ولجاس بەكتەنوۆ «سەمەي ورمانىندا» جي نەگىزىندەگى ءورتتى ەرتە انىقتاۋ جۇيەسىن تەكسەردى

تسيفرلىق شەشىمدەر – ورمان قاۋىپسىزدىگىنىڭ نەگىزى

رەزەرۆات اۋماعىندا ورمان جانە دالا ورتتەرىن جي نەگىزىندە ەرتە انىقتاۋ جۇيەسىنىڭ پيلوتتىق ەنگىزىلۋى تانىستىرىلدى. بۇل تەحنولوگيا ءورت وشاقتارىن الىس قاشىقتىقتان جانە كەز كەلگەن اۋا رايىندا انىقتاۋعا مۇمكىندىك بەرەدى.

وسى جەردە پرەمەر-ءمينيستردىڭ, ەكولوگيا جانە تابيعي رەسۋرستار ءمينيسترى ەرلان نىسانباەۆتىڭ, توتەنشە جاعدايلار ءمينيسترى شىڭعىس ءارىنوۆتىڭ جانە اباي وبلىسىنىڭ اكىمى بەرىك ءۋاليدىڭ قاتىسۋىمەن ورمان ءورتىن قولدان ۇيىمداستىرعان وقۋ-جاتتىعۋ وتكىزىلدى. ماماندار تسيفرلىق جۇيەلەردىڭ ءورت ءسوندىرۋ قىزمەتىمەن ءوزارا ارەكەتتەسۋىن كورسەتتى.

ەكولوگيا جانە تابيعي رەسۋرستار ۆيتسە-ءمينيسترى نۇرلان قۇرمالاەۆتىڭ ايتۋىنشا, زاماناۋي تەپلوۆيزيالىق جانە وپتيكالىق كامەرالارمەن جابدىقتالعان بەينەمونيتورينگ جۇيەسى ءورت بەلگىلەرىن باستاپقى كەزەڭدە-اق اۆتوماتتى تۇردە انىقتايدى. ءتۇتىن نەمەسە جالىن تىركەلگەن جاعدايدا, جۇيە دەرەۋ جەدەل باسقارۋ ورتالىعىنا سيگنال جىبەرەدى. بۇل ءورتتى جىلدام وقشاۋلاپ, جويۋعا مۇمكىندىك بەرەدى.

جەدەل باسقارۋ ورتالىعى بەينە قابىرعامەن جانە ستاتسيونارلىق راديوستانسامەن جابدىقتالعان. مۇنداي ورتالىقتار اباي وبلىسىنداعى 7 اۋداندا ورنالاسقان «سەمەي ورمانىنىڭ» بارلىق 10 فيليالىندا جۇمىس ىستەيدى. جۇيە 100-دەن استام سىناقتان وتكەن.

قازىرگى ۋاقىتتا جۇيەنى جەتىلدىرۋ جۇمىستارى جالعاسىپ جاتىر. اتاپ ايتقاندا, ول التى مەتەوكەشەنمەن جانە نايزاعاي باعىتىن انىقتاۋ ستانساسىمەن ينتەگراتسيالانباق, بۇل قۇرعاق نايزاعايدان تۋىندايتىن ورتتەردى دە ەرتە انىقتاۋعا مۇمكىندىك بەرەدى.

پرەزيدەنت تاپسىرماسىنا سايكەس, ءورتتى ەرتە انىقتاۋ تەحنولوگياسى بۇكىل ەل بويىنشا كەزەڭ-كەزەڭىمەن كەڭەيتىلىپ جاتىر. بۇل جونىندە «قازاقتەلەكوم» اق تسيفرلىق بيزنەس ديۆيزيونىنىڭ باس ديرەكتورى باقتيار قوجاحمەتوۆ باياندادى. ونىڭ ايتۋىنشا, اقمولا وبلىسىندا, استانا ماڭىندا جانە بىرقاتار ۇلتتىق پاركتەردە جۇيە كەزەڭ-كەزەڭىمەن ەنگىزىلۋدە. ال بيىل شىلدەگە دەيىن ەلىمىزدەگى 24 تابيعي پارك پەن قورىق تولىق قامتىلىپ, قىركۇيەكتە جۇيە ونەركاسىپتىك پايدالانۋعا بەرىلەدى.

«سەمەي ورمانى» رەزەرۆاتىندا سيرەك كەزدەسەتىن سىلەۋسىن كوزگە ءتۇستى

ماتەريالدىق-تەحنيكالىق بازا نىعايىپ كەلەدى

ولجاس بەكتەنوۆ ورماندى قورعاۋدا جاڭا ستاندارتتار ەنگىزىلىپ جاتقانىن اتاپ ءوتتى.

