەمەي قالاسىندا جۇزەگە اسىرىلاتىن ءىرى جوبالاردىڭ ءبىرى – اكىمشىلىك ىسكەرلىك ورتالىق. اۋماعى 1 مىڭ گەكتاردان اساتىن بۇل جوبانىڭ شەڭبەرىندە جاڭا زاماناۋي نىساندار سالۋ جوسپارلانعان.
«وسى رەتتە سەمەي قالاسىندا اكىمشىلىك ىسكەرلىك ورتالىعى ء(اىو) جوباسىن جۇزەگە اسىرۋ كوزدەلگەن. اۋماقتىڭ جالپى اۋدانى 1 مىڭ گەكتاردان اسادى. جوبا اياسىندا الەۋمەتتىك جانە ىسكەرلىك ينفراقۇرىلىمى دامىعان جاڭا زاماناۋي تۇرعىن ءۇي اۋدانىن قۇرۋ جوسپارلانۋدا. 2026-2029 جىلدار ارالىعىندا جالپى اۋدانى 3 ملن شارشى مەتردەن اساتىن 75 مىڭ ادامعا ارنالعان تۇرعىن ءۇي كەشەندەرىن, سونداي-اق 17 مەكتەپ پەن بالاباقشانى قوسا العاندا, 40-تان استام الەۋمەتتىك, كوممەرتسيالىق جانە اكىمشىلىك ماقساتتاعى نىسانداردى سالۋ قاراستىرىلعان», دەلىنگەن حابارلامادا.
پرەمەر-مينيستر قالا قۇرىلىسىنا قاتىستى شەشىمدەردىڭ ساپاسىن قامتاماسىز ەتۋ جانە وبلىس اكىمدىگى تاراپىنان كەشەندى جوسپاردى جۇزەگە اسىرۋدى ءتيىمدى ۇيلەستىرۋ قاجەتتىگىن اتاپ ءوتتى.