«مەملەكەت باسشىسىنىڭ تاپسىرمالارىنا سايكەس ءبىز ورمان قورىن قورعاۋدىڭ تۇبەگەيلى جاڭا ستاندارتتارىن ەنگىزىپ جاتىرمىز. ورماندى قالپىنا كەلتىرىپ قانا قويماي, توتەنشە جاعدايلاردىڭ الدىن الۋعا دا باعىتتالعان جۇيەلى شارالار قابىلدانىپ وتىر. پرەزيدەنت ايقىنداعان نەگىزگى باعىتتاردىڭ ءبىرى – تسيفرلاندىرۋدى ەنگىزۋ. وتكەن جىلى رەزەرۆاتتا 510 مىڭ گەكتار اۋماقتى قامتيتىن, 37 زاماناۋي كامەرامەن جابدىقتالعان ءورتتى ەرتە انىقتاۋ جۇيەسى ەنگىزىلدى. تەحنولوگيالاردى تىكەلەي پاترۋلدەۋ شارالارىمەن نىعايتۋ قاجەت. بۇل وتە ماڭىزدى. سوندىقتان ءورت قاۋپى جوعارى كەزەڭدە ورمان كۇزەتىنىڭ تۇراقتى جۇمىسىن قامتاماسىز ەتىپ, ول بارلىق قاۋىپتى ايماقتاردى قامتۋعا ءتيىس. جۇرگىزىلىپ جاتقان جۇمىس «تازا قازاقستان» جالپىۇلتتىق باستاماسىنىڭ ماقسات-مىندەتتەرىنە تولىق سايكەس كەلەدى, ونىڭ شەڭبەرىندە ءبىز تابيعي رەسۋرستاردى ساقتاپ قانا قويماي, ازاماتتاردىڭ ەكولوگيالىق مادەنيەتىن دە ارتتىرامىز», دەدى ولجاس بەكتەنوۆ.

پرەمەر-مينيستر جۇمىستى جەدەلدەتىپ, تسيفرلىق تەحنولوگيالاردى ساپالى ەنگىزۋدى قامتاماسىز ەتۋدى تاپسىردى.

كراسنوكوردون ورمانشىلىعىندا ولجاس بەكتەنوۆ ورمان شارۋاشىلىقتارىنىڭ تەحنيكالىق جاڭعىرتىلۋىمەن تانىستى. «سەمەي ورمانى» موتر باس ديرەكتورى قازبەك امەتوۆتىڭ ايتۋىنشا, سوڭعى ەكى جىلدا رەزەرۆاتتىڭ تەحنيكالىق پاركى 100% جاڭارتىلعان.

بۇرىن توزۋ دەڭگەيى 85% بولسا, بۇگىندە بۇل ماسەلە تولىق شەشىلگەن. تەك 2023 جىلدىڭ وزىندە ليزينگ ارقىلى 39 ءورت ءسوندىرۋ ماشيناسى, 26 شاعىن كەشەن جانە 10 تراكتور الىنعان.

كاسىپورىننىڭ يەلىگىندە:

• 30 ورمان ءورت ستانساسى;
• «قازاۆياورمانقورعاۋ» رمقك-نىڭ 3 تىكۇشاعى;
• 82 ءورت ءسوندىرۋ ءاۆتوموبيلى;
• 49 پاترۋلدىك كەشەن;
• 187 تراكتور جانە وزگە دە تەحنيكا بار.

ەل بويىنشا اۋقىمدى جاڭعىرتۋ

ۇكىمەتتىڭ ورتكە قارسى تەحنيكانى جاڭارتۋ باعدارلاماسى شەڭبەرىندە 2024-2025 جىلدارى 21,5 ملرد تەڭگە ءبولىندى. سونىڭ ناتيجەسىندە ورمان شارۋاشىلىقتارىنىڭ تەحنيكامەن قامتىلۋى 87%-عا جەتتى.

وسى كەزەڭدە:

• 92 ءورت ءسوندىرۋ ماشيناسى;
• 118 پاترۋلدىك كەشەن;
• 244 تراكتور;
• 240 پاترۋلدىك كولىك;
• 3 مىڭنان استام باسقا تەحنيكا ساتىپ الىندى.

سونىمەن قاتار ليزينگ ارقىلى 1057 ورتكە قارسى تەحنيكانى الۋ ءۇشىن 35 ملرد تەڭگە باعىتتالعان. بۇل جۇمىستاردى بيىل مامىر ايىنىڭ سوڭىنا دەيىن تولىق اياقتاۋ جوسپارلانىپ وتىر.

پرەمەر-مينيستر ولجاس بەكتەنوۆ اتاپ وتكەندەي, تسيفرلاندىرۋ, ماتەريالدىق بازانى نىعايتۋ جانە جۇيەلى باسقارۋ – ورمان قاۋىپسىزدىگىن قامتاماسىز ەتۋدىڭ نەگىزگى تەتىگى. مەملەكەت قولعا العان شارالار تابيعي رەسۋرستاردى ساقتاۋمەن قاتار, ەكولوگيالىق قاۋىپسىزدىكتى كۇشەيتۋگە باعىتتالعان.

«سەمەي ورمانى» قىزمەتكەرلەرى جالعان ديپلوممەن جۇمىس ىستەگەن